Annabi Sakari 12

1

2

3

4

5

6

7

8

9

10

11

12

13

14

¹Alatala bara masenyi xɔrɔxɔɛ ti Isirayila xa fe ra. Alatala xa masenyi nan ya, naxan koore nun bɔxi daaxi, naxan xaxili so adamadi yi ra:

²«N fe xungbe rabama nɛ Darisalamu bɛ, duniɲa sie tagi. Mixi na fa Darisalamu gerede, n kaabanako rabama nɛ Yudaya bɛ.

³Na lɔxɔɛ, n Darisalamu findima nɛ gɛmɛ binye ra si birin bɛ. Naxan katama na itefe ra, na kanyi maxɔnɔma nɛ. Duniɲa si birin malanma nɛ a xili ma.»

⁴Alatala xa masenyi nan ya: «Na lɔxɔɛ, n sɔɔri nun a xa soe radaxuma nɛ. N nee findi dɔnxui ra. N Yudaya bɔnsɔɛ matoma nɛ, n nan n ɲɛngi sa e xɔn ma.

⁵Yudaya mangɛe a falama nɛ e bɔɲɛ kui, ‹Darisalamukae sɛnbɛ gboxi e Marigi Alatala nan saabui ra.›

⁶Na lɔxɔɛ, n Yudaya mangɛe luma nɛ alɔ tɛ wolenxi yege xɔɔra, xa na mu alɔ tɛ na din sɛxɛ ra. E fama nɛ si birin halakide naxan na e rabilinyi. Darisalamu mu kanama.

⁷Alatala Yudaya taae nan singe rakisima, alako Dawuda xabilɛ nun Darisalamukae xa binyɛ naxa dangi Yudaya mixie ra.

⁸Na lɔxɔɛ, Alatala Darisalamukae makantama nɛ. Ala a niyama nɛ mixi taganxi xa Dawuda sɛnbɛ sɔtɔ. Dawuda xabilɛ sɛnbɛ gboma nɛ Ala saabui ra. Alatala xa malekɛ a ɲɛrɛma nɛ e ya ra.

⁹Na lɔxɔɛ, n si birin halakima nɛ naxee Darisalamu gerema.

¹⁰N hinnɛ nun kinikini luma nɛ Dawuda xabilɛ nun Darisalamukae xaxili ma. E fama nɛ e ya rafindide n ma, e n tan naxan sɔxɔxi. E sunnunma nɛ n ma fe ra, alɔ mixi naxan xa di singe bara faxa. E e wa xui raminima na ki nɛ.

¹¹Na lɔxɔɛ, sunnunyi gboma nɛ Darisalamu, alɔ Hadada Rimɔn sunnunxi Megido gulunba kui ki naxɛ.

¹²Ɲama birin sunnunma nɛ xabilɛ ki ma. Dawuda xabilɛ luma nɛ a xati ma. Natan xabilɛ fan luma nɛ a xati ma. Xɛmɛe nun ginɛe mu sunnunma yire keren.

¹³Lewi xabilɛ luma nɛ a xati ma. Simeyi xabilɛ luma nɛ a xati ma. Xɛmɛe nun ginɛe mu sunnunma yire keren.

¹⁴Xabilɛ birin luma nɛ a xati ma.»