Proverbios 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Yachayga willacoj warminömi gayacuyparaj willacuycan. Tantiyaypis llapan wiyanantami munan.

²Puytush lömaman ichiycur, näni raquejcunaman ichiycur willacuycan.

³Marcaman yaycuna puncucunacho gayacuycan:

⁴«Runacuna, canan parlamushäga caycan gamcuna wiyacunayquipämi.

⁵Tantiyacuyta mana munaj mösucuna, yarpayniyoj canayquipaj yachacuy.

⁶Wiyamay-llapa. Fiyupa allicunatami willapäshayqui. Dios munashan cajcunatami yachachishayqui.

⁷Rasun cajllatami yachachishayqui Nogaga manami llullacöchu.

⁸Rasun cajllatami rimä. Ichicllatapis manami llullacöchu.

⁹Yachachishäga fäsi yachacuymi yarpaysapacunapäwan tantiyacojcunapäga. Chaycunaga manami llutanchu.

¹⁰Guellayta gorita ashinayquipa ruquenga yachachishätaraj wiyacuy, yachacuy.

¹¹Yachaymanga manami tincunchu cuyayllapaj perlas rumipis. Mas fiyupa munay cajpis manami tincunchu.

¹²«Noga yachayga juc runanömi cä. Nogami runataga yarpayniyojyächë.

¹³Tayta Diosta rispitaj runaga mana alli cajcunata llapantami chiquin. Nogaga chiquëmi alli-tucojta, jucha aparicojta, llapan llullacojta.

¹⁴Nogami yarpächë imapäpis; imata rurananpäpis camacächë. Nogami camacächë yarpaysapa cananpäpis, callpayoj cananpäpis.

¹⁵Nogapitami raycunapis munaynincho runacunata chararan. Rasun cajllata rurar arriglajcunapis runacunata alli arriglan.

¹⁶Nogapitami llapan mayur mandajcunapis chaychica runata mandan. Noga captëmi autoridäcunapis alli arriglan.

¹⁷Cuyamajcunata nogaga cuyämi. Ashimajcunapis yachacunmi.

¹⁸Nogami camacächë rispitasha cananpaj, ima-aycayojpis cananpaj. Ima-aycata chasquinanpäpis, allicho llojshinanpäpis camacächë.

¹⁹Noga tarichishäga allinnin goripitapis mas allimi. Munachishäga aypalla guellaypitapis mas allimi.

²⁰Nogaga llapantapis alli cajllatami camacächë. Alli cajta rurayllachömi goyä.

²¹Cuyar yachacamajcunataga ima-aycatapis tarichëmi. Tarichë wasincho ima-aycanpis mana pishej cananpaj.

²²«Tayta Diosga gallaycunallanchönami nogata ruramaran. Imatapis manaraj camallarnami ruramaran.

²³Imapis manaraj captin gallarinanchömi ruramaran. Cay pachatapis manaraj camallarnami ruramaran.

²⁴May-may lamarcunapis manaraj captillannami ruramaran. Pucyucunapis manaraj pashtamuptin, mayucunapis manaraj aywaptillannami ruramaran.

²⁵Puntacunawan jircacunapis manaraj captinmi Tayta Dios mayna ruramashana caran.

²⁶Chay öraga chaqui jircacunapis, ni allpapis manami caranrächu. Cay munducho ñuchu allpa caycajpis manami caranrächu.

²⁷Janaj pachaman yacuta raquiptin, allpaman yacuta raquiptin, paychömi caycarä.

²⁸Syëluman pucutayta camacächiptin, lamarcho yacu mana pishïnanpäpis camacächiptin paywanmi caycarä.

²⁹Allpa jananman mana llojshimunanpaj lamar yacuta camacächiptin, allpa mana cuyucunanpaj sumaj tacyachiptin

³⁰paychömi nogaga caycarä nishanta rurar. Nogami payta cushicachej cä. Mana cachariypami cushisha paycho caycarä.

³¹Tayta Dios camashan pachacho fiyupa cushishami caycashcä. Runata ricar fiyupami cushicurä.

³²«Wamräcuna, canan willapashätaga sumaj wiyacuy. Yachachishäno cawarga cushishami goyanquipaj.

³³Yachachishäcunata sumaj wiyacuy. Yachaynëta tantiyachishäta ama manacajman churaychu.

³⁴Yachachishäta wiyacoj runaga fiyupa cushishami canga. Wiyamänanpaj wasë puncucho shuyämajcunaga cushishami goyanga.

³⁵Nogata tarimaj cäga imaycamapis cushishami cawanga. Tayta Diospis allimi rican.

³⁶Nogata mana yarpämajcunami ichanga quiquillan mana allita ruracuycan. Chiquimajcunaga quiquincunami wañuyta ashiycan.»