Ol Provep 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Epe redepone konere ona meda rekaawa onaa yaata-rupa madaa.

²Nipu so pore madaa pora kepaa-kepaa pea pare aawa yolaaya.

³Gore nipu adaa ada kagure-na pora kerepo-nane aawa nipumi gupa yaloa lala aaya.

⁴Neme onaa nimi luabu yalalo: Nimi kone na-i onaa luabu kone waru kegena mealimina. Nimi aanu kone waru na-imiri ipua kone waru epaa mealepa.

⁶Neme epe redepi agaa go lagialo madaa-re, aane waru lobapa ina pirua pagalepape.

⁷Neme wae agaa luaburi gi waru pea-pulu neme oro yalo ora agaa riaa laguaayo.

⁸Neme yaa-agaa natopare go to agaa luabu ora epe agaa riaa lagialo.

⁹Epe kone sua makuae yae waru meme aanumiri neme to agaa-na re-re waru makuaeme. Goa pea-ga go agaa ora riae yade kone sua waru makuatepape.

¹⁰Nina agaa-me mone mena sekere puri pane yae luabu rabuaaya-pulu neme epe kone luabu nimi mogeano waru pago piralepa.

¹¹Nina bipa niri ora epe kone epe yae luaburi ni yade. Neme gol mone oyae luabu page nimimi raana omeme yae luabu page rabuaawa ora puri na-ia tode.

¹²Ni epe konena pora pamuape-rupa waru makuaayo. Goa pua ora epe pora pamuape page ni yade.

¹³Aa meda nipu Adaa Aa-na agaa pagoa rataliare wae yaenu pape gime-omea. Neme gimi ome yae-re, aa medame nimuna bi minasaawa waea pea kone luabu-ri gime ome. Waeanu adaapu pua yaa agaa teme aanu page ora gipea.

¹⁴Onaanu epe kone kaloa epe kogono papena kone page luabu neme mada gialua. Nina bipa niri epe kone yade. Goa pua adaa puri luabuna aaraa page ni yade.

¹⁵Adaa ada kaguare luabu surubenalo aa mudu luabu page king-nu page neme mapiraayo. Goa pua lo waria go onaa luabu epe-rupa surubenalo epe kone neme kaato.

¹⁷Onaa medame ni adalua kone saliare ni mada adalia. Onaa medalomame ni raaname omalimiri neme page nimu raaname waru omalua.

¹⁸Neme onaa adaa bi kaloa oyaenu page ora adaapu kaato. Mone oyae luabu waru kaloa epe kone pora luabu kurinaloa onaanu luabu waru raba mealua.

¹⁹Neme kaato yaemere epe puri pane gol aana page aana silipa page ora rabuaniaaya.

²⁰Oro yalo neme epe redepone kone luabu ratu-aayo.

²¹Ni raana omeme onaana yaere adaa stua-para kago imi-rupa kirita saayo. Goa pua mo akore kirita i ada-para rulatabena saayo.

²²Ora abade Adaa Aa-me oyae luabu warisa raburi ririnane ni aba mapiraasa. Goa pua wala oropere oyae luabu warisa.

²³Ora abade Adaa Aa-me su yaa lapo page oyae rayo abi nawarini aawa ni aba waria mapiraasa rabu ni aba pirisu.

²⁴Adaa Aa-me ipa ogenu page adaa ipa solowaranu page abi nawarini rabu ni aba pirisu.

²⁵Adaa porenu page oge porenu page abi nawarini rabu ni aba pirisu.

²⁶Go rabu ni pirano-re Adaa Aa-me su page abi nawarisa. Oyae luabu page abi na-opena e maapu nape yaenu page abi na-isa.

²⁷Yaa-me ipa solowara mea kutapu isa rabu page Ni aba pirisipa.

²⁸So yaa madaa moae yaakoya page, su-para ipa marakupitabasa rabu page, ipa pa go su madaa adaapu mapopaawa solowara mapiraasa rabu page ni aba pirisu.

²⁹Nipumi suna-re warisa rabu pirisu. Goa pua mo ipa solowara repa-repa warisa rabu page ni pirisu. Goa pua ipa solwara neme go su nakabulape loa agaa mana lakesa rabu page, ipa neme go salo robo nakabulape sa rabu page ni pirisipa.

³⁰Adaa Aa-me go yae luabu warisa rabu niri go kogono rayo surubanolo makuae aa mada mua mapirasa. Nipumi warisa oyae luabu adoa raana waru pisa-da neme nipu page raana omenalo kogono pisu. Neme go-su adoa onaa pimi su madaa page pedo waru pisu. Goa pisa-da neme Adaa Aa-na ini agaa-na oroyalo raaname omo aayo.

³²Epea-para epe kone lapo-me agaa mone mone go-rupa ta. Go nogo naakinu nimimi naa agaa waru pagoa nina kone luabu waru ratalepape. Nimimi goa palimiri epe raaname rubini onaa piralimina.

³³Nimiri neme epe kone gianoloa waru makuae yaeme rubini onaa piralimina. Nimimi go agaa madaa masaa narilatepape.

³⁴Nina agaa pagoa ratalimi onaare nimi madaa raaname rubialia. Oroyalo nimi naa ada pora-gape para surubeme rabu neme epe kone epe pora mea waato. Nina poragape-para epeme rabu neme epe agaa lage.

³⁵Onaame ni mealimi-daare nimu kagaa pirape kone wasupa mealimi. Goa pua Adaa Aa-me nimu repara epe lo-robaa katea.

³⁶Goa peme pare aanu medalomame ni namealimiri nimuna bipa nimu bebo teme. Onaa-me ni raaname naomalimiri, nimu omape madaa kone mapiraawa peme.