1Ba’aray fithingan e yungi n’en ni i par piyu Israel riy u tomuren ni chuw fapi ganong nu Israel u Egypt ni Moses nge Aron e ra pow’iyewrad i yan.
2I SOMOL e yog, me yoloy Moses nga but’ fithingan e yungi n’en ni ur pired riy.
3Girdi’ nu Israel e ra chuwgad u Egypt ko rofen ni ragag nge lal ko pul ni ta’reb ko fare duw, ni aram e re rran nga tomuren e bin m’on e pal’ukaf. Bochan gelngin e ayuw rok SOMOL ngorad miyad chuw ko fare binaw nu Rameses ni be guyrad yu Egypt,
4ko ngiyal’ ni be k’eyag yu Egypt e tin nganni’ e pagel u pifakrad ni SOMOL e ke thang e pogofan rorad. Iip aramrogon, ni dag SOMOL nib gel gelngin ngak e pi got rok yu Egypt.
5Me chuw piyu Israel u Rameses ngarabad ra pired nga Sukkoth.
6Ma gin ni migid nra bad ra pired ngay e yu Etham u tharen e ted ni dariy ban’en riy.
7Mra pigichelgad u rom ngar sulod nga Pi Hahiroth, ni ba’ ko ngak u Baal Zefon, ngarabad ra pired nga charen yu Migdol.
8Miyad chuw u Pi Hahiroth ngar th’abed e day ni Red Sea nga daken e ted u Shur; me yan dalip e rran ni kar milekaggad marbad ra pired nga Marah.
9Miyad chuw u rom ngarbad riy nga Elim, miyad par u rom, ni bochan e ba’ ragag nge l’agruw i miteran ni alublub nge medlip i ragag ken e gak’iy ni palm u rom.
10Miyad chuw u Elim ngarab ra pired nga charen fare nguy nu Suez.
11Ma gin migid ngay ni kurab ra pired ngay e daken e ted u Sin.
12Ma aram ma iip ku rabad ra pired nga e ted u Dofkah,
13me tomuren e ginem ma yu Alush.
14Ma gin migid ngay e Refidim, ni bangi n’en ndariy e ran riy ni ngar unumed.
15Miyad chuw u Refidim nga ranod i yan ko burey ni Hor ngu u ranod ra pired ko yungi n’en ni ba’aray: ted u Sinai, Kibroth Hattaavah (ni ki yima yog ni “Lowaneyam’ ko Ar’ar”), Hazeroth, Rithmah, Rimmon Perez, Libnah, Rissah, Kehelathah, Mount Shefer, Haradah, Makheloth, Tahath, Terah, Mithkah, Hashmonah, Moseroth, Bene Jaakan, Hor Haggidgad, Jotbathah, Abronah, Eziongeber, nge ted nu Zin (ni aram yu Kadesh), nge burey ni Hor, ni ba’ nga tharen e binaw nu Edom.)
38U tan lungun SOMOL, me yan Aron ni prist nga daken e Burey nu Hor. Ni duw rok e ngiyal’nem e ra’ay nge rliw’ nge dalip me yim’ u rom ko bin m’on e rran ko bin lal e pul ko re duw nike gaman e aningeg i ragag ngay nike chuw piyu Israel u Egypt.
40Me rung’ag e Pilung nu Arad ni ba’ ngalan e yumuch u Kanaan nike yib piyu Israel i yib.
41Me chuw piyu Israel u rom ko Burey nu Hor ngarbad ko tafelf’el nu Moab ngarab ra pired ko yungi n’en ni ba’aray: Zalmonah, Punon, Oboth, nge Abarim nib binaw ni kann’ag ni bay u lan e nug nu Moab, Dibon Gad, Almon Diblathaim, Burey ni Abarim nib chuchugur ko Burey ni Nebo, ngalan e tafelf’el u Moab nga charen e lul’ u Jordan ni barba’ e lul’ riy e yu Jeriko, nga thilin yu Beth Jeshimoth nge loway u Akacia.
50U rom u lan e tafelf’el u Moab, nga barba’ e lul’ ni Jordan ma yu Jeriko nga barba’, e pi’ SOMOL ngak Moses
51e pi motochiyel ni ba’aray ni fan ngak yu Israel: “Nap’an ni gimed ra th’ab e Jordan nga ba’nem nga langgin fare binaw nu Kanaan,
52ma thingar mu tulfed gubin e girdi’ ko fare binaw. Migimed gathay urngin e liyos ni malang nge liyos ni wasay nge urngin e yung i tagil’ e meybil rorad.
53Ngam koled e re binaw nem ngam pired riy, ni bochan e gag e gube pi’ nga pa’med.
54Mu f’othed e binaw u daken e pi ganong nge yuke girdi’ ni rogon nike gagyel ko pow ni ka mu girengiyed, ni gin baga’ e binaw e nge yan ko ken nib ga’ e girdi’ ma gin ba’chig e nge yan ko ke girdi’ nib achig.
55Ma fa’anra dab mu t’ulfed e girdi’ riy nga wuru’, ma pi arorad nra magay e yad ra par ni yad ba matharthar ni bod ban’en nib m’uth nike aw ngalan owchemed fa rachangal u tan p’eywunmed, ma ra ur chamgad ngomed.
56Ere, fa’anra dabmu tulfedrad nga wuru’ fare binaw, ma bay gu gechig nagmed, ni bod rogon e gechig ni kug leamnag ni nge aw ngorad.”
