Numbers 26

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Tomuren fare misilpig me ga’ar SOMOL ngak Moses nge Eleazar ni fak Aron,

²“Mu the’eggew e girdi’ ko tabnaw u ga’ngin yu Israel, ni urngin e pumo’on nike gaman rliw’ e duw rok ngalang nrayag ni nge un ko mael.”

³Ma aram me non Moses nge Eleazar ni prist ngak e girdi’ u lan e tafel’fel’ u Moab u charen e lul’ nu Jordan ni bay yu Jeriko nga barba’ riy nra ga’argow,

⁴“Mu the’eged e girdi’ nike gaman e rliw’ e duw rorad ngalang, bod rogon ni yog SOMOL ni ngan rin’.” Ba’aray fa pi girdi’ nu Israel nra chuwgad ko fare nam nu Egypt:

⁵Fare ganong rok Reuben (Reuben e bin nganni’ e pagel u fak Jakob): e fa yuke girdi’ ni Hanok, Pallu,

⁶Hezron, nge Karmi.

⁷Oren e pumo’on ko yuke girdi’ ney e yad 43,730 u gubin.

⁸Ma pi’in owchen Pallu e Eliab

⁹nge pifak Eliab ni pumo’on ni Nemuel, Dathan, nge Abiram. (Irera’ fagali’nem i Dathan nge Abiram ni mel’eg row ga’ngin yu Israel. Ni kayow e ra tagopluw gow ngak Moses nge Aron miyow un ngak pichonggin Korah ngar tagopluwgad ngak SOMOL.

¹⁰Me mab e but’ nge ful’rad, i Dathan, Abiram, nge Korah. Ku aram e ngiyal’ ni urfiy e nifiy 250 e pumo’on ni pichonggin Korah, me par nike yib madgun ngak e tin kabay e girdi’ nu Israel.

¹¹Machane pi pumo’on ni fak Korah e dan li’rad.)

¹²Fare ganong rok Simeon: e fa yuke girdi’ ni Nemuel, Jamin, Jachin,

¹³Zerah, nge Shaul.

¹⁴Oren e pumo’on ko yuke girdi’ ney e 22,200 u gubin.

¹⁵Fare ganong rok Gad: e fa yuke girdi’ ni Zefon, Haggi, Shuni,

¹⁶Ozni, Eri,

¹⁷Orod nge Areli.

¹⁸Oren e pumo’on ko yuke girdi’ ney e 40,500 u gubin.

¹⁹Fare ganong rok Judah: e fa yuke girdi’ ni Shelah, Perez, Zerah, Hezron, nge Hamul. (L’agruw e pagel u fak Judah, ni Er nge Onan e rm’ow u lan e binaw nu Kanaan.)

²²Oren e pumo’on ko yuke girdi’ ney e 76,500 u gubin.

²³Fare ganong rok Issakar: e fa yuke girdi’ ni Tola, Puah,

²⁴Joshub, nge Shimron.

²⁵Oren e pumo’on ko yuke girdi’ ney e 64,300 u gubin.

²⁶Fare ganong rok Zebulun: e fa yuke girdi’ ni Sered, Elon nge Jahleel.

²⁷Oren e pumo’on ko yuke girdi’ ney e 60,500 u gubin.

²⁸Fa gal pagel ni fak Josef e Manasseh nge Efraim, ni aram fa gal ganong ni Josef e chitamangirow.

²⁹Fare ganong rok Manasseh. I Makir ni be’ ni pagel ni fak Manasseh e ir e chitamngin Gilead, ma yuke girdi’ ni ba’aray e sum e ga’ rorad rok Gilead:

³⁰ni aram fa yuke girdi’ ni lezer, Helek,

³¹Asriel, Shekem,

³²Shemida, nge Hefer.

³³Zelofehad nib mo’on ni fak Hefer e dariy e pumo’on ni fak, ma kemus ni go’ ppin; ni fithingrad e Mahlah, Noah, Hoglah, Milkah, nge Tirzah.

³⁴Oren e pumo’on ko yuke girdi’ ney e 52,700 u gubin.

³⁵Fare ganong rok Efraim: e fa yuke girdi’ ni Shuthelah, Beker, nge Tahan.

³⁶Fare ke girdi’ rok Eran e ra sumgad ko fare ke girdi’ ni Shuthelah.

³⁷Oren e pumo’on ko yuke girdi’ ney e 32,500 u gubin. Yu kaen ney e girdi’ e ra sumgad ku Josef.

³⁸Fare ganong rok Benjamin: e fa yuke girdi’ ni Bela, Ashbel, Ahiram,

³⁹Shefufam, nge Hufam.

⁴⁰Fa yuke girdi’ rok Ard nge Naaman e sum ko fare ke girdi’ rok Bela.

⁴¹Oren e pumo’on ro yuke girdi’ ney e 45,600 u gubin.

⁴²Fare ganong rok Dan: e fare ke girdi’ rok Shuham,

⁴³ni oren e pumo’on riy e 64,400 u gubin.

⁴⁴Fare ganong rok Asher: e fa yuke girdi’ rok Imnah, Ishvi, nge Beriah.

⁴⁵Fa gal ke girdi’ ko Heber nge Malkiel e sum ko fake girdi’ ni Beriah.

⁴⁶I Asher e ba’ be’ ni bpin ni fak ni Serah fithingan.

⁴⁷Ma pumo’on ko yuke girdi’ ney e 53,400 u gubin.

⁴⁸Fare ganong rok Naftali: e fa yuke girdi’ rok Jahzeel, Guni,

⁴⁹Jezer, nge Shillem.

⁵⁰Oren e pumo’on ko yuke girdi’ ney e 45,400 u gubin.

⁵¹Urngin e pumo’on nu Israel u gubin e 601,730.

⁵²Me ga’ar SOMOL ngak Moses,

⁵³“Ngam f’oth e binaw u daken e pi ganong nem, nib m’ag ga’ngin nga urngirad.

⁵⁴Yungi binaw nib ga’ yang e nge fanay e pi ganong nib yo’or girdi’en, ma yungin ba’chig e binaw e nge fanay e pi ganong nib lich girdi’en; ra reb e pi ganong nem ma nge yag ngak e binaw nib m’ag ga’ngin nga urngirad.

⁵⁵Ma ngan tay e f’oth ko yungi binaw nem ni bod urngin yang fithngan fapi ganong ko chitamangirad.

⁵⁶Binaw ni nge milfan ngorad ni ngan f’oth e nge m’ag nga oren e tin nib yo’or e girdi’ riy nge tin nde yo’or.”

⁵⁷Fare ganong ko Levi: e fa yuke girdi’ rok Gershon, Kohath, nge Merari.

⁵⁸Pi’in owcharad e bmu’un e pi tabnaw rok Libni, Hebron, Mahli, Mushi, nge Korah ngay. Ma Kohath e chitamngin Amram,

⁵⁹ni le’engiy reb e bpin ni fak e Levi ni fithingan e Jokebed, nni gargeleg u lan yu Egypt. Me diyennag l’agruw i pagel rok Amram ni Aron nge Moses nge reb e bpin ni Miriam.

⁶⁰Me Aron e aningeg e pagel ni fak ni Nadab, Abihu, Eleazar, nge Ithamar.

⁶¹Me yim’ Nadab nge Abihu ko fangiyal’ nem ni fa’anra pi’ew e maligach ko nifiy nde thothup u p’eowchen SOMOL.

⁶²Ma pumo’on ko Levi ni ta’reb e pul yangren ngalang e yad 23,000 u gubin. Da ni unegrad ko methe’eg ko tin ba’aram e girdi’ nu Israel ni bochan e de yag bang e binaw nu Israel ngorad.

⁶³Irera’ e picha’ ni yoloy Moses nge Eleazar ni prist fithingrad nga babyor u nap’an ni yow be mathe’eg girdi’ u Israel ko fa gi tafel’fel’ u Moab u charen e Lul’ nu Jordan ni bay yu Jeriko nga barba’.

⁶⁴Dariy ta’reb e pumo’on ni pag u gubin e pi’in ni yoloy Moses nge Aron fithingrad e yay ni som’on e mathe’eg ntay u lan e ted ni desert u Sinai.

⁶⁵I yog SOMOL ni yad gubin ni yad ra yim’ u daken e ted, kemus ni Kaleb ni be’ nib pagel ni fak Jefunneh nge Joshua ni be’ nib pagel ni fak Nun e yow ra magey.