Oekyuk 33

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Ma simla inge fahkak inen acn ma mwet Israel aktuktuk we tukun elos fahsr liki acn Egypt ke sruf lalos ye kolyuk lal Moses ac Aaron.

²Moses el simusla inen kais sie acn ma elos tulokunak lohm nuknuk selos we, oana ma LEUM GOD El sapkin.

³Mwet Israel elos som liki Egypt ke len aksingoul limekosr in malem se meet in yac, len se tukun Kufwen Alukela se oemeet. Ye karinginyuk lun LEUM GOD elos illa liki siti Rameses ye mutun mwet Egypt,

⁴su pikin wounse mukul natulos ma LEUM GOD El uniya. LEUM GOD El oru ouinge in akkalemye lah El arulana ku liki god lun acn Egypt.

⁵Mwet Israel som liki acn Rameses ac tulokunak nien aktuktuk lalos Sukkoth.

⁶Nien aktuktuk lalos akluo pa in acn Etham sisken yen mwesis.

⁷Liki acn sac elos folokla nu Pi Hahiroth, kutulap in Baal Zephon, ac aktuktuk apkuran nu Migdol.

⁸Elos mukuila liki Pi Hahiroth ac fahsr sasla in Meoa Srusra nu in acn mwesis lun Shur. Tukun fahsr ke len tolu elos aktuktuk in acn Marah.

⁹Liki acn we elos som nu Elim ac aktuktuk we, mweyen oasr unon in kof singoul luo ac sak palm itngoul we.

¹⁰Elos fahsr liki Elim ac aktuktuk apkuran nu ke Meoa Srusra.

¹¹Acn in aktuktuk se lalos toko pa yen mwesis lun Sin.

¹²Na toko elos aktuktuk Dophkah,

¹³ac toko in acn Alush,

¹⁴ac toko in acn Rephidim, acn se ma wangin kof elos in nim we.

¹⁵Elos mukuiyak liki acn Rephidim ac som aktuktuk in acn mwesis lun Sinai.

¹⁶Elos som liki acn we nu in acn Kibroth Hattaavah.

¹⁷Tok elos som ac aktuktuk in kais sie acn inge: Hazeroth,

¹⁸Rithmah,

¹⁹Rimmon Perez,

²⁰Libnah,

²¹Rissah,

²²Kehelathah,

²³Eol Shepher,

²⁴Haradah,

²⁵Makheloth,

²⁶Tahath,

²⁷Terah,

²⁸Mithkah,

²⁹Hashmonah,

³⁰Moseroth,

³¹Bene Jaakan,

³²Hor Haggidgad,

³³Jotbathah,

³⁴Abronah,

³⁵Ezion Geber,

³⁶acn mwesis lun Zin (pa ingan acn Kadesh),

³⁷ac Eol Hor, sisken na facl Edom.

³⁸Aaron mwet tol el fanyak nu fin mangon Eol Hor, oana ke LEUM GOD El sapkin nu sel, ac el misa we ke len se oemeet in malem se aklimekosr ke yac akangngaul tukun mwet Israel elos illa liki acn Egypt.

³⁹Aaron el yac siofok longoul tolu ke el misa Fineol Hor.

⁴⁰Tokosra lun Arad, su oan layen eir in acn Canaan, el lohngak lah mwet Israel apkuranme.

⁴¹Mwet Israel elos mukuiyak liki Eol Hor ac aktuktuk Zalmonah.

⁴²Na toko elos aktuktuk ke kais sie acn inge: Punon,

⁴³Oboth,

⁴⁴mahnum Abarim in acn Moab,

⁴⁵Dibon Gad,

⁴⁶Almon Diblathaim,

⁴⁷Fineol Abarim, apkuran nu Fineol Nebo,

⁴⁸ac in acn tupasrpasr Moab su oan layen kutulap in Infacl Jordan tulanang Jericho,

⁴⁹inmasrlon Beth Jeshimoth na nwe infahlfal Acacia in acn mwesis lun Moab.

⁵⁰In acn mwesis lun Moab sisken Infacl Jordan tulanang acn Jericho, LEUM GOD El kaskas nu sel Moses ac fahk,

⁵¹“Kaskas nu sin mwet Israel, ac fahk nu selos: Pacl se kowos fahsr alukela Infacl Jordan ac utyak nu in facl Canaan,

⁵²kowos in lusak mwet nukewa we. Kunausla ma sruloala lalos nukewa — ma orekla ke eot ac ma orekla ke osra — wi acn in alu lalos nukewa.

⁵³Sruokya facl sac ac oakwuki we, mweyen nga sot acn we tuh in ma suwos.

⁵⁴Kitalik acn we ke fa, nu sin sruf ac sou lowos nukewa. Sang ipin acn ma yohk nu sin sruf ma yohk, ac ipin acn ma srik nu sin sruf ma srik.

⁵⁵Kowos fin tia lusla mwet nukewa su muta we, na mwet lula uh ac fah arulana aklokoalokye kowos, oana kutkut in atronmotowos, ku oana sak ma oasr otoh kac inpupowos, na tok elos ac foroht lain kowos.

⁵⁶Kowos fin tia luselosla, na nga ac kunauskowosla oana ke nga akoo in kunauselosla.”