1Me yog SOMOL ngak Moses
2ni nge weliy rogon e pin’en ni ba’aray ngak e girdi’ nu Israel. Demturug be’ nib mo’on fa be’ ni bpin nra micheg ni nge mang reb e Nazirite, ni aram e ke pi’ ir ni polo’ ngak SOMOL
3ma dabki unum e wayin nge alkul. Demturug e mit i n’en ni yima unum nni ngongliy ko wom’ngin e grape ma dabi unum, ma ku dabi kay wom’ngin e grape ara raisin.
4N’umngin nap’an ni ga ba Nazirite e dab mu koy ban’en ni yib u ba ke grape, mus nga awochngin nge keru’ wom’ngin e grape ma dab mu koy.
5N’umngin nap’an ni ga be par ni gur reb e Nazirite e thangri dab mu th’ab piyan lolugem ara robem. Ya ga be par u tan fare bugithin ni kan mownag ni gubin ngiyal’ ni kam og nigem kan pi’em ni polo’ ngak SOMOL, ma aram e ngam pag piyan lolugem nge n’uw.
6Piyan lolugem e pow ni kam og nigem ngak Got, ere thangri dab mman nga charen ba yam’ ya ga ra ta’ay, ni mus ko chitamam, ara chitnam, ara walagem ni pumo’on ara walagen ni bpin nike yim’ ma dab mu chugur ngay.
8N’umngin nap’an ni ga ba Nazirite, ma gab tabgul ni fan ngak SOMOL.
9Ma fa’anra piyan lolugem nib tabgul e ta’ay ni bochan e ummoy u charen be’ me yim’ fa’anem nib tomgin, ma thingar mu son ni medlip e rran’ ma ga puy piyan lolugem; ma aram e kag ra sul ngam be’ech.
10Ma rofen ni gaman e meruk fen ngay e ga ra fek l’agruw i arche’ ni dove nge l’agruw i bulogol i yib ngak fare prist ni bay u langan e mab ko fare Tent u p’eowchen SOMOL.
11Ma fare prist e ra pi’ reb fa gali arche’ ni maligach ni fan ko denen ma reb e nge pi’ nib maligach ni mo’oruf, ni nge bangbeng nagem ni ngam machalbog ni bochan e kam math ko yam’. Ma ku rofen nem e ngam be’echnag piyan lolugem
12mu kum og nagem ngak SOMOL bayay ni ngkum par ni ga ba Nazirite. Dab ni mathe’eg ko tin ba’aram e rran som’on, ni bochan piyan lolugem nib tabgul e ta’ay. Ma ngam fek ba saf ni pumo’on ni ta’reb e duw yangren ni fen e maligach ni mthang malfith.
13Nap’an ga ra lebuguy i micheg ni gur reb e Nazirite, ma ba’aray yalen ni ngam rin’. Thangar mman nga langan e mab ko fare Tent
14ngam pi’ ngak SOMOL dalip i gamanman ndariy bochiyang u downgirad nib kireb: ba pifak e saf nib pumo’on nta’reb e duw yangren ni nge mang maligach ni mo’oruf, nge ba fak e saf ni bpin ni ku ta’reb e duw yangren ni nge mang ba maligach ni fan ko denen, nge ba saf ni pumo’on ni nge mang maligach nma gapaseg thilin Got nge girdi’.
15Ma kag ra pi’ ni maligach ba dug i flowa ni kan lith ndariy e is riy: ni bogi lof nib dub’ag ni kan ngongliy ko flour ni kan athkuy e gapgep ni olive ngay nge yochi kek ni kan achey e gapgep ni olive nga daken, nge maligach ni grain nge wayin ni yigagen.
16Ma fare prist e nge pi’ e pin’ey ngak SOMOL ni nge pi’ e maligach ni fan ko denen nge maligach ni mo’oruf.
17Me li’ fare saf ni pumo’on nge pi’ ni maligach ngak SOMOL ni nge gapaseg thilin Got nge girdi’, nib mu’un fare dug i flowa ngay; miki pi’ ni aram e ke ognag fapi maligach ni grain nge wayin.
18Mu langan e mab ko fare Tent e ngam puy gur fare Nazirite piyan lolugem riy ngam tay nga mit fare nifiy ni yibe urfiy fare maligach riy ni nge gapaseg thilin Got nge girdi’.
19Ma nap’an nra n’ag fare raba’ lik’ipon fare saf ni pumo’on, me fek fare prist nge chagiy nga ta’reb e flowa ni lof nge reb fa yochi kek u lan fare dug, nge tay ngalan pa’ fare Nazirite.
20Me migid, e fare prist e nge pi e pin’em nib tow’ath ngak SOMOL; bogi maligach nib tabgul ni fen fare prist, ni kun puthuy ko fare gi ufin u daken ngorngoren nge raba’ i ay fare saf ni pumo’on ni bay ko motochiyel ni f’oth rok fare prist. Ma tomren e binem, me unum fare Nazirite e wayin.
21Irera’ e pi gam’ing ni fan ngak e pi Nazirite; machane fa’anra yog reb e Nazirite ba maligach nra pi’, ndariy u lan e motochiyel ko tin nge pi’ nrogon nike micheg, ma thangri pi’ fare maligach ni bod rogon nike ognag nra pi’.
22Me yog SOMOL ngak Moses
23ni nge non ngak Aron nge pifak ni pumo’on ni ngu’ur yibiliyed piyu Israel ni ba’aray rogon:
24I SOMOL e ngi i fal’eg wa’athmed ma be ayuwegmed;
25I SOMOL e ngi i gol ngomed ma be runguymed;
26I SOMOL e ngi i falan’ ngomed ma be pi’ e gapas nga laniyan’med.
27Aray rogon ni ngar yibiliyed piyu Israel nga fithingag, mu gu fal’eg wa’athrad.
