Mark 5:9-30

⁹Jesus idoak ipoa, “Ia oadoamwen?” A woallo japoang pwehng ih, “Oadoaioa ioar ‘Karej’ pwa kamai min dir!”

¹⁰Ih ken engdehnki Jesus en joah kahujjang ngen jaussok nehn japwahu.

¹¹A ipen wijahu, pwihnin pij oau minmineo, mwingmwinge in imwin dol oau.

¹²Ngen naunahk ken poakihda ipen Jesus en kadarla irai apel mweidoahng irai en inla dilloang nehn pijjok.

¹³Doari Jesus ken mweidoahng. Ngen jaussok ken injang ipen woallo, wud inla dilloang nehn pijjok. Dapwa pij riekid, kijoudihla duhla nehn lehu.

¹⁴Sohn apwali pijjok kaula nehn kahnihmmwo, nehn koaujoankan likin kahnihmmwo, pwehng armaj kan da wiawi. Doahr ihr ken inla kapang dahkij ma wiawi.

¹⁵Nehn ahr lel wijahu ma Jesus mine, irai liskihla ahr kapangda woalwa ma kin dirin ngen jaus mwouwoa, ne mwindi wijahu meleileidi, mine nehn likkoau mwehu, mwomwen armaj mwehmwehu men. Irai ken mijikda.

¹⁶A irai ok ma kadehdehki mijarai manmanno, irai pwehng ihr da ma wiawihoang woallo ma dirin ngen jaus apel mwomwen pijjok.

¹⁷Irai ken poakihda Jesus en injang nehn japwaraiho.

¹⁸Nehn en Jesus doaudahng pohn pohsso minno ma ngen jaus dilingla poaki ih pwehng ih, “Mweidoahng ngoahi pwa ngoahi en pwilihwe koawoa!”

¹⁹A Jesus johpwa mweidoahng, ih pwehng ih, “Inla in umwoammwo, ipen oamw peneineihok, pwehng irai doahr manman koalik ma Koaunno wiahng koawoa, apel doahr ah kalahngan oang koawoa.”

²⁰Woallo ken inlahr pwahjili nehn wein Decapolis manman koalikko ma Jesus wiahng ih; irai ken inenin pwuriamweikihla.

²¹Jesus pwuroahng pwurla oaloap lehu. Pokon koalik oau aluhpene pidekihpene ih in poahrinjeddo.

²²A koaunin jinakoke men, oadoa Jairus, rukdihoang in pwoalkoa,

²³engdehnla nehn ah poakpoak, pwa “Maing, noai jerpein siksik kij nimwennoar mehdi. Menlau inla kihdahng poahmmwen pohn ih pwa en sihkeida apel kak mour.”

²⁴Jesus uhda pwilihla joumajjo. A pokon koalikko pel kahujla. Wija ohroj nehn allo ken koaisla.

²⁵Lihmen pel pwili mine wijahu, ma anki johmwehuin insa pwilpwil oaroain johnpar eijek riau.

²⁶Ih ken roaproapoan mour ipen sohnwini dir, doadoahkkihla nah mwani kan ohroj. Apwen johpwa kaspoa, pwa pwen naunahla kahuka.

²⁷Nehn en liho rongda doahr Jesus jang ipen armaj kan, ih ken sohlahng likinjarkin, pukkoangdi ah likkoauwo,

²⁸pwehng pein ih, “Ma pwen ah likkoauohr ngoahi pukkoang, ngoahi nen sihkeida.”

²⁹Doari, ih ken pukkoang en Jesus likkoauwo, a nehn anjoauwohr koarkoarin insahu enngengla; liho ken poahmda jang nehn palwoaroa pwa ih ne sihkeidahjang ah johmwehuwo.

³⁰Nehn anjoauwohr Jesus poahmda sihkei kij injang ipoa, ih ken jipwjipweljili nehn pokonno, pwehng ihr “Inje ma pukkoang oai likkoauwe?”