Maka 5:9-30

⁹Kutupa Yesuma꞉ ipiki pa꞉ta꞉ lota꞉ pitolo alota꞉ Naka꞉ bikita꞉ epi ya꞉ka꞉ta꞉pe laa ipikana꞉ma꞉ alota꞉ Yaka bikita꞉ Eleke elekee laata꞉ Nikita꞉ wopu eleke eleke halomeke handa loa꞉me leekeme.

¹⁰Kutupa ipikana꞉ma꞉ Yesu pa꞉ta꞉ Mo hoke temokomanu do kenke mina꞉pa꞉lao na pena꞉ laa honke honke wopu leekeme.

¹¹Ma꞉na꞉ titi peiyene tea꞉na꞉ ne nalo haena꞉

¹²mo hoke temoko manuma꞉ Yesu pa꞉ta꞉ honke lemekeeki dupa. Ma꞉na꞉ titina꞉ weleke pa꞉ta꞉ pitulu pomono lae lemekeme.

¹³Koto ekina꞉ Yesuma꞉ pitulu pena꞉ leekeme. Mo hoke temoko manuma꞉ mo hali mina꞉pa꞉lao ma꞉na꞉ titina꞉ weleke pa꞉ta꞉ pitulu pemekeme. Koto ma꞉na꞉ titita꞉ 2 daoseni tupa꞉ mo peiyene seseme̱le̱na꞉ a̱i̱ya hola꞉pa꞉niao ikali pa꞉ta꞉ puaata꞉ ikali naa honki lemekeme.

¹⁴Koto ekina꞉ mo ma꞉na꞉titi handeteke haemeke haliwekima꞉ pindipa puaata꞉ daoni nane haemeke wanda꞉hali topu da pa꞉ta꞉manu haemeke wanda꞉hali make la꞉tiki pomimikita꞉ wanda꞉halima꞉ hande pieke ekimanu handuluekema꞉ pemekeme.

¹⁵Kutupa Yesu pa꞉ta꞉ a꞉paata꞉ amba꞉ hande weleke pa꞉ta꞉ hoke temokomanu pitieke hali koto pa꞉ta꞉ dau yama epeke hone wia pitiekeeki handemeke handaa paala꞉ma꞉ homemekeme.

¹⁶Kutupa amba꞉ hande hoke temokomanu pitieke hali pa꞉ta꞉ pieke ekimanu make mo ma꞉na꞉manu pa꞉ta꞉ pieke ekimanu make handemeke wanda꞉halima꞉ta꞉ la hale hale pimikime.

¹⁷Koto ekina꞉ koto kone Yesu ika꞉ kenke mina꞉pa꞉lao pena꞉yeke Pu pu lemekeme.

¹⁸Hande kawasona꞉ kone pitulu pulu haena꞉ amba꞉ hoke temokomanu pitieke halima꞉ Yesu pa꞉ta꞉ Hapana꞉e laa pi wopu leekeme.

¹⁹Koto leekepate Yesuma꞉ na epena꞉ laaka꞉na꞉ta꞉ ipiki pa꞉ta꞉ alota꞉ Naka꞉ Tekehalima꞉ neke pa꞉ta꞉ peaasa꞉ ekimanu make neke pa꞉ta꞉ a꞉ta꞉ma꞉ homa꞉la꞉ ekimanu make naka꞉ yankeketiti pa꞉ta꞉ pua lapeke leekeme.

²⁰Mo halima꞉ Daoni kiki yaapo haemeke kenke nane puaata꞉ Yesuma꞉ peaasa꞉ ekimanu waloendi piekeme. Kutupa wanda꞉hali paeyaoma꞉ opuaata꞉ penkilipa꞉tia pomimikime.

²¹Yesu mo kawasona꞉ pita mone tea꞉na꞉ paa la꞉ka꞉la peeketa꞉ wanda꞉hali wopu ipiki pa꞉ta꞉ a꞉pa mombelemekeme. Ipikita꞉ tunkulu pa ula꞉ ikali tea꞉na꞉ haena꞉ mombelemekeme.

²²Pi hotu haemeke da you hali ma꞉nda꞉ Diaitisima꞉ a꞉pa Yesuna꞉ anke teke pa꞉ta꞉ panda꞉puniao honke alo hata꞉ alota꞉

²³Ya wandikisiki ota꞉ homuluekema꞉ taapolo pila꞉me leekeme. Tiao haena꞉yeke nakana꞉ma꞉ a꞉pa naka꞉ kikima꞉ ipiki wataapeke leekeme.

²⁴Kutupa Yesu Diaitusi yaapo pepekeme. Wanda꞉hali wopu Yesu ame̱le̱ pulu hata꞉ pendila pendila putia pemekeme.

²⁵Koto pa꞉ta꞉ wanda꞉ ma꞉nda꞉ hayekeme. Mo wanda꞉ta꞉ bapi 12 tukiki pa꞉ta꞉ hata꞉ we yopu hayekeme.

²⁶Dokeda titima꞉ taapemeke ekima꞉ tanda halo haemekema꞉ ipika꞉ mani paeyao pa batiki piekepate we na tunkuliki pa daeyatiki piekeme.

²⁷Wanda꞉halima꞉ Yesu pa꞉ta꞉ lemeke pi mo wanda꞉ma꞉ opuaata꞉ wanda꞉hali anka꞉lopuna꞉ pua Yesuna꞉ hoki nane puaata꞉ ipika꞉ dau wataeyekeme.

²⁸Ipika꞉ honema꞉ta꞉ mo ipika꞉ dau wataoka꞉na꞉ta꞉ I̱ epeaalieke hone wiekeme.

²⁹Kutupa koto kone we yopu hayekeeki tunkula ipika꞉ honema꞉ hone witolo hata꞉ta꞉ hande yeni paeya꞉me. Ameta꞉ tiaasome hone wiekeme.

³⁰Yesuma꞉ ipika꞉ honema꞉ kone hone witolo hata꞉ ya wele pita꞉la꞉eki mandane ekita꞉ pea꞉ka꞉ta꞉me hone wiekeme. Kutupa koto kone mo wanda꞉hali pa꞉ta꞉ la꞉ka꞉la hata꞉ alota꞉ Epina꞉ kikima꞉ ya dau wataeya꞉pe leekeme.