Mak 5:9-30

⁹Tama Jisasgo agabolo hanalu wali, “Nago nogi dewe?” Tama agai te po wai, “Ena nogi Ami dao. Magi baso meni, da hani genuai hauwa dao.”

¹⁰Tama agai Jisasbolo i bomo elama weyu, Jisasgo te dwai haubo noma bidi dabe te moni tǫde munu me sela sągio po widu geai.

¹¹Te genuai kibu hani sibi dabe augwali te dwasianu bulu du pąde nai tuduladu bidaludai.

¹²Tama te dwai haubo noma bidi dabe augwaligo te bomonama i weyu, Jisasbolo te po wali, “Nago da te kibu dabe tomoba tagala palao,” te po wai.

¹³Tama Jisasgo augwali teba pao olama usu da wai. Tama te dwai haubo noma bidi dabe augwaligo te bidi taga peyu, tama augwali te kibu dabe tomoba bula sigi pali. Tama te kibu hani dabe bomonama mu udada pelama, tama te dwai bulu sau pado me deliba samonani. Te tigidali kibu umabo mu te bidi sese hauwa 2,000 dao. Tama augwali te sigi ąįba tulaluama, tama augwali te wę tulama poma peyu isila silai dao.

¹⁴Te kibu tononaluali bidi wi pelama, tama augwaligo po te hanuba me tede elalubo bulu dabeba sela pali. Tama te we bidi augwali te sę ebo suagasali.

¹⁵Augwali te Jisas bidiboba sabolama, tama augwaligo suali, te dwai haubo noma bidi hauwa polobadu agade bidali bidi, te bidi Jisas dali bidibo augwaligo suali. Megi da, aga ugwa gudama, tama aga homu kolesaga peda pelama, tama aga bugagia dualaludali. Tama te we bidi augwaligo te sulama, tama augwali wi yai.

¹⁶Tama te bidi dabe te Jisasgo yali sę suali bage, augwaligo te hanudu tamadi asali we bidibolo te bidide pedalali sę po pususu pali, polobadu te dwai haubo noma bidi agade bidai. Tama augwaligo te kibu dabede yali sę po me pusali.

¹⁷Tama tibaso, te we bidigo bomonama weyu, te Jisas augwaligo bulude bidibo tagalama, te gasaba pao wai.

¹⁸Tialima, Jisas te gebaba holobadi, tama polobadu te dwai haubo noma bidi sela sąwani bidi, agai te tiwai po Jisasba hanalu wali, “Ena nage dali paio,” wali.

¹⁹Tiali goli Jisasgo hagela homu yali. Agai agabolo te po wali, “Nage naga beba me naga deli hani bidibo madiba pao. Tama nago te tigidali sę Genuai Bidigo nagede yali sę po pusugi peyu, tama agai nage homu dene eyu tau sali po me pusao,” Jisasgo te po wai.

²⁰Tama tibaso te bidi pelama, tama agai te sę yali po te hanu nogo si elalubo tǫ pedai badu te Jisasgo agade yali sę po tigidali pususu bilali. Tama tigidali we bidi augwali homu hauwa eyu noma sali.

²¹Te Jisas te gebadu peyu, te sigi ąį ma nogeali. Aga te wę u badu pedai badu tugi pali, tama genuai we bidi hani augwali aselama agaba sisinagasali. Tama Jisas aga te sigi ąį sane pąde bidali.

²²Te Juda dabego bomai po odobo lotu be tonalubo tobolu bidi me deli asali, aga nogi te Jairus. Agai te Jisas sulama, tama aga sągą pąba basi gulama kidu sugunagasali.

²³Tama agai bomonama agabolo te tiwai po hanalu wali, “Te eno dwasianu wegi te pąde isabo homu yai. Nago agaba nogo muagaselama, tama aga usu ma igulama bidimainogo obao,” te bidi Jairusgo te po wai.

²⁴Tama Jisas aga dali hodobo pali. Tama genuai we bidi hani augwali aga wali pali, tama aga pabo madi te augwali mu pena sali.

²⁵Tama we me deli bididuali, tama aga tigide kaneme sesemane sogo idubadi, tama te kibu be nogo si olama sągągo si bidai.

²⁶Te hauwa dokta bidigo te hauwa sogo agaba dene madubo sę iduali, tama te wego aga mone tigidali te augwaliba mena silali. Tiali goli agai gasi te dwasianu usu me ebeo. Menio.

²⁷Te wego te Jisasgo ebo sę po odai. Tama aga aselama, tama aga te genuai we bidi hauwa bidalubo tomode bididuai. Aga te Jisas pabo wali nosali asidu, tama agai ugwa sabi badu diąna asiduai.

²⁸Agai te tiwai homu eyu te po wali, ‘Te eno nogo agai ugwa sabi badu naga diąbaso da, te ena usu ma yaibao,’ agai te homu yai.

²⁹Tama te deli sogo naga, te aga kaneme yali te togwa siyu tama wa sali, tama aga tigide te gasi pela silali homu yai.

³⁰Tama polo Jisasgo koneani, te meba bomo agade taga pabo koneani. Tama tibaso aga begelama, te we bidi dabebolo te po wali, “Dego eno ugwaba nogogo diąyaniwe?”