Mark 11

1

2

3

4

5

6

7

8

9

10

11

12

13

14

15

16

¹Nehn arai koaroanlahng Jerusalem in kahnihmw en Bethphage apel Bethany, irai lel Nahnahn Olip. Jesus kadarla nah sohnpadahk roahmen,

²pwehng ara, “Kamwa alwe nehn koujapw oauwen mijen kamwa. Nehn amwa pirin dilda wijahu, kamwa pirin pispis kapangda ejel pwulopwul men ma pirpirapir ma kahjikkoar armaj men dakoa. Kamwa lapwadda ukdo me.

³A ma emen idoak ipamwa, da kamwa wihwiahng mahnnen a kamwa japoang pwa Koaunno ioar anahne, a pirin pispisin kajpalihdo.”

⁴Ara ken inla kapangda ejel pwulopwul men a pirapir in wanihmw in umw oau nehn allo. Nehn ara lapwadda,

⁵armaj pwi mine wijahu idoak ipara, “Da kamwa wihwia? Mihnda kamwa lapwadda ejel siksik menen?”

⁶Ara japoang irai doahr ma Jesus pwehng ara. Armajjok ken mweidoahng ara.

⁷Ara wahdohng ejel siksikko ipen Jesus. Arai piroakihdihoang likkoau puwoa, Jesus ken doauda pohn ejello.

⁸Pokonno piroakihdi ahr likkoauwok nehn allo. A epwi poaloahdi rahnsuhkoa pwi pel inapoahkihda nehn allo.

⁹Irai ohroj ma alu mijoa apel irai ok ma kahujdo pokonno rahrahuki koaul in kaping pase: “Kisai kapnga Koahs! Koahs en kapaiahda ih ma indoa in oadoan Koaunno.

¹⁰Koahs en kapaiahda wein jamasai David ma pirin indoa. Kaping oang Koahs.”

¹¹Jesus dilda nehn Jerusalem, inlahng nehn Umw Joarwiho, kapkapangjili meohroj loaloa. A pwa ne joausikpene, ih ken inlahng Bethany pwilihki sohnpadahk eijek roahmenno.

¹²Rehnwa mwerin, nehn arai allaluhla jang Bethany, Jesus ken mwakohkohda.

¹³Ih kapangda suhkoa pik pas jang wija doh ma dir soah; ih inla pwa en kapang ma joh wah ih nen kapangda. Nehn ah lel wijahu ih johpwa kapangda wah, pwa soahr doari; pwa jaudi anjoau in roak.

¹⁴Ih ken pwehng suhkoahu, “Joh armaj men pirin pwuroahng kang wehn pik jang ipoamw.” Nah sohnpadahkkok rong sikesik oauwe.

¹⁵Nehn irai lel Jerusalem, Jesus inla nehn Umw Joarwiho, sapda kajroahjang loaloa irai ohroj ma noaski apel dupdupuk koapwoa wijahu. Ih ukuddi en john kawiliali mwanihok ahr sehpillok apel en johnnoaski mwureiok ahr mihn mwindi kan.

¹⁶Ih pel johla mweidoahng armaj en wahjili mehkij nehn Umw Joarwiho.

¹⁷Ih ken pwehng armajjok, “Ne insingdi nehn Puk Joarwi, Koahs pwa, ‘Umwoaie pirin adanki umwen kapkap ipen sohn jampah ohroj.’ A kamwai wiahkihla dohn johnpirap kan.”

¹⁸Jamwrou laplappok apel johnpadahk in Kojonneddok rongda me; irai sapda lemleme doahr ahr pirin kojukdi Jesus; pwa irai perki koalik, pwa armaj ohroj kajampwalki dauluhl ah padahk.

¹⁹Injoausik penehn rehnno, Jesus apel nah sohnpadahkkok diljang nehn kahnihmmwo.

²⁰Pwohrdahng rehnno inminjoang, nehn irai allaluhla nehn allo, irai kapangda suhkoa pikko ne mengla jang in sapin lel in koadkoa.

²¹Peter samanda da me ne wiawihlahu, ih ken pwehng Jesus, “Maing, kanah kapang suhkoa pikke ma koawoa kariahla, ne mengla.”

²²Jesus japoang irai pwa, “Kamwai pwojon Koahs!

²³Ngoahi pwehng kamwai in mehlel, ma emen ma pirin pwehng dol oauwe, ‘Sohjang me kasoahdihla pein koawoa nehn jeddo,’ a johpwa peikajal kij mine nehn kapehdin, a pwojon da ih pwa, doari, dahioau ih pwahla pirin pwoaida.

²⁴Ioar me ngoahi nimen kamwai en kidal pwa me ohroj ma kamwai pirin poaki nehn amwai kapkap kan, kamwai pwojon pwa kamwai nen oaloa, ih ken pwoaida oang kamwai.

²⁵Doari, nehn amwai pirin uhda kapkap, kamwai mahkoahng japwung ohroj ma armaj men wiahng kamwai pwa jamamwaiho nehnloannge en pel mahkoahng kamwai dipamwaihok.

²⁶Pwa ma kamwai johpwa mahkoahng emen, Jamamwaiho ma mine nehnloannge johpwa pirin mahkoahng kamwai dipamwaihok.”

²⁷Irai pwurlahng Jerusalem. Nehn en Jesus allaluhjili nehn Umw Joarwiho, jamwrou laplap apel johnpadahk in Kojonneddo pwi apel joumaj pwi indoa,

²⁸pwehng ih, “Manmanin inje koawoa wihwiahki joang pwiai? Inje kioang koawoa manman oauwe?”

²⁹Jesus japoang irai, pwa, “Ngoahi pirin wiahng kamwai peidek oau. Doari, ma kamwai japoang ngoahi, ngoahi pirin wud pwehng kamwai manman en inje ma ngoahi wihwiahki mehpwiai.

³⁰Kamwai pwehng ngoahi, en John ah manman in poapdaij, sapjang ipen Koahs ke jang ipen armaj?”

³¹Irai sapda akmaipene nehn pwungarai, pwahpwahpwa, “Ma kisai pwa, ‘sapjang ipen Koahs’, ih pirin pwa, ‘A da kamwai joah kamehlele ki John?’

³²A ma kisai pwa sapjang armaj…” (Irai mijik armaj kan, pwa ohroj kin wiahki John johkohp mehlel men.)

³³Irai ken japoang Jesus, pwehng, “Kamai jehjoa.” Jesus ken pwehng irai, “Doari, ngoahi pel jehpirin pwehng kamwai manmanin inje ma ngoahi wihwiahki mehpwiai.”