MARKUS 5:9-30

⁹Dhala Yesus ki doṯ a’di gway mo mmo/o gwo mo ki: /E yuḵu gway kaja mo? A’di ki thoḵ gwo mo ki: Gway pem yuḵu Karis mo haali/ aman ’kona ka ris mo be.

¹⁰Dhali a’di ki doṯ a’di gwo ka daran du mo mmohash uni ka pije/ ’peni bampa/ mo be.

¹¹Dhala dhana waambuhany ḵuthar uni shwakin mo e ’bambala wosh mo be.

¹²Dhali uni doṯki a’di bway mo mmo/o gwo mo ki: Hashki aman mo e bwaŋ ḵuthar mo ma. Dhalki aman ciḵa e uni mo.

¹³Wakan a’di ki dhal uni bway mo mmo/ii mo be. Dhala rum thus kun nyo/on p̱u’dkin ka pije/ mo dhali cic̱ mo e bwaŋ ḵuthar mo. Dhala dhana buhany ḵuthar deŋkunu e ka alaap̱i su/ mo, mmosokina uni ka luŋgu’b eya gap̱ yi’deŋ ’kulga/ mo e bwam yi’de/ mo dhali uni loskina yi’de/ mo be.

¹⁴Dhali imanhil ḵuthar uni sokin mo dhali ṯor gwo e ’peŋkuman bampa/ mo dhali e pa ’baar mo. Dhali ’kwani p̱u’dkin mo mmop̱ar a’di e mo a’di jin miiki’d mo be.

¹⁵Dhali uni p̱u’dkina Yesus mo dhali uni ki p̱ar wathi/ jin bu’thkin ma ruma ’cesh e mo mmoc̱a’b mo ki burrinye/ i is mo dhali ka dum piti jin ’boro’d mo be dhali wathi/ jin taki’d ga ruma ’cesh ka ris mo tani dhali uni ḵo/ki a’di mo be.

¹⁶Dhali uni gwansan kun mishki a’di mo tani uni ṯorki gwo mo gom a’di jin miikunu mo gom wathi/ jin bu’th ma ruma ’cesh mo dhali gwo gom ḵuthar mo.

¹⁷Dhali uni ṯelki mii ’pen mo mmoyuḵa Yesus mo mmoya mo ’peni mom buni mo be.

¹⁸Dhali me’d jin jithirkina a’di mo e bwam ma ḵur mo tani wathi/ jin bu’thkin ma ruma ’cesh a’di doṯki a’di ’twa/ mo ki a’di midi ’taki nyaḵ di ki a’di mo be.

¹⁹Hila Yesus ushki’d mo dhali o a’di gwo mo ki: Yaku/ bway pa mo e imugum pini mo ma dhali ṯor uni gwo gom to jin miikina Tap̱a gom /e mo dhali gom momiimii jin miikunu ap̱o/ /e mo be.

²⁰Dhali a’di yaki’d ka pije/ mo dhali ṯel mii ’pen mo mmoṯor gwo eya tente/ e Bampa/ gi Pan Deḵap̱olis mo gom dhan to jin miikin ma Yesus gom a’di mo, dhali aris ’kwani ’baar mo merkin mo be.

²¹Dhali ka Yesus ’ciṯẖki’da gap̱ doḵ/e eya ḵur ki ’bana kamu/ mo tani awaambuhany ’kwani caaca tulki isi a’di mo. Dhali a’di diki’d e shemen ma gap̱ ma al mo.

²²Dhali yan’ko’d tap̱aŋ kamu/ gi gu’b gi montul is pu’dki’d mo, a’di jin yuḵkunu gway ka Yaa/irus mo. Dhali ki a’di p̱arki a’di e mo tani a’di biṯki’da ’ceshi sho’k piti mo be.

²³Dhali mmoŋap̱ a’di mo mmo/o gwo mo ki: Ari ’bwa/m pem a’di ’ba’thki’d mo mmomuri wu mo. Yayu/ mo ma dhali kar me’d pini ap̱owa yim mo. Wakan ka yim mina isi ’bor mo dhali di ki e mo be.

²⁴Dhali a’di yaki’d mo nyaḵki a’di mo. Dhala dhana waambuhany ’kwani caaca baṯẖki a’di mo dhali uni ki ’kam a’di ki deḵ mo.

²⁵Dhali a’boma kamu/ diki’d si’da/ mo, a’di jin guskin ma bas ki yil ’kume’d i’ce’dka su/ mo be.

²⁶Dhali a’di ’koshkina is ka nyor kagahara mo gom mii jin yakina a’di i ihakiim ka ris mo. Dhali a’di ki ’baara ris to ’baar mo kun takina a’di mo be dhali isa kamu/ yisa ’borki’da, hili isa nyor ’curki ’pen ki shi/ mo kagahara mo be.

²⁷Dhali ayim ciḵki gwo kun okunu goma Yesus mo dhali a’di p̱u’dki’di ’ko’di a’di mo e bwaman ma waambuhany ’kwani mo dhali ta a’di burrinyem piti is ki me’d mo.

²⁸Haali/ ayim ki o gwo mo ki: Waḵki/ aha/ mina ’taki ta isi burrinyem piti is ki me’d mo tani aha/ mina isi ’bor mo be.

²⁹Dhali ki jahanne/ abas jin guski a’di daḵki’d mo, dhali ayim mishki’d ki is piti mo ka yim wac̱kunu mo ’peni ’ba’th jin ’koshki a’di mo be.

³⁰Dhala Yesus nyiṯẖki’d ki is piti ki mom’bi’th yaki’d ’peni a’di mo dhali ki jahanne/ a’di ki ṯuka bor mo e bwaman ma waambuhany ’kwani mo dhali o gwo mo ki: Kaja ta aha/ burrinye/ is ki me’d mo?