1Jesus padahk oang irai in karajraj, “Armaj men koadoahkoahda ah mwoaswelin wain oau; ih ken kelihpene apel weirda dohien ungudek wain oau, apel kouda wijahn iroir oau. Ih ken kioang joumwoas pwi pwa irai en kohwahki oang ih. Ih ken jeiloaklahng nehn japw doh oau.
2Oaroh, anjoau in roak ih kadarla ladu men ipen joumwoassok pwa en oaloahjang irai ah pwaij jang nehn mwoaswello.
3Joumwoassok koldi laduhwo, poki oaroh kadarla kaip.
4Ih pel kadarlahng joumwoassok emen ladu. Irai pel pokihjili apel koauwehla moange kajarohdi ih.
5Ih pel kadarla emen, irai oaloahr kojukdi. Armaj dir pel koadoaddoarla mwerin, irai pel diar joangoan apwallohr: epwi pwen pokpokkoar, a epwi kojkojdi.
6Doari, woal emen oar luhwoa ih kak kadarla, ioar nah jermwein iehrojjo ma ih inenin kajampwalki. Ih ken kadarla keiou mwuhr, ih pwa, ‘Ngoahi uhdahn koapwoarpwoarki pwa irai pirin woaunki noai jermweinno.’
7Joumwoassok ken pwahpene nehn pwungarai, ‘Ioar jerihn johjo wa me. Kamwai indoa, kisai kojukdi, pwa kisai en ankihla mwoaswelle.’
8Irai koldihoar jermweinno, kojukdi, kejpwihjang nehn mwoaswelin wainno.”
9Jesus ken idoak, “Doari, da joumaj en mwoaswelin wainno pirin wia? Ih pirin inla kojukdi joumwoassok apel kihoang epwi joumwoas sohrohr mwoaswello pwa irai en koadoahkoa apel kohwahki oang ih.
10Kamwai johkin wadek lal oauwe nehn Puk Joarwi? ‘Sakai ma johnkou umw kan ne kerpwihla, wud wiahla sakain pwukoakoaimw
11KOAUNNO ma wiahda me; mehkij ma kapwuriamwei mehlel oang kisai.’”
12Koaunin mihn Jew-ok ken jong en joalihdi Jesus; pwa irai kidal pwa ih kin pwahpwahpwahki irai karajraj pase. A pwa irai mijik pokon in armajjok, irai ken okdekla inla jang.
13Pharisee pwi apel sohn nihn Herod pwihnno kadarekdohng ipen Jesus pwa irai en lidipihki joangoan peidek pwi.
14Doari, nehn ahr leldo, irai pwehng ih, “Maing Johnpadahk, kamai kidal pwa woal poadidi men koawoa, ma johkin kasohrohri joangjoangoan armaj; pwa koawoa kin padahkihoang armaj doahroar en Koahs koajoandi in mehlel. Doari, da oamw lamlam oang irair oauwe: pwung oang asai kojonned kan, kisai en nohpweiki mwani oang nahmwarki en Rome, ke joah? Da kisai pirin wia? Kisain kihda daksis, ke joah?”
15Doari, nehn ah kidal uhwen ahr mwalaun, Jesus pwehng irai, “Da kamwai indoahng lidipihki ngoahi? Kajalehdohng ngoahi mwani silper en, pwa ngoahi en kapang.”
16Irai ken kajalehioang mwani silper oau; ih ken idoak oang irai, “Kilelin inje apel oadoan inje me?” Irai pwehng ih, “Nahmwarki Caesar.”
17Doari Jesus ken pwa, “Doari, mwehu; kamwai kioang Caesar mehkan ma uhdahn en Caesar, a oang Koahs mehkan ma uhdahn en Koahs.” Irai ken pwuriamweikihla pajpoang oauwe.
18Sadducee pwi pwokdohng ipen Jesus. (Ioar irai ma kin pwa armaj jehpirin iejda mwerin mehdi.)
19Irai idoak ipen Jesus pwa, “Maing Johnpadahk, Moses koajnehdi oang kisai nehn Pukin Kojonned kan pwa ma woal men pirin mehdi jang pahioa a joh nihra, a rien woallo en wud painkihla liohdiho pwa en wiahda kadaudokin riahu ma mehdi.
20Doari pwihnin riari oau mine, irai woal ijimen. Woal koalikko iparai painkihla lihmen oaroh mehdihjang joh nihra jeri.
21Karoahmenno pel painkihla liho oaroh pel mehdi jang joh nihra jeri. Pel doahrwahr wiawihoang kajilmenno.
22Doari, riari ijimenno ohroj painkihda liho, ohroj mehdi joh nihrai jeri. Inlahroh liho pel mehdi.
23Doari nehn anjoauwo ma armaj mehdi kan ohroj pirin mourda, nehn rehn in iejda, inje in irai ijimenno ma liho pirin painki?”
24Jesus japoang irai, pwa, “Kamwai inenin japwung! Kamwai kidal pwada? Pwa kamwai johpwa woahwoahki lalin Puk Joarwi ke manman in Koahs.
25Pwa nehn armaj mehdi kan ahr pirin iejda, irai pirin doahroar sohnloang in nehnloannge kan, woal apel li johla pirin pwoapwoaud.
26Doari, doahroar iejdahn min mehdi kan, kamwai johpwa wadek nehn Pukin Moses doahroar sikesikin Koahs ah pwokkoang jang nehn suhkoa siksikko ma umpwumpwul? Nehn iroahu Koahs pwehng Moses, ‘Ngoahi ma Koahs in Abraham, Koahs in Isaac, apel Koahs in Jacob.’
27Doari, me woahwoahki ma ih Koahs in armaj mour kan, a jaudi Koahs in armaj mehdi kan. Ioar ma kamwai inenin japwungki koalik.”
28Johnpadahk in Kojonneddo men pwili mine wijahu, rongrongrong lal pwiai. Ih ken pwuriamweikihla mehlel pwungin en Jesus japoangekkok. Ioar ih ken sohlahng ipen Jesus ki peidek oau, “Maing, kojonned dahioau ma keiou kajampwal nehn kojonned ohroj?”
29Jesus japoang ih, “Ioar kojonned wa ma keiou kajampwal nehn kojonned kan ioar: ‘Rong, koawoa Israel! Koaunno, asai Koahs, ioar ih ma Koaun wahr doari.
30Doari, koawoa uhdahn pirin ipwilki Koaunno, oamw Koahs, nehn kapehdimwen unjek, ngenimwen unjek, oamw lamlam unjek, apel oamw sihkei unjek.’
31A kariau, doahr me: ‘Koawoa pirin ipwilki mihn impoamw doahroar oamw ipwilki pein koawoa.’ Joh oau kojonned mine ma kajampwal jang mehpwiai.”
32Johnpadahk in Kojonneddo pwehng Jesus, “Mehlel ipoamw, Johnpadahk! Pwung da koawoa pwa: pwa Koaunnohr ma Koahs, joh pel emen.
33Armaj uhdahn pirin ipwilki Koahs nehn kapehdin unjek, ah lamlam ohroj unjek, apel ah sihkei unjek; apel ipwilki mihn impoa doahr ah kin ipwilki pein ih. Kapwaiahda kojonned riau pwiai mwehujang dauluhl asai pirin meiroangkihoang Koahs mahn pohn pei joarwi kan apel wia joangoan meiroang sohrohr kan.”
34Nehn en Jesus kapang doahr pwungin pajpoang oauwe, ih ken pwehng woallo, “Koawoa johpwa dohjang Wein Koahs.” Mwerin me johla armaj idoak mehkij.
35Nehn en Jesus padpadahk nehn Umw Joarwiho, ih pwa, “Da johnpadahk in Kojonneddo kan kin pwehngkihoang kamwai pwa Messiah pirin kijehn kadaudok en David?
36Pwa Ngen Joarwi ne audohkihda David pwa en pwahda lal oauwe: ‘Koaunno pwehng oai koaun: Koawoa en mwindi oang in loapmoaun in ngoahi, Oaroh ngoahi kihdihoang oamw imwinsihsi kan pehn pwoalkoamwen kan.’
37“Doari, ma pein David kahdanki Ih ‘oai Koaun’, a imdoahr Messiah en kak wia kijehn kadaudokin?” Pokon koalik oau kin rongrongrong en Jesus padahk kan in peren.
38Nehn ah pel padahk oang irai, ih pwa, “Kamwai kalkehjang kamwai johnpadahk in Kojonned kan ma kin mwehuki allaluhjili nehn likkoau roairoai apel kin mwehuki armaj en rahnmwahuwi irai nehn pokon kan.
39Apel kin pilda dohiarai lampahnsamw nehn jinakoke kan, apel kin mwehuki mwindi oh in mijen sehpil kan nehn kamdipw kan.
40Ioar joangoan armaj pwiai ma kin doapwoahjang koanngoan umwen liohdi kan, apel kin lioajoahjki kapkap roairoai. Arai koaloklok uhdahn pirin koalik.”
41Jesus mwindihioang wijahkij nehn Umw Joarwiho koaroannoang dohien meiroanngo. Ih ken kin kapkapangjili doahroar armajjok ahr kin peiddihoang nihrai mwanihok nehn dohien meiroanngo. Dirin armaj koapwoahpwoa pwili peiddi mwani koalik nehn irai en kin meiroang.
42A liohdi joamwoahmwoa men leldo pel pwili peiddi send wahssa riau.
43Jesus panginpene nah sohnpadahkkok pwehng arai, “Ngoahi pwehng kamwai in mehlel, pwa en liohdi mene ah meiroang inenin koalik jang araihok ohroj.
44Pwa armaj pwiok peiddi oang nihrai mwani nehn dohien meiroang jang nehn ahr pai; a liohdi mene jang nehn ah paijuwed, ih kihdi me ohroj ma ih anki apel kin mourki.”
