Mark 1

1

2

3

4

5

6

7

8

9

10

11

12

13

14

15

16

¹Me ioar sapin Rongmwehu doahr Jesus Christ Nihn Koahs,

²doahr lallo ma ne insingdi ipen johkohp Isaiah: “Koahs pwa, ‘Ngoahi pirin kadarwe noai johnpakairro mwohn koawoa, ma pirin koaunopda allo mwohmmwen.’

³Mine ngilloau ma kin poangpoangpoang nehn japwsoahn: ‘Kamwai koaunopda al kan ohroj oang Koaunno, kamwai kainenehla ah al kan ma ih pirin alu loaloa!’”

⁴John ken pwokda nehn japwsoahn, poapdaiji armaj kan, pwehpwehpwehng irai, “Kamwai koaluhla, wiliakapwla apel poapdaijla, Koahs pirin mahkoahng kamwai dipamwai kan.”

⁵Armaj dir jang koujapw ohroj nehn wein Judea apel jang Jerusalem inla pwa en rong en John ah kapahrak. Irai kin woahkda diparai kan, a ih poapdaijihla irai nehn Pillap Jordan.

⁶John kin kol likkoau oau ma wiawihda jang in winen kamel, apel kin piroahki lopkoa kangir kilin kahu; a da ih kin kangkangkang: padda apel jukehn loanglap in nehn woallo.

⁷A me ioar mwomwen koaloklok ma ih kin pwehng armajjok: “Mine woal men ma pirin indoa mwerin ngoahi, ma laplapjang ngoahi dauluhl; ma ngoahi johpwa warroang rukdi mwohn ih pwa ngoahi en lapwadda joalin ah juho.

⁸Ngoahi kin poapdaijihki kamwai pil, ih pirin poapdaijihki kamwai Ngen Joarwi.”

⁹Mwerin en Jesus indoa jang Nazareth, kahnihmw siksik oau nehn wein Galilee, poapdaijla ipen John nehn Pillap Jordan.

¹⁰Nehn anjoauwo ma Jesus doauda jang nehn pillo, ih kapang nehnloannge rispijoang a Ngen Joarwi indihdo doahr dinin mwurei men mine pohn ih.

¹¹Ih pel rongda ngilloau indihdo jang nehnloannge pwa, “Koawoa ioar noai jermwein kahpwil wa, ma ngoahi kin malauki.”

¹²Doari, nehn anjoauwohr Ngen Joarwi ken kahlwahlahng Jesus nehn japwsoahn.

¹³Jesus ken mine wijahu rehn pahjek, Jehsen ken kajongjongi ih. Mahn ingkel kan kin pel pwili Jesus wijahu; a sohnloang kan pel kin indoa pel jeuweje.

¹⁴Mwerin John peidekkoang nehn kalpwuhj, Jesus inla Galilee lohkihjili Rongmwehu jang ipen Koahs, pwa,

¹⁵“Ne lel anjoauwo, Wein Koahs ne koaroando! Kamwai koaluhla apel wiliakapwla apel kamehlelehla Rongmwehu!”

¹⁶Rehn oau Jesus allaluhla pohn poahrinjedin Lehn Galilee; ih kapangda sohnloakjid roahmen, Simon apel riah Andrew, loakjidki nihra ukko nehn lehu.

¹⁷Jesus pwehng ara, “Kamwa indoa pwilihla ngoahi; a ngoahi pirin wiahkihla kamwa sohnloakjidi armaj.”

¹⁸Anjoauwohr, ara kihdi nihra ukko pwilihla ih.

¹⁹Ih injang wijahu, pel kapangda riarihoau, James apel John, nihn Zebedee. Ara minmine pohn pohs pas winwina nihra ukkok.

²⁰Nehn en Jesus kapangda ara, ih pangin ara. Ara ken kihdi jamarahu ma pwili mine pohn pohs siksik pas ipen sohndoadoahk pwi, ara ken pwilihla Jesus.

²¹Irai inla Capernaum a Sabbath Jesus dilda nehn jinakokehu sapda ah padahk.

²²Armaj ohroj ma pwili rong ken pwuriamweikihla doahr a kin kihwe ah padahk; pwa manman in ah padahk johpwa doahroar en johnpadahk in Kojonneddok arai padahk.

²³Woal men ma ngen jaus dilingla inla nehn jinakokehu rahrahuki pwa,

²⁴“Jesus mihn Nazareth, da koawoa nimen wiahng kamai? Koawoa indoahng koauwehla kamai! Ngoahi kidal inje koawoa, koawoa ma Nihn Koahs johnpakair joarwihwa!”

²⁵Jesus pwehng ngen jausso, “Nennenla, koawoa diljang nehn armaj menen!”

²⁶Ngen jausso ken isikda woallo oaroh ken roarda, rahrahu diljang ih.

²⁷Armaj ohroj pwuriamweikihla, peipeidekpene nehn pwungarai pwahpwahpwa, “Dahkij me? Joangoan padahk kapw dahioau me? Woalmene inenin manman. Ih pwen lalloar, pel ngen jaus kan pel peikkoang!”

²⁸Rongin Jesus ken pispis lohkjili wija ohroj nehn wein Galilee.

²⁹Doari, Jesus apel nah sohnpadahkkok, pwilihki James apel John injang nehn jinakokehu inla umwen Simon apel Andrew.

³⁰Inen pahien Simon‑o onohn nehn immwo johmwehu karkar, nehn en Jesus lel wijahu arai pwehng ih doahr iren liho.

³¹Ih ken inla kolda poahn liho jeuwejehda pwa en uhda. Nehn anjoauwohr, karkarro injang ipen liho; ih ken sapda apwali irai.

³²Injoausikdi, nehn en joauwo pirin ken duhla, armaj kan wahpenehng Jesus min johmwehu apel min ngen jaus kan dilingla irai.

³³Sohn kahnihmmwo ohroj pwili pokonpene mijen ummwo

³⁴Jesus kemwehuwihla armaj dir ma anki joangoan johmwehu dir apel kahujjang ngen jaus dir ipen armaj kan. Ih ken kauhdi ngen jaussok arai en joah lallal, pwa irai kidal ih.

³⁵Pwohrdahng rehnno, injohrehn, Jesus pwohrda inlahjang in ummwo, inla likin kahnihmmwo wijahkij pwa en kalahpwukla kapkap.

³⁶Simon apel pwilihoahk rapahkihla ih;

³⁷nehn irai kapangda, irai pwehng, “Maing, armaj ohroj raprapahki koawoa.”

³⁸A ih japoang irai, pwa, “Kisai dauluhlwehng nehn koaujoan koaroan kan, pwa ngoahi en pel lohkihjili Rongmwehu wijahk, pwa ioar ngoahi indoahki.”

³⁹Ih ken allaluhjili nehn Galilee pwon, kapkapahrakjili nehn jinakoke kan apel kahkahujjang ngen jaus ipen armaj kan.

⁴⁰Woal lepahmen pel indoa ipen Jesus, poadpwomwla mwohn ih, jarda pwehng en jeuweje, pwehng ih, “Maing, ma koawoa nimen, koawoa kak kamwkelehda ngoahi.”

⁴¹Doari Jesus ipwilkihda, kailla poah pukkoang woallo, “Ngoahi nimen,” ih pwehng ih, “Ken mwakelkelda!”

⁴²Anjoauwohr lepahu ken jarjang ipen woallo; doari ih ken mwakelkella.

⁴³Jesus kainoapwihdi, pwehng ih, “Kapang, Pwa koawoa en johpwa pwehng emen. Inla kajalehioang jamwrou a koawoa wia oamw meiroang joanngo ma Moses koajnehdi, en wia oamw mihn kadehde oang irai.” Doari ih ken kadarla woallo.

⁴⁵Woallo inlahr lohkihjili wija ohroj ah ne mwakelkelda; ma kahrehda Jesus johla kak aluhjili nehn pokon janjal nehn kahnihmmwok, ih kin kalkalahpwukjili likin kahnihmmwo. A joah, pwa armaj dir kin pokondo ipoa jang wija ohroj.