San Marcos 5:9-30

⁹Suasne Jesúsne ka mɨmara: —¿Nune chi munish? kizta. Saliztuzne ka kizara: —Aune “akkwan” munmakpas. Aune akkwan makpas, kizara.

¹⁰Sun saliztuzne Jesústa an tɨnta paikuaara: —Aumɨza mamaz sura ɨninmun, kizara.

¹¹Kwisha akkwan kuzune kashain ɨnkalta kuaamtuazi.

¹²Sun saliztuzne ussa an tɨnta paikuaara: —Aumɨza kuzuruza pizna ɨninchain, kizara.

¹³Suasne usne usparuza kuzuruza ɨninnara. Wan kwail saliztuzne ɨat kit kuzuruza pizara. Suas sun paas mil kuzune ãĩn pilchiraras taizarɨt. Pira taizat kit pi kwaarɨt. Iara.

¹⁴Kuzu kwira kimtuzne ishkuat kit ãĩn ɨat kit pɨpuluras awarakas sun suras awarakas sun pit kainanara. Tas awane aara, Jesús kirɨt aizpa izana.

¹⁵Uspane Jesúspakin aara. Sua uspane akkwan saliz piztɨt mɨjatmikasha izara. Sun ampune uz kit wan kwat kit wat mintu. Pɨpuluras awane ishkuara.

¹⁶Saliz piztɨt mɨjatmikasha izararuzne wan awaruza ka kainanara: —Saliz piztɨt mɨjatmikane wat mintu. Saliztuz kuzuruza piznarawane, kuzune pi kwaara, kizara.

¹⁷Suasne awane Jesústa an tɨnta paikuaamtu: —¡Au suras ɨmɨzti! kizara.

¹⁸Jesús kanuara wakane, saliz piztɨt mɨjatmikane Jesústa paikwat: —Nukasa ɨshimtus, nukasa tuan, kizta.

¹⁹Jesúsne ussa ɨninmai, uskasa kanpanapa. Ussa kaizta: —Up kwalta kailtɨnka. Usparuza “Dios saliztuza puzninnara” kainanana ɨnka. Diosne nua kiwainta kiznarain, kizta.

²⁰Sun ampune tas ɨt kit Decápolis suras awaruza Jesús us akwa sarɨt aizpa kwinta kinara. Wan awane sun akwa iztaspaarɨt.

²¹Jesús katsa pi kwakara kanuawara kwaktawane, akkwan awane ussa wanmakkara. Usne katsa pimamin nukkulta.

²²Sua maza awane, Jairo munmikane, at kit Jesúspa mittɨkin wakpuj wainta. Usne Judío kammu yal manta kimika azi.

²³Usne ussa tɨnta paikwat kit kaizta: —Ap pashu ainki inapain i. At kit up chihtɨkasa ussa paananka, wat panapa, uznapa, kizta.

²⁴Jesúsne uskasa ɨra. An akkwan awane kwizpa ɨat kit nuppain kit Jesústa wanmakkara.

²⁵Maza ashampane wan awakasa tuazi. Usne doce añokima paiña aimpi puz kit pul parachi.

²⁶Usne akkwan tuttulkasa kwisha naizta. Wan pial mɨj aizpa tara. Wat parachi. Anpa piztɨt.

²⁷Awane ussa Jesúspa kwinta kiara. Ishtura wat panintu, kizta. An ashampakas Jesúspa mɨra. Usne akkwan awakasa kwizpa aara. Usne paiña kwaksham paara.

²⁸Sunkana usmin minta: “Paiña kwakshammin paarane, usne nawa wat paninnazi,” minta.

²⁹Ussa paarawane, sun urain paiña aimpi pul parɨt. Usne ayukta paiña ishtu wat parɨt nɨjkulta.

³⁰Jesúsne usmin mazainta wat panintɨt nɨjkulta. Akkwan awa ustukin wanmakkarakas, usne ãĩn puij chat kit mɨmanara: —¿Mɨnma ap kwaksham paara? kiznara.