Mak 5:9-30

⁹Sakini, Iesu visi vit, “?Isom isei?” Meatin enek vit risi mini vit, “Isomai ‘Houlu,’ ven komai houlu memusing kat meatin ekek.”

¹⁰Kei peah Iesu mok vit nahile lattei ninin tisa keil anaha ran out keil koa vesesal en out enek.

¹¹Vesesales en out enek, vuas houlu amul akanian en usihou tai.

¹²Sakini, ninin tisa keil apeah Iesu, “Kimaen komai meheha en vuas keil ekek.”

¹³Hatte tas, Iesu vile lat keil amea ran meatin, uva en vuas keil. Sakini, vuas keil enek, vesesal taosen elu (2000) amuloh avita en veisil, ka uva en Mari Oai ten out Kaleli. Ka keil vasi amarindu, umatmat.

¹⁴Ka meatin keil koa alei kat vuas ametau, ka amuloh avita en meteimal ka asan longlongien va emun en out sav. Sakini, meatin keil umai avit avahotin asa kur out.

¹⁵Navong umai ven Iesu, ales meatin koa ninin tisa mul ien mulamu, kei mul rondan, musin tuai, ka rendemien onen mai tahos. Ka navong meatin keil koa aka en meteimal umai alesi, ulie metau.

¹⁶Ka koakeil ales asa koa kur out usil meatin enek ka vuas keil, arun usili min meatin sav keil.

¹⁷Sakini, meatin keil ten out enek apeah Iesu avit vamea ran out se.

¹⁸Navong Iesu mul vut va en vot, meatin koa ninin tisa mea rani en vati keke vousili.

¹⁹Ka Iesu romaentei. Ka kei viteni suk mini vit, “Kiha teim ven onom keil. Kihiten asa koa Ahi Asuv mumoni minuk ka mukave kur enmahisien enuk.”

²⁰Sakini, meatin enek va ka vasi out koa avise en Dekapolis, ka mul viten asa koa Iesu mumoni mini. Koakeil vasi araengoni, amutimanin eni.

²¹Ka evus, Iesu ral min meatin keil onen uvut uva en vot, amu koteh Mari Oai ten out Kaleli eris. Ka navong Iesu mulomal en out ut, meatin keil houlu akarahiti.

²²Ka meatin tai mai veni, isen Saeros koa vi elda tai ten eim tahihiseien onen Siu keil en out enek. Navong les Iesu, mual veni ka retengeiril en meten.

²³Kei mul peah Iesu keke vakatauni vit, “Natukahin vesesal vamat. Ek vati li kovaling hem eni, vasakini valonge vatahos eris ka vamoul.”

²⁴Sakini, Iesu musili. Ka navong Iesu va, meatin keil houlu amul amusili ka amuting rahiti.

²⁵En vangi meatin keil enek, ahin tai mul koa mesaien onen mama keil muasi sua teindan elu (12), sakras vavus.

²⁶Ahin enek va les dokta keil houlu ka keil asakras avasak revi mesaien onen. Vul keil en mani vasi keil onen, ka rolongtei vatahos, mesaien enek mai houlu tamun.

²⁷Ahin enek raengon longlongien usil Iesu, sakini, mual katau en koakeil amusil Iesu keke vatokol eisin omon.

²⁸Veni en rendemien onen vit, “Vahit matokol eisin omon enges, malonge vatahos.”

²⁹Ka navong rokol eisin omon Iesu, hatte tas, mesaien onen vus rani. Ka kei long kilea keke aven mai ris tahos.

³⁰En hati avong enek, Iesu kilea varei keke keihoen mea rani. Sakini, viles les meatin keil ka vis keil vit, “?Isei rokol eisin omak?”