Mak 5:9-30

⁹Eri pe Yesus ihndremte iy ihpa, “Ou rangam si?” Pe iy ipe ihpa, “Yu rongo Lijen, odosa odu ti odu sulo‑on.”

¹⁰Pe iy ihndremte Yesus iseu pe iseu, ipe Yesus ki‑es su odo lok erti kolwii.

¹¹Puu sulo‑on sulo‑on henesusuu hoso tondrih odo lok ertih.

¹²Su sinel hehndremte Yesus hahpa, “Ou eduwe odu atla mundre’ su puu holso kitih.”

¹³Yesus ipahran pe su ha‑au odo mundren orngon kuti pe hondroh hala tam puu. Eri pe puu ndre sulo‑on, mukehe ndre pwerungeh (2000), hohtot hala ma‑au pe hondroh hala lon ndras. Su ndre sulo‑on hamat.

¹⁴Su lau ndre mada’ su iso tam puu ti hohtot ha‑au pe helninen hala taon pe lok se yi ndre he‑en ertih. Pe sa lau hala helndre‑et.

¹⁵Sa hala ti pe heltuwe orngon ndre su sinel hodo pule‑en pihe ti indretasan kolewen pe imin poi ndroda Yesus. Ngungong tadan indrinum. Ile pe sa lau honoh.

¹⁶Su lau ndre hodo pe hendre‑et homosa ihir tan orngon ndre sinel hodo pule‑en ti henen ile ta sa lau. Su henen homosa ihir ile ta su puu ti yi.

¹⁷Ile pe sa lau odo lok erti honoh pe hapa ile ta Yesus ihpa, “Ou owou odo lok keti pe ala hepe yi.”

¹⁸Yesus indreh ile yi ndre ndrol, pe orngon ndre Yesus iyes su sinel odo mundren ti ihndremte Yesus ihpa, “Yu upwe Ou ekuni yu ku‑us Ou.”

¹⁹Odoke Yesus mboren pe ipe ile tadan ihpa, “Ala yi ndre emwem pe lonem, pe elninen kile ta su murwom. Ala pe enen homosa ndre Lapan ikarundrum ou pe ipu huyen ile tadam.”

²⁰Ile pe orngon kuti iyeu, pe ile lon taon ndre sungoh ndre he‑en lok erti, pe inen homosa ndre Yesus ipupu‑uh odo henuwii iy. Sa lau ndre sulo‑on hohrungii pe hehretek.

²¹Yesus indreh ile yi ndre ndrol pe ile yi ndre hodoh. Iy ilihir hodoh ti pe sa lau sulo‑on hala ndrongon iy odo papi. Su hapa hohrung nolwo‑on.

²²Pe orngon homou rangan Jairus ise hu Yesus. Jairus ti madan iso marai odo lon omwen surok sim. Iy ile pe pandrulku‑un ile poi idu kendrun ndriken Yesus,

²³pe ihndremte puko‑on ihpa, “Yu nedu pihin ke imet. Ou asa lumwem kile tadan, kile pe iy kile huyen pe kimet kolwii.”

²⁴Yesus iyus iy harla, pe sa lau sulo‑on ho‑us yi. Homou intu‑uw ta homou, pe henelila hosokaltan Yesus ile.

²⁵Pedih homou idu lenga’ sa lau, eri tadan sik. Iy ineruhti ndrai ti indrahpa ndre sa pedih se ti pwi. Sik tadan ti indrehir into mundrun ti pwi, pe kah idu tadan iyenon ndre krismas sungoh-pe-ruweh.

²⁶Iy indrepiyen mone‑en ndre sulo‑on ile ta sa ndrokta, odoke isella huyen ke pwi. Sik tadan ti ke illih mo‑on lakopwi.

²⁷Iy ihrungi sa lau heninen Yesus, ile pe iy irehen iy ile lenga’ sa lau ndre hodo ndruwen Yesus.

²⁸Iy idawene ihpa, “Uh yu kutkuni ke hepe ngerin kolos Tadan, eri sik todo we kinum.”

²⁹Iy itkuni kolos ta Yesus, pe ndrai tadan inum. Pe iy ihkalmanan lom mundren ihpa ndre sik tadan ti indrinum ndresale.

³⁰Idu ke ndre erti pe Yesus ihkalmanan ihpa ndre se puko‑on ti iyeu odo mundren. Ile pe Iy indre‑et ile ta sa pe ihndremte, “Si lumwen ile kolos Todo tih?”