Marko 5:9-30

⁹Geso gepomgalu, “¿Klu giwakyi?” Rugitlu. Wane china, “Ngiwaka Gixoluru, wa gixolurunpotwu.”

¹⁰Wa ragjitlu maleka ma yokanatyaplu tyesretaya.

¹¹Wanenanru magkastsi gixoluru kochi. Nikanatna.

¹²Ragjitluna pejnuruneko kamchine. Wane chinna, “Kochi yegi pyokanatanunwu wa wanna wjiglokyapa.”

¹³Geso gichichna. Rushpakamtatkana kamchine puchotlewatachine. Kochinni jiglokamtatkana. Gixolunni kochinni gipjita gijrukyanatka. Tsru wenu rapokanna. Wanegetkonna gepi waragka. Tsru wenu gagyekyachinena.

¹⁴Wanna kochi girukotachine gasukamta. Runkaklewtapna tsru pokchiya, ga wa sana gajene koxa. Runatkana retapyapluna klunerukta wane gixkaluru.

¹⁵Runyegitluna Geso. Retluna wa kamchitpachri wa gixoluru gwanatanru. Tuplanatatka. Kamkatkalu. Kanshinikanutkalu. Pikanna.

¹⁶Retanatjene ginkakna gikta rixpokonatka wa kamchitpachri, wa kochinepirana.

¹⁷Yinuwaka gagjiretluna Geso wa rushpakinripa wannasretaya.

¹⁸Ratskota kanawa. Wa kamchitpachri gagjitlu wa Wale yegi rawinripatka.

¹⁹Geso gi galuka ganikletlu. Wane chingonuklu, “Pupji pyanutka pumwanune yegi. Punkakanna gikta rixpokotatkayi Gitsrukaachi. Wale punkakanna retwamonutyayi.”

²⁰Ralimta. Yinuwaka ginkaklewletatka Ntekapoliya gikta rixpokotatkalu Geso. Pejnuruneko gimyeka.

²¹Koprugatatnaka Geso kanawaya. Wakanu ya. Rapatyegitluna gixo yine. Tsru wenuwnaga rawa.

²²Runa satu wa tsru gitaakalurune ginkaklewawakapji gajenyegiya, Gayro giwakatletachri. Retinitkalu yoptsojityegitlu Gesojixistsiya.

²³Wane chinru, “Wuya wanepnawakla nshicho wgeneji. Petapanunro. Tupnakastsinatkani. Putakamyogogotanunro tutskalginripa. Tuwekanu.”

²⁴Geso waleymamnutka. Romkagimtluna gixolune yine. Rachpakluna.

²⁵Sato suxo gigragalewatachrona. Pamole gepi walapu gigragalewatachrona.

²⁶Gixo kpinrewaklerunyegimka tyanitka. Wanna chinanu tsalewna gixo. Tnikatlewatanatka ptowruko walanuko tixinri. Gikena gipxakanro. Seyni taalinanumtana.

²⁷Tjempiranyegitinitkalu Geso, tuna Wale gajxigiya wa gixolune yine yegi. Tkamrukamkatlu.

²⁸Wa wane china wala, “Nkamrukamkashatinri nutskalganu.”

²⁹Waneklutka tograga gitskikatka. Tumatnawa tomaneya tuglewatinritka wa tsalewnanatinri.

³⁰Waneklutka Geso gimatatka Walenanuko rushpakamtyatka giyaklu. Ruprotaka wa gixolune yine yegi. Wane china, “¿Katu kamrukamkatno?”