1Mwerin Sabbath‑o, Mary mihn Magdala, Salome, apel Mary inen James, irai dupukda le karahdin pwi irai en inla salipki palwoaroan Jesus.
2Oh inminjoang in rehnin Joarwi anjoauwo ma joauwo dakda, irai inla in joaujoauwo.
3Nehn irai allaluhlahng in joaujoauwo irai pwahpene nehn pwungarai, “Inje pirin jeuweje kisai kasahpwroahjang sakaiho in oawoan joaujoauwo” (Pwa ausoapoan sakaihoau.) Nehn irai lel wijahu irai kapangda pwa sakaiho no kasahpwroahkjang.
5Irai ken dilda nehn joaujoauwo kapangda mwahnkapw men, ma mwindi loap moaunin joaujoauwo likkoauki rohp korohrohioau ma—kanuhla irai.
6Mwahnkappwo pwehng irai pwa, “Kamwai joah majpwehk, ngoahi kidal pwa kamwai raprapahki Jesus mihn Nazareth ma no kalohpwuhla. Joh ih me—ih no iejda! Kamwai kadehde, me ioar wijahwa ih liklikdi.
7Kamwai alwe padahkihoang nah sohnpadahkkok, a mehlel Peter. ‘Ih pirin inla Galilee mwohn kamwai; ioar wijahwa kamwai pirin kapang ih, doahr ah ne inoaukihoang kamwai.’”
8Lihok diljang nehn joaujoauwo, irai ken kau pwa irai inenin majpwehkda apel jalohda. Irai pel johpwa pwehng armaj men mehkij, pwa irai majpwehkda.
9Mwerin Jesus iejda oh inminjoang in rehnin Joarwi, keiou, ih pwokkoang Mary mihn Magdala, liho ma ih kajroahjang ipoa ngen jaus ijimen.
10Mary ken inla padahkihoang irai ok ma kin pwilpwilihjili Jesus ma injinjuwed apel joangjoangjoang.
11Anjoauwo irai rong Mary pwa Jesus mour a ih pel kapang Jesus, irai johpwa kamehlele ih.
12Mwerin me Jesus pel pwokkoang nah sohnpadahk roahmen in oaujoangoan mwomw anjoauwo ira allaluhlahng in umwara likin kahnihmmwo.
13Ira japahldo pel padahkihoang epwi irai, a irai ma rong johpwa kamehlele.
14In koarjoahklahu Jesus pwokkoang nah sohnpadahk eijek emenno anjoauwo ma irai mwingmwinge. Jesus koapwung oang irai doahr arai joah pwojon apel koapsakai in kamehlele irai ok ma no kapang ih mwerin ah iejda.
15Ih pwehng irai pwa, “Kamwai alwe wija ohroj nehn jampah padahkihoang armaj ohroj rongmwehuwo.
16Inje ma pwojon apel poapdaijla, pirin mourla; a inje ma joah pwojon, pirin kerpwihekla.
17Manman pwiai pirin aluhwoang irai ok ma kin pwojonla; irai en kin kajroahjang ngen jaus kan ipen armaj in oadoaioa; irai pirin lalki lalin japwen likin kan;
18ma irai pwoakda sinek kan, ke pel nimla mehkij ma pwoaisin, irai jehpirin mehkihdi; irai pirin kihdahng poahraiok pohn armaj johmwehuwok a ihr pirin mwehula.”
19Mwerin en Koaun Jesus sikesikkoang irai, ih pwoakpwoakdahla nehnloannge ih mwindi loap moaunin Koahs.
20Sohnpadahkkok ken japahlla padpadahkjili wija ohroj; Koaunno kin pel pwilpwili irai nehn arai doadoahkkok pwa en kadededa pwa arai padahkkok mehlel jang in manmannok ma irai wiahda.
