مَرَكِ 5:9-30

⁹عِسَ مَن نَشَ عَ مَشْرِن، «عِ شِلِ دِ؟» عَ نَشَ عَ يَابِ، «ﭑ شِلِ نّ فَلِ، بَرِ مَ مُشُ فَلِ نَن عَ رَ.»

¹⁰عَ نَشَ عِسَ مَيَندِ كِ قَنيِ، عَ عَ نَشَ عٍ كٍرِ نَ بْشِ مَ.

¹¹شْسّ فَلِ نُ نَ عٍ دّ مَدٌنقٍ فٍيَ ندٍ مَ.

¹²حِننّيٍ نَشَ عِسَ مَيَندِ، «مُشُ رَ سٌ يِ شْسّيٍ عَلَكٌ مُشُ شَ لُ عٍ قَتٍ.»

¹³عِسَ نَشَ تِن. حِننّيٍ نَشَ فبِلٍن نَ شّمّ قْشْ رَ، عٍ سٌ شْسّيٍ. شْسّيٍ نَشَ فٌرٌ عٍ فِ رَ تٍنتٍنيِ رَ، عٍ سِن بَا مَ. عٍ وُلُ قِرِن نَن نُ عَ رَ. عٍ بِرِن نَشَ مَدُلَ، عٍ قَشَ.

¹⁴نَشٍيٍ نُ نَ شْسّيٍ دّ مَدٌنقٍ، عٍ نَشَ عٍ فِ. عٍ نَشَ سَ نَ قٍ قَلَ تَاكَيٍ نُن دَاشَكَيٍ بّ، مِشِيٍ قَن نَشَ سِفَ نَ قٍ مَتٌدٍ.

¹⁵عٍ تٌ عِسَ يِرٍ لِ، عٍ نَشَ نَ شّمّ تٌ حِننّ فَلِ نُ نَشَن قْشْ رَ، عَ دْشْشِ، سٌسٍ رَفٌرٌشِ عَ مَ، عَ بَرَ شَشِلِ سْتْ. نَ نَشَ عٍ فَاشُ.

¹⁶نَشٍيٍ نُ بَرَ عَ تٌ عِسَ حِننّيٍ كٍرِشِ شّمّ قْشْ رَ كِ نَشّ، عَ نُن نَشَن نَبَ شْسّيٍ رَ، عٍ نَشَ عَ تَفِ رَبَ عٍ بِرِن بّ.

¹⁷نَ شَنبِ، نَاكَيٍ نَشَ سٌ عِسَ مَيَندِقٍ عَلَكٌ عَ شَ كٍلِ عٍ شَ بْشِ مَ.

¹⁸عِسَ تٌ نُ بَكِقٍ كُنكُي كُي، حِننّيٍ نُ شّمّ نَشَن قْشْ رَ، عَ نَشَ عِسَ مَيَندِ عَ عٍ بِرِن شَ لُ عَ رَ.

¹⁹كْنْ عِسَ مُ تِن، عَ عَ قَلَ عَ بّ، «فبِلٍن عِ شْنيِ، عِ شَ مِشِيٍ يِرٍ. سَ دّنتّفّ سَ عٍ بّ، مَرِفِ قٍ نَشَن بِرِن نَبَشِ عِ بّ، عَ نُن عَ كِنِكِنِشِ عِ مَ كِ نَشّ.»

²⁰شّمّ نَشَ سِفَ، عَ سَ نَ بْشِ عِسَ قْلْ، نَشَن شِلِ تَا قُ. عِسَ نَشَن بِرِن نَبَشِ عَ بّ، عَ نَشَ عَ تَفِ رَبَ نَاكَيٍ بّ، بِرِن نَشَ كَابَ.

²¹عِسَ مَن تٌ فِرِ نَاكِرِ مَ كُنكُي كُي، حَمَ فبٍفبٍ نَشَ عٍ مَلَن عَ يِرٍ بَا دّ رَ.

²²سَلِدٍ يَرٍرَتِ ندٍ نَشَ قَ عَ شْن نَشَن شِلِ يَيِرُ. عَ تٌ عِسَ تٌ، عَ نَشَ سُيِدِ عَ بّ.

²³عَ نَشَ عَ مَيَندِ كِ قَنيِ، «ﭑ مَ دِ فِنّ نَ عَ نِي مَفَفَقٍ! يَندِ، قَ عِ قَ عِ بّلّشّ سَ عَ مَ عَلَكٌ عَ شَ يَلَن، عَ شَ كِسِ.»

²⁴عِسَ نَشَ سِفَ عَ قْشْ رَ. حَمَ فبٍفبٍ قَن نَشَ بِرَ عِسَ قْشْ رَ، عٍ نُ قَ عَ شّتّن.

²⁵فِنّ ندٍ نُ نَ عٍ يَ مَ نَشَن شَ كِكٍ وَلِ مُ نُ عَ عِتِمَ حّ قُ نُن قِرِن بُن مَ.

²⁶عَ نُ بَرَ تْورْ سٍرِبَ وُيَشِ يِ، عَ عَ هَرِفٍ بِرِن سٌ عٍ يِ رَ، كْنْ عَ مُ قِسَ. عَ شَ قُرٍ شُن نُ مَسَمَ نَن تُي.

²⁷عَ تٌ نُ بَرَ عِسَ شَ قٍ مّ، عَ نَشَ سٌ حَمَ تَفِ، عَ قَ عِسَ شَنبِ رَ، عَ عَ بّلّشّ دِن عَ شَ دٌنمَ رَ.

²⁸بَرِ مَ عَ نُ بَرَ عَ قَلَ عَ يّتّ بّ، «شَ ﭑ نْ ﭑ بّلّشّ دِندٍ عِسَ شَ دٌنمَ رَ فبَنسَن، ﭑ يَلَنمَ نّ.»

²⁹عَ شَ كِكٍ وَلِ نَشَ دَن كٍرٍن نَ، عَ نَشَ عَ كٌلٌن عَ قَتٍ مَ عَ عَ بَرَ يَلَن.

³⁰عِسَ نَشَ عَ كٌلٌن كٍرٍن نَ عَ سّنبّ ندٍ بَرَ مِنِ عَ قَتٍ يِ كَابَنَكٌ رَبَقٍ رَ. عَ نَشَ عَ يَ رَقِندِ حَمَ مَ، عَ مَشْرِنيِ تِ، «ندٍ عَ بّلّشّ دِنشِ ﭑ مَ دٌنمَ رَ؟»