San Marcos 5:9-30

⁹Na' goll Jesúza' ḻen: ―¿Bin lio'? Na' che'n: ―Legiónan lia', ḻa' zannto' nak.

¹⁰Na' got'yochgain Jesúza' bi wseḻeegakan gan yoblə.

¹¹Na' gaozə kwit yaana' gana' lle'gake', lle' zan kush chaogakb.

¹²Na' got'yoi dii x̱iw'ka' ḻe', che'gakan: ―Bseḻ' neto' gana' lle' kushka' na' be' latj yiyoonto' ḻegakb.

¹³Na' bi'e latj c̱hegakin, na' bichejgakan jayoogakan kushka'. Na' nakgakb ka c̱hopa mil, na' wzologakb chxoṉjdogakb jabix̱gakb ḻoo nisdo'na', na' jc̱he'gakb yel.

¹⁴Na' beṉ'ka' chap kushka' ziyajdogake' jayellgake' beṉ'ka' lle' yella' na' beṉ'ka' lle' lyix̱aa daa ble'gakile', na' beṉ' zan jawia daa gok.

¹⁵Na' ka bllingake' gana' ze Jesúza', ble'gakile' beena' wyoo dii x̱iw'ka' chi'e kwite'na' ba biyakw xe'na' na' ba biyeeṉ biyeeniile', na' bllebgake'.

¹⁶Na' beṉ'ka' ble'i daa gok c̱he beena' wyoo dii x̱iw'ka' na' daa gok c̱he kushka', be'gake'n dill' lao beṉ'ka' bllin.

¹⁷Na' got'yogakile' Jesúza' yiyaje' gan yoblə.

¹⁸Ka chiyoo Jesúza' ḻoo barkwa', beena' wyoo dii x̱iw'ka' got'yoile'ne' wi'e latj shajlene'ne'.

¹⁹Per bi bi'e latj, san chi'ene': ―Biyaj lillo'na' gana' lle' bish' ljwello'ka', na' jayellgake' ka nak diiki ba ben X̱ancho Chioza' c̱ho' na' ka ba biyesh'lallile' li'.

²⁰Na'ch biza' beena' na' jaye' dill' doxen gana' mbani Decápoliza' daa ben Jesúza' c̱he', na' yog' beṉ' bibani.

²¹Ka billinlen Jesúza' barkwa' shḻaa nisdo'na', na' bdi'a bllag beṉ' zan cho'a nisdo'na' gana' billine'.

²²Na' bllin to beṉ' le Jairo, nake' to beṉ'ka' chgoogake' xṉezi diika' chon beṉ' Israelka' gana' chdop chllaggake' choe'ḻwillgake' Chioza'. Na' ka blline' gana' ze Jesúza', bc̱hek' xibe' lawe'na'

²³na' benyesh'chgue', chi'e: ―Ba chet bi' c̱ha'na'. Ben goklen sho'gach wx̱oa noona' yic̱hjbaa kwenc̱he yiyakib' na' ibanchb'.

²⁴Na' wyajlen Jesúza' ḻe', na' beṉ' zan inlleb nogake'ne' ax̱t bdakwyillgake'ne'.

²⁵Na' ladj beṉ' zan walka' len to noolə ba gok shlliṉ yiz chzoe' wbaa.

²⁶Dii zan dii ba ben ble'ile' lao beṉ' wen rmechka', na' ba blliayee yog' dii de c̱he' na' bi gokkze' rmech, san gokxinlile'.

²⁷Na' ka benile' xtill' Jesúza', jṉi'e ladj beṉ' zan walka' no ḻe' na' jex̱ee xe'na'.

²⁸Ḻa' gokile': “Ḻa'c̱h' xe'na' sheḻ' ba bex̱aa, na' yiyakid'.”

²⁹Na' katena' wlez wbaana' na' gokbe'ile' ba bigaa yillwe' c̱he'na'.

³⁰Na' gokbe'i Jesúza' bchej yeḻ' wak c̱he'na', na' biyec̱hje' chi'e beṉ'ka': ―¿Noran bex̱' xa'na'?