1Mwerin rehnpwi, Jesus pel pwuroahng inla Capernaum. Rongin ah minmine in umwahu lohkjili;
2ma kahrehda armaj dir pokondo in ummwo apel koaisla loaloa pel in wanihmmwo. Ih ken padahkki oang arai lallo.
3Nehn ah padpadahk, woal mwoasor men ne wijwijik allaluhdohng ipoa; ih mine nehn mihn wijik oau, wijik in pahmen.
4Doari, nehn ahr johkak kadilihda apel sohlahng ipen Jesus ki koais in pokonno, irai pwukulda pohn ummwo kainenehdi wijahu ma Jesus mine, kadilihdihong nehn ummwo ipen Jesus mihn wijikko ma mwoasorro mine puwoa.
5Nehn en Jesus kapang arai pwojon, ih pwehng woal mwoasorro, “Noai jeri! Dipoamw kan no lapwda.”
6Johnpadahk in Kojonneddohpwi pwili mwindi nehn ummwo, irai lemlemehng pein arai,
7“Imdoahr woalmene ah kak wia joangoan sikesik oauwe? Pwa ih lahlahwe Koahs. Inje ma kak lapwadda dihp kan, jaudi Koahs kalahpwuk?”
8Anjoauwohr Jesus kidalda ahr lamlam; ih pwehng irai, “Da kamwai wiahki joangoan lamlam pwiai?
9Dahioau moangoai en pwehng woal mwoasor mene, ‘Dipoamwkan ne lapwda,’ ke, ‘Uhda, oaloa kioammwen alu’?
10A ngoahi en kamehlele oang kamwai en kidal pwa Nihn Armaj anki manmanin mahkoahng dipen jampah.” Ih ken pwehng woal mwoasorro,
11“Uhda, oaloa kioamwen alwe in umwoammwo!”
12Woal mwoasorro uhda mwohn mijarai, pwoakda kiahu, anjoauwohr ken inla. Irai ohroj pwuriamweikihla mehlel apel kapikapingahki Koahs, pwa, “Kamai kahjikkoar kapang mehkij ma doahroar me.”
13Jesus pel pwuroahng pwurlahng in oaroahr in Lehn Galilee. Armaj dir pel pokonpene ipoa, ih ken pel sapda padahk oang irai.
14Nehn ah allaluhla wija, ih kapangda johnrik daksis men, oadoa Levi nihn Alphaeus, ma onnonohn nehn ah oahpisso. Jesus pwehng, “Indoa pwilihla ngoahi.” Levi ken uhdahr pwilihla Jesus.
15Doari Jesus ken mwindihioang mwinge in umwen Levi‑o. A johnrik daksis pwi apel armaj dipan dir pwili Jesus apel nah sohnpadahkkok mwindihioang in sehpillo, pwa irai dir kin pwilpwili kahkahkahuj Jesus.
16Epwi johnpadahk in Kojonneddo, ma kijehn Pharisee‑ok, nehn irai kapangda Jesus ah pwili mwinge ipen joangoan armaj dipan pwiai apel ipen johnrik daksis pwiai, irai idoakkoang nah sohnpadahkkok pwa, “Da ih kin pwilihki mwinge ipen joangoan armaj pwiai?”
17A nehn en Jesus rongda me, ih pwehng irai, “Jaudi armaj sihkei ioar anahne johnwini, a armaj johmwehu. Ngoahi joah indoahng pangin armaj pwung, a armaj dipan kan.”
18Pehn oau nihn John Johnpoapdaij sohnpadahkkok apel Pharisee ok kaijihjol. A armaj pwi indoa ipen Jesus idoak ipoa, pwa, “Amwda nihn John Johnpoapdaijjok apel nihn Pharisee ok kin kaijihjol, a nihmw kan johkin pwili?”
19Jesus ken japoang irai, pwa, “Pwa da? Kamwai lemleme ma sohnkapar in kamdipw in koapwoapwoaud oau pirin kaijihjol nehn en woal kamwohddo ne lel iparai? Irai johkak.
20A oau anjoau ma pirin indoa ma woal kamwohddo pirin wijik jang irai; doari, ioar anjoauwo irai pirin kaijihjol.
21“Joh armaj kin deipinihoang dipwin likkoau kapw pohn likkoau in joakid mering, pwa dapwa likkoau kappwo pirin nurpene, soahrjang ekij likkoau merinngo doari soahroakko pirin koalikla.
22Pel joh armaj kin widekihoang wain kapw nehn pehk in kilin mahn mering, pwa wain kappwo nen koauwehla pehk merinngo; ohroj ara, wainno apel pehkko, nehn ohla mwahl. Ioar ma wain kapw pwen mwehuwoanngoar pehk kapw.”
23Sabbath oau Jesus wudla nehn mwoaswelin wihd oau. Nah sohnpadahkkok pwili ih; irai ken dolihdi wehn wihd pwi.
24Pharisee‑ok ken pwehng Jesus, “Kapang! Nihmw sohnpadahkkok wia me ma uhwoang kojonned in Sabbath.”
25Jesus japoang irai pwa, “Kamwai johkin wadek da David wiahdahu anjoauwo ma ih apel pwilihoahk mwakohkola?
26Ih dilda nehn umwen Koahs, kangla pilahwa joarwihok, nehn mwein Jamwrou Laplap Abiathar. Doahr kojonneddo, jamwrouwok oar ioar mweimweioang kang pilahwa pwiai. A David kangla apel kioang pwilihoahk irai en pwili kang.”
27Jesus pel pwa, “Sabbath wiawihdahng mihn kamwahupen armaj, a jaudi armaj oang mihn kamwahupen Sabbath.
28Ioar mehwa Nihn Armaj ioar Koaun apel Koaun in Sabbath.”
