Mareko 5:9-30

⁹Eme Jesuzi wiocnerâ muwec, “Ʒâŋege mo?” Wiocneme muwec, “No ʒâŋe‐nane Gurusâko, nâŋe bocjahazi juŋgopeneŋ irec.”

¹⁰Murâ ʒoɋac erâ numucnewec, “Nâŋe mâreŋ ʒi behenaŋte mi jâpec‐nâpozemec.”

¹¹Eme mâreŋ ira heâŋko becguru kâcɋene qondaŋko jumbiŋ.

¹²Eme demoŋ jaŋe Jesuzi mana‐jareme becmaŋko huniŋte âzâcnembiŋ.

¹³Mupie Jesuzi mana‐jareme demoŋ jaŋe ŋickonec wefurâ becmaŋko hupie bec jaŋe tapionec sururuerâ ra duŋ riqic fowec ira huhuc hâmombiŋ. Bec afecne mâcne, 2000 hâmombiŋ.

¹⁴Eme soŋaŋ jaŋe gasacke rarâ ŋic hae gie sâc jurambiŋ dâŋ binaŋ ejarembiŋ. Jazapie jaŋe wiac fuawec honeniŋte fisi‐fârembiŋ.

¹⁵Jesurao fisirâ honembiŋ: Ŋic demoŋ guru sâkohec juweczi maŋne wiŋkeme wamane â ŋaqihec ŋewec. Iŋuc ŋeme honerâ me kirâ domambiŋ.

¹⁶Eme wiac hone manac embiŋzi ine ŋic demoŋhec juwec ere binaŋ â bec jaŋere binaŋ mâmâc bajarembiŋ.

¹⁷Dâŋ i mana‐fârerâ Jesu e hae mâreŋ‐jeŋic beheocte numucnembiŋ.

¹⁸Eme Jesu e wokeo feme ŋic demoŋhec juweczi bâjâpeocte numucnewec.

¹⁹Eki ine qataracnehuc ʒiŋuc âzâcnewec: “Go haegao rarâ wiacfâcge jaŋehec juhuc Wofuŋzi gorao mâsi sâko bahuc ehâmo‐garekac irec biŋe ŋic jazazemec.”

²⁰Mume ŋic e rarâ, Jesuzi wiac ecnewec irec biŋe hae 10 ŋerawec mâreŋ ira jufârehuc ŋic jazame jaŋe manarâ secke‐fârembiŋ.

²¹Eme Jesu e wokeo ferâ ʒiŋucpec ware fisirâ moŋgeŋko waharâ domahame biac ŋic mâretec fisirâ tumaŋnembiŋ.

²²Ehapie mitific soŋaŋ moc, ʒâŋene Jairo, eki fisirâ Jesu honerâ kikefuŋnao fodaperâ fotariecnehuc

²³ʒiŋuc numucnewec: “Otâ‐nane hâmozo ekac, irec go warerâ megezi bâuarâ bâpiaŋketec juzejec.”

²⁴Âzâcneme manarâ rawec. Rahame ŋic guru sâko jaŋe bâjuŋ qâjuŋ ecnembiŋ.

²⁵Eme ŋondeŋ‐jeŋicko ŋokac moc juwec eki soc rohuc juhame jara 12 ewec.

²⁶Eme dokta bocjahazi erao gie bâipiehapie ʒâic wemo afecne manahuc juwec. Â irec furi moneŋ mafa‐ticne jarekume hesackewec. Eme sifu hucticne mi afeckehuc mâc ɋârâŋkecnewec.

²⁷Eme ŋokac eki hâcne Jesure biŋe manarâ ŋic ŋokac gâcne jaŋere ŋondeŋko juhuc râpefuŋnao rarâ ŋaqi‐ticne bâuawec.

²⁸I ʒiŋuc muhuc ewec: “Ŋaqi‐ticne sawa bâuarâ biaŋnuocmu.”

²⁹Bâuame izia socticne ʒickeme sahac‐ticne bâgunuckeme manawec.

³⁰Eme Jesu e tâpiri‐ticne moc wahame manarâ forisierâ wiohuc muwec, “Ŋaqi‐nane mozi bâuakac?”