1Jesus injang wijahu, inlahng nehn uhdahn ah kahnihmmwo, a nah sohnpadahk kan pel pwilihla.
2Nehn ah lel Sabbath, ih ken sapda padahk nehn jinakokehu. Mine min dir mine wijahu pwuriamweikihla nehn ahr rong ah padahk. Arai ken pwahpene nehn pwungarai, “Woalmene oaloahjang ia joangpwiai? Joangoan loalkoang dahioau mine ipoa? Imdoahr ih kak wia joangoan manman pwiai?
3Jaudi kahpinsoa wa me, nihn Mary, rien James, Joses, Judas apel Simon? Jaudi riah lihkoa ma kin minmine ipasai?” Arai ken kajohwe ih.
4A Jesus pwehng irai, “Wija ohroj johkohp kin woaun, ioarroar wija ma joh wahu in ih, ioar nehn ah wijahu, ipen ah peneinei.”
5Ioar ih johpwa wiahda manman oau nehn ah wijahu, a min johmwehu pwi ma ih kihda poah puwoa, kemwehuwihla.
6Ih ken pwuriamweikihla ahr joah pwojon. Jesus aluhjili nehn koujapw kan, padpadahk oang armaj kan.
7Mwerin, ih panginpene eijek roahmenno, kadarpijoang wad roahmen. Ih kioang arai manman in kajroahjang ngen jaus kan.
8Ih pwehng arai en johpwa wa mehkij nehn arai jeiloak oauwe, ioarroar jokonpas; arai en johpwa wijik mwinge ke pehk in jeiloak, ke mwani nehn ahr pwoaloj kan.
9Arai kak sandel, a arai en joah wahda joakid riahu mihn ngalngal.
10Ih pel pwehng arai “Nehn amwai pirin lel ekij wija, kamwai minminehr ipen arai ma kajamwo kamwai nehn umwaraihok, oaroh kamwai injang wijahu.
11A wijahkij ma arai johpwa nimen kajamwo kamwai ke nimen rong kamwai, kamwai diljang wijahu jiped jang pwirejpar in pwoalkoamwai mihn kapoahm oau me oang arai.”
12Min eijek roahmenno ken aluhpijoang kapahrak oang armaj ohroj arai en koaluhla apel wiliakapwla.
13Arai kahuj jang ngen jaus dir ipen armaj kan apel salipki le min johmwehu dir kemwehuwihla arai.
14Nahmwarki Herod rongda mehpwiai ohroj, pwa Jesus wadwadla wija ohroj. Epwi pwahpwahpwa pwa ma John Johnpoapdaij ioar ne pwuroahng mourda, Ioar kahrehda ih kak wia joangoan manman pwiak.
15Epwi pwa ih Elijah. Epwi pwahpwahpwa pwa johkohp men ih, doahroar epwi johkohp in mehjjok.
16Nehn en Herod rongda me, ih pwa, “Ioar John Johnpoapdaij me, ma ngoahi poaloahjang moange, ih ne pwuroahng mourda.”
17Pwa ih kadarla John en joaldi, ih pwa en peidek oang nehn kalpwuhj pwa Herodias, pahien riahu Philip ioar Herod wud painkihla.
18John Johnpoapdaij johkin uhdihjang koapwung oang Herod ah japwunngo, ih pwa, “Johpwa pwung koawoa painkihla pahien rioammwo.”
19Ioar kahrehda Herodias lioasoangkihda John, nimen kojukdi; a johkak;
20pwa Herod kin mijik John, pwa ih kidal pwa John woal pwung apel joarwi men. Ioar mehwa ih ken kin jiloahjang me nauna apel kin perenki rong ah sikesik kan, mihndahr ma nehn kapehdin kin soausoaula anjoau ohroj nehn ah kin rong.
21Doari Herodias kidalda anjoau mwehu rehnin en Herod noaisikdiho. Pwa rehnno Herod wiahda kamdipw oau oang nah joumaj kan, oang koaunin nah karejjok, apel oang armaj laplapin wein Galilee.
22Doari nihn Herodias jerpeinno pwokdo kahkahlek in kamdippwo; Herod apel sohn kamdippwo inenin perenkihda. Ioar Herod pwehngkihoang jerpeinno, “Mine mehkij koawoa anahne? Poaki ipoai, pwa ngoahi pirin kioang koawoa.”
23Ih ken kahula apel inoaukihdi pwa, “Ngoahi pirin kihwe mehkij joah lipilpil, mihnda ma pel oaloap in oai wei.”
24Jerpeinno dilla idoak ipen ah nohnohu, pwa, “Nohno, da ngoahi en poaki?” A ah nohnohu japoang pwa, pwa, “Moangoan John Johnpoapdaij.”
25Jerpeinno pwurlahng ipen nahmwarkiho, pwehng ih, “Noah nimen koawoa kihdoahng ngoahi apkas moangoan John Johnpoapdaij nehn oau pleis en!”
26Me ken kainjinjuwedihla nehn kapehdin nahmwarkiho; ih ken johpwa nimen kainjinjuwedihla jerpeinno pwa ih inoau mwohn sohn kamdippwo ohroj.
27Doahr ih ken pispis kadarla nah johnpei, pwehng pwa moangoan John Johnpoapdaij en wijikdo. Johnpeiho inlahr nehn kalpwuhjjo, poaloa jang moangoan John Johnpoapdaij.
28Ih pwurdo wa moangehu nehn pleis oau, ih ken kioang jerpeinno; jerpeinno ken wud kioang ah nohnohu.
29Nehn nihn John sohnpadahkkok rongda me, arai pwurla oaloa palwoaroa wahla jaripdi nehn joaujoau oau.
30Mwerin woaroakkok ahr pwurpene, arai pokonpene ipen Jesus pwa arai en kajalehioang me ohroj ma irai ne wiahda apel padahk ohroj ma arai kawoahwoahda.
31Armaj dir kin pwurpwuroa Jesus apel nah sohnpadahkkok kahrehda johla anjoau in arai mwinge. Ioar Jesus pwehngkihoang sohnpadahkkok, “Kisai inla kalahpwukla mijkoalkoal nehn japwsoahnno, wijahu ma kamwai kak koammoal.”
32Arai ken doauda pohn pohs oau pwa arai en inlahng kalahpwukla wija kij.
33A armaj dir kapang arai mwoakid doahr ken kidal da. Arai ken kijoulahng wijahu jang nehn kahnihmmwok, arai lelo mwohrai.
34Nehn en Jesus doaudihjang pohn pohsso, ih kapangda pokon koalik oau, ih ken ipwilkihda irai. Pwa arai doahroar polohn jihpw oau ma ne joh jileperai. Doari, ih ken sapda kawoahwoahng arai joang dir.
35Injoausik pene, nah sohnpadahkkok indoa ipoa, pwehng ih, “Maing, ne pwong a japwsoahn oau me.
36Ken kadarpijoang pokon oauwe, pwa irai en alwe nehn kahnihmw siksik kan apel koujapw koaroan kan pwa irai en pein dupukda kanrai mwinge.”
37A Jesus japoang irai pwa, “Kamwai kapwa kamwinge irai.” A irai pwehng ih, “Doari, koawoa mwehuki kamai en inla dupukda mwinge woahroar mwani silper riepwiki kamwingehki irai?”
38Jesus idoak, “Lopwonin pilahwa doapoa mine ipamwai? Kamwai kapang apel wadek.” Nehn ahr ne wadekda irai pwehng ih, “Lopwonin pilahwa limoau apel mwumw roahmen.”
39Jesus pwehng sohnpadahkkok en wiahda pwihn siksikpwi pokonno apel kamwindihoang irai pohn re kan.
40Irai ken mwindi in pwihnpwi, epwi wadepwiki a epwi wad limeijek.
41Doahr Jesus ken pwoakda lopwonin pilahwa limoau apel mwumw roahmen, jardahla nehnloannge kaping kalahngan oang Koahs. Ih ken sipwangpijoang pilahwahk kioang nah sohnpadahkkok pwa irai en nehkkoang armajjok. Ih pel nehkkoang arai ohroj mwumw roahmenno.
42Armaj ohroj mwinge oaroh moadla,
43Sohnpadahkkok dowihda luhwen pilahwahk apel mwummwok wiahda kiam eijek riahu.
44Woal ma pwili kang pilahwahk, irai me limekid.
45Mwerin me Jesus pispis pwehng nah sohnpadahkkok, arai en doauda pohn pohs oau jeila Bethsaida mwohn ih, oaloap jeddo, nehn ah pirin kadarpijoang pokonno.
46Nehn kadarpijoang arai, ih doaudahla pohn dol oau pwa en kapkap.
47Injoausikdi, pohsso ne mine oh nehn pwungen lehu, a Jesus kalkalahpwuk in poahrinjeddo.
48Ih kapang doahr en sohnpadahk kan engdehn jeijeijei nehn lehu pwa arai jei pallan enngo. Doari inlahng injohrehn, nehn pwungen kiloak jiluh apel wonou, ih inla iparai alu pohn lehu,
49a irai kapang ah allalu pohn lehu, irai pwa eni men,
50ioar irai rahukihda majpwehkda nehn irai kapangda Jesus. Ih ken pispisinnoar lallahng irai, pwa, “Kamwai sihkei! Ngoahi me, kamwai joah majpwehk.”
51Ih ken doauda pohn pohsso pwilihda arai; anjoauwohr enngo uhdi. Sohnpadahkkok pwuriamweikihla
52Pwa arai johpwa woahwoahki manmanno ma Jesus kamwingehki armaj limekiddo, pwa nehn kapehdirai pe ros oar.
53Irai kosohla lehu, lellahng Gennesaret peidi ipen jappwo, piroahdi pohsso.
54Nehn irai doaudi jang pohn pohsso, armaj kan pispisinnoar kidalda Jesus.
55Arai kijoupijoang wija ohroj sapda wahdohng ipen Jesus johmwehuwok pohn mihn wijik kan wija kan ma arai rong pwa ih mine.
56Apel wija ohroj ma ih kin inla, nehn kahnihmw siksik kan, ke nehn kahnihmw koalik kan, ke nehn likin kahnihmw kan, armaj kan kin kihdi nihrai johmwehu kan wijahn noasnoas kan, poaki en mweidoahng arai en pukkoang ikin ah likkoauwo. Doari, arai ohroj ma kin pukkoang ah likkoauwo kin sihkeida jang arai johmwehu kan.
