1Jesus apel nah sohnpadahkkok kijoula oaloap Lehn Galilee apel dauluhllahng oaloap pillo, nehn japwen mihn Gerasa.
2Jesus kerdihjang pohn pohsso, a woalmen ma ngen jaus dilingla ken aluhdo ipoa; ih indoa jang nehn joaujoau pwi, wija ih kin minmine.
3Joh armaj men kakkoang woallo, pel joal pahrang kan johkak joalihdi;
4pwa pehn dir ih kin joalkihdi joal pahranngok in poah apel in ehn, a ih kin kamweidpijoang joal pahranngok; johpwa emen kak koldi pwa ih sihkei.
5In rehn inpwong, ih kin allaluhjili nehn joaujoau kan, apel nehnwoallo in pohn dol kan, rahrahrahu koauwehla palwoaroa ki sakai ingkoang kan.
6Doari, ih kapangdahr Jesus jang wija doh, ih kijoula, kipdi mwohn ih,
7rahrahu, pwahpwahpwa, “Maing Jesus, Nihn Koahs Laplap! Dahioau koawoa nimen wiahng ngoahi? In oadoan Koahs, joah koalkoa ngoahi!”
8(Ih pwahki me pwa Jesus pwa, “Koawoa ngen jaus, injang ipen armaj menen!”)
9Jesus idoak ipoa, “Ia oadoamwen?” A woallo japoang pwehng ih, “Oadoaioa ioar ‘Karej’ pwa kamai min dir!”
10Ih ken engdehnki Jesus en joah kahujjang ngen jaussok nehn japwahu.
11A ipen wijahu, pwihnin pij oau minmineo, mwingmwinge in imwin dol oau.
12Ngen naunahk ken poakihda ipen Jesus en kadarla irai apel mweidoahng irai en inla dilloang nehn pijjok.
13Doari Jesus ken mweidoahng. Ngen jaussok ken injang ipen woallo, wud inla dilloang nehn pijjok. Dapwa pij riekid, kijoudihla duhla nehn lehu.
14Sohn apwali pijjok kaula nehn kahnihmmwo, nehn koaujoankan likin kahnihmmwo, pwehng armaj kan da wiawi. Doahr ihr ken inla kapang dahkij ma wiawi.
15Nehn ahr lel wijahu ma Jesus mine, irai liskihla ahr kapangda woalwa ma kin dirin ngen jaus mwouwoa, ne mwindi wijahu meleileidi, mine nehn likkoau mwehu, mwomwen armaj mwehmwehu men. Irai ken mijikda.
16A irai ok ma kadehdehki mijarai manmanno, irai pwehng ihr da ma wiawihoang woallo ma dirin ngen jaus apel mwomwen pijjok.
17Irai ken poakihda Jesus en injang nehn japwaraiho.
18Nehn en Jesus doaudahng pohn pohsso minno ma ngen jaus dilingla poaki ih pwehng ih, “Mweidoahng ngoahi pwa ngoahi en pwilihwe koawoa!”
19A Jesus johpwa mweidoahng, ih pwehng ih, “Inla in umwoammwo, ipen oamw peneineihok, pwehng irai doahr manman koalik ma Koaunno wiahng koawoa, apel doahr ah kalahngan oang koawoa.”
20Woallo ken inlahr pwahjili nehn wein Decapolis manman koalikko ma Jesus wiahng ih; irai ken inenin pwuriamweikihla.
21Jesus pwuroahng pwurla oaloap lehu. Pokon koalik oau aluhpene pidekihpene ih in poahrinjeddo.
22A koaunin jinakoke men, oadoa Jairus, rukdihoang in pwoalkoa,
23engdehnla nehn ah poakpoak, pwa “Maing, noai jerpein siksik kij nimwennoar mehdi. Menlau inla kihdahng poahmmwen pohn ih pwa en sihkeida apel kak mour.”
24Jesus uhda pwilihla joumajjo. A pokon koalikko pel kahujla. Wija ohroj nehn allo ken koaisla.
25Lihmen pel pwili mine wijahu, ma anki johmwehuin insa pwilpwil oaroain johnpar eijek riau.
26Ih ken roaproapoan mour ipen sohnwini dir, doadoahkkihla nah mwani kan ohroj. Apwen johpwa kaspoa, pwa pwen naunahla kahuka.
27Nehn en liho rongda doahr Jesus jang ipen armaj kan, ih ken sohlahng likinjarkin, pukkoangdi ah likkoauwo,
28pwehng pein ih, “Ma pwen ah likkoauohr ngoahi pukkoang, ngoahi nen sihkeida.”
29Doari, ih ken pukkoang en Jesus likkoauwo, a nehn anjoauwohr koarkoarin insahu enngengla; liho ken poahmda jang nehn palwoaroa pwa ih ne sihkeidahjang ah johmwehuwo.
30Nehn anjoauwohr Jesus poahmda sihkei kij injang ipoa, ih ken jipwjipweljili nehn pokonno, pwehng ihr “Inje ma pukkoang oai likkoauwe?”
31Nah sohnpadahkkok pwehng ih, “Koawoa kapang pwa pokonne koaisihla koawoa; a koawoa ken pwa ‘Inje pukkoang ngoahi?’”
32Jesus ken jipwjipweljili pohn pokonno pwa en kapangda inje ma wia mehu.
33A liho, nehn ah kidalda dahkij wiawihoang, ih ken majpwehkda roarroarroar, sohdo ipoa, rukdi in pwoalkoa, pwehng Jesus me ohroj.
34Jesus ken pwehng liho, “Noai jerpein, oamw pwojon ioar kasihkeida koawoa. Doari, alwe in peren pwa koawoa ne sihkeidahjang oamw johmwehu en.”
35A nehn ah lallallal, pakair oau lel ipen Jairus, jang in umwahu, ma pwa, “Nihmw jerpeinno ne mehdi; joah kadroapwoahki Johnpadahkken en indoa.”
36Jesus johpwa soahk; ih pwehng Jairus, “Koawoa en joah mijik, a koawoa pwojonnoar.”
37Ih ken johpwa mweidoahng emen en pwilihla ih, ioarroar Peter, James apel riahu John.
38Nehn ahr lel umwen joumajjo ih kapang doahr ahr loakloakoa apel joangjoangjoang
39Ih ken dilda pwehng irai, “Da kamwai loakloakloakoahki apel joangjoangjoanngki? Jerihn johpwa mehdi, ih moahmoahmoair.”
40Irai uruhrki apel kapiski ih. Doari, ih ken kadilihjang arai ohroj nehn ummwo, a mwerin, ih ukda jemen jeriho apel inah apel nah sohnpadahk jilmenno, ih ken dilda nehn wijahu ma jeriho okdekda.
41Ih ken kolda poahn jeriho pwehng, “Talitha koum,” ma woahwoahki, “Jerpein pwohrdahng!”
42Doari, nehn anjoauwohr jerpeinno ken pwohrdahng sapda allaluhjili. (Ih johnpar eijek riau) Arai ken inenin pwuriamweikihla mehkije.
43Jesus ken inoapwihdi arai en johpwa pwahpwahpwahjili mehkije; ih ken pwehng arai en kamwinge jerpeinno.
