San Marcos 5:9-30

⁹Aheve oporandu chupe: —¿Mara vo nde rer? —ehi. Ahe omboyevɨ chupe: —Che rer Legión. Esepia, ore rehɨi eté —ehi.

¹⁰Oporanduño chupe omondopaẽhɨ ãgua co ɨvɨ sui.

¹¹Ichui namombrɨimi setá cuchi ocaru vahe ɨvɨtrɨ rese yuvɨreco.

¹²Sese caruguar oporandu yuvɨreco chupe: —Ore mondopaño cuchi avɨterve eve —ehi yuvɨreco.

¹³Evocoiyase Jesús omondo caruguar sẽ ãgua ahe mbɨa sui. Ahe opa yuvɨroique cuchi avɨterve. Ahe cuchi retacuer dos mil tuprɨ vahe, ahe yuvɨnoña yuvɨraso ɨvɨvate sui ɨpa pɨpe ocañɨpa.

¹⁴Evocoiyase cuchi rãrosar yuvɨnoña osɨquɨyepave yuvɨraso imombehu ãgua tecuave, caha pɨpe rupi yuvɨrecoi vahe upe avei. Sese ava opa yugüeru sepia ‘¿mbahe pĩha?’ oya yuvɨreco.

¹⁵Oyepotase Jesús recosave, aheve osepia mbɨa caruguar vɨreco vahecuer yuvɨreco oyemonde tuprɨse oĩ, yaracua tuprɨse avei. Ahese oyembosɨquɨye tẽi yuvɨreco.

¹⁶Mbahe oime vahe caruguar vɨreco vahe rese, cuchi rese avei, ahe sepiasar omombehupa ambuae ava upe yuvɨreco.

¹⁷Evocoiyase ava Jesús upe: “Esẽ cohave sui” ehi yuvɨreco.

¹⁸Oha irise Jesús carite pɨpe, co mbɨa caruguar rerecosarer oporandu chupe supi oso ãgua.

¹⁹Ahe rumo, —Esoño nde rẽtave, nde mu pɨri. Aheve emombehupa Yar oporoaɨsusa pɨpe mbahe oyapo vahecuer nde rese —ehiño chupe.

²⁰Ahe mbɨa oso, omombehu opacatu tecua Decápolis rupi Jesús oyapo vahecuer mbahe sese. Evocoiyase ava opacatu, “¡Mara ehi rutei!” ehi tẽi yuvɨreco.

²¹Oyevɨse Jesús carite pɨpe ɨpa rovai oso, aheve oñemonuha atɨ ava yuvɨreco chupe. Ahe evocoiyase opɨtaño ɨpa popɨve.

²²Evocoiyase oyepota mbɨa mborerecuar tũparo pendar, ahe serer Jairo. Jesús repiase, oñenopɨha sovai,

²³aipo ehi chupe: —Che rayrɨ omano pota. Yaso, teremondomi tẽi nde po iharɨve imbogüera ãgua —ehi.

²⁴Evocoiyase oso supi. Ava rehɨi avei yuvɨraso supi.

²⁵Ipãhuve avei oime cuña doce aravɨter rupi suvɨ yepɨyere-yere vahe.

²⁶Iparaɨsú iteanga, setá oporoposano vahe ndoicatui imbogüera yuvɨreco omomandaivete catu iposanosa pɨpe yuvɨreco. Opa tuprɨ tẽi omondo mbahe vɨreco vahe, ɨvate catuño rumo imbaherasɨsa chupe.

²⁷Co cuña osenduse Jesús rese ñehesa, oguata saquɨcuei oso ava rehɨi pãhuve, iturucuar rese opoco.

²⁸Aipo ehi oyeupe oico: “Iturucuar rese apocose rumo, acuerara” ehi.

²⁹Ahe ramoseve voi ndasuvɨ yepɨyere iri. Ipare oyandu güetecuer yemoingatu tuprɨsa, ocuerase ombaherasɨsa sui.

³⁰Jesús rumo oyandu osẽse opĩratasa oyesui. Sese omahe guaquɨcuei cotɨ ava rese, ahese oporandu: —¿Ava vo opoco che turucuar rese? —ehi.