SAN MARCOS 5:9-30

⁹Co Jesús joanchiangui co ndac̈ho: ―¿Queẍén dinhi jaha? Co jehe espíritu jianha ndac̈ho: ―Janha dinhi na Legión ixin janha na anto tsje na.

¹⁰Co espíritu jianha anto joinchetsenhe ñao Jesús ixin senguixinha de ngain región mé.

¹¹Co ixin nttiha vintte anto tsje cocochi vajinea va chiaon rotté ná jna,

¹²mexinxin cain espíritu jianha joinchetsenhe ñao Jesús co ndac̈ho: ―Rroanha ni ra ngain cocochi taha co tanc̈hjanda ni ra sixinhi na ngaxinhi va.

¹³Cottimeja Jesús joanjo joachaxin, co cain espíritu jianha mé vac̈hjexin de ngaxinhi xí mé, co sajoixinhi ngaxinhi cocochi. Nttiha vintte inchin yó mil cocochi, co cainxin cocochi mé ndavinttecoloco va co coinga va xincanji va ngain lago co nttiha joingui va jinda co ndavintteguenxin cainxin va ixin vinttecjonhe va jinda.

¹⁴Cottimeja cain chojni que vaquingaria cocochi mé ẍaon na co coinga na joiquequín na chojni ngagaha rajna co icha chojni que vintte ngataon jngui. Co cjoi chojni mé joitsjehe na quehe conhe.

¹⁵Co are joiji na tti jí Jesús, vicon na tti xí que vechonda tsje espíritu jianha ojingá xa lonttoe xa co tají xa ndacoa. Co jehe na are vicon na mé, anto ẍaon na.

¹⁶Co cain chojni que vicon coequin na queẍén conhe tti xí que vechonda tsje espíritu jianha co queẍén conhe cain cocochi.

¹⁷Cottimeja cain na coexinhi na joinchetsenhe na ñao Jesús que satsjixin de ngain nonttehe na.

¹⁸Are Jesús coani barco, tti xí que vechonda tsje espíritu jianha joinchetsenhe ñao Jesús ixin rrocji ngain Jesús cai.

¹⁹Pero Jesús c̈hoha, co ndac̈ho: ―Sattji para nchiandoi co diquequinhi cain ni ichó cainxin tti joinchehe Dios nganji, co queẍén coiaconoaha.

²⁰Cottimeja tti xí mé sacjoi co joiquequín chojni que vintte regioen Decápolis cainxin tti joinchehe Jesús ngain jehe. Co cainxin chojni que coinhi, goan na admirado.

²¹Co are Jesús cjan toenxin lago iná conixin barco, cjoi anto tsje chojni ngain Jesús, co jehe nttiha tavehe ngandehe jinda.

²²Cottimeja joí ná xí que vaquetonha xa ngain nihngo nttiha, co vinhi xa Jairo. Are Jairo joí, vettoxin nttajochjihi ngain Jesús,

²³co anto joinchetsenhe ñao Jesús co ndac̈ho: ―Xannc̈hichjanhna ndajidenhe xan. Nttatsanha ñao, chjin na co ttín rá ngataha xan para rroxingamehe xan co sechon xan icha.

²⁴Cottimeja sajoicao xí mé Jesús. Pero anto tsje chojni cjoi cai co anto conttedo na ngaca Jesús.

²⁵Co ngacjén chojni mé vehe ná nc̈hí que venihi nc̈ha; ovechonda tteyó nano que veguenguihi nc̈ha jni.

²⁶Co anto tsje ngain xincheẍoan cjoi nc̈ha pero ẍonhi ẍoan vittja. Ojoexin joinchexinhi nc̈ha cainxin tti vechonda nc̈ha, pero icha co icha venihi nc̈ha.

²⁷Co are coinhi nc̈ha ixin Jesús vanchexingamehe tsje chojni, conchienhe nc̈ha ngacjén chojni co jimao catte nc̈ha lonttoe Jesús,

²⁸ixin vaẍaxaon nc̈ha co vandac̈ho nc̈ha: “Si rrocatte masqui jeho lonttoe Jesús, janha rroxingamana.”

²⁹Co are nc̈hí mé catte nc̈ha lonttoe Jesús, rato mé tavehe jni que jehe nc̈ha vechonda nc̈ha. Co conohe nc̈ha ngain cuerpoe nc̈ha ixin ondaxingamehe.

³⁰Cottimeja Jesús conohe ixin ná chojni ojoinchegonda joachaxin que chonda Jesús. Mexinxin ngaria Jesús co tsjehe ngayehe chojni co joanchiangui co ndac̈ho: ―¿Quensen catte lonttona?