San Marcos 5:9-30

⁹Orzeꞌ na Jesuuz rab mi yu: ―¿La lar? ―nam. Gazeꞌ nu nay rab yum: ―Ya̱ la̱ bee miily gun zigy de̱ naca̱ ―nay.

¹⁰Orzeꞌ tonaꞌ mnishbaay lom nu cueꞌ co chum yu lugaar zeꞌ.

¹¹Na par gyiꞌ bicy zeꞌ tonaꞌ la cuch zigy rded ma row ma.

¹²Orzeꞌ dela nuras zeꞌ mnishbaa dey lo Jesuuz. Gazeꞌ nu na dey: ―Bzuu nez de̱ ya̱ lo de cuch re gun orzeꞌ chu̱ꞌ de̱ nañ ma ―na dey.

¹³Orzeꞌ briic Jesuuz rishbeey nu gruu dey. Gazeꞌ nu bruu dey lo mbecy zeꞌ. Guꞌy nañ de cuch zigy zeꞌ. Orzeꞌ rzab la de ma bzu tiily ma par gyoow. Bet lag de ma lo nisyudoo. Gut de ma lo nis. Cyup la miily cuch zeꞌ gut ma lo nis.

¹⁴Orzeꞌ de yu nu rña de cuch zeꞌ gush dey carer ya niiy de coz nu guc lo de mbecy nu yuꞌ lat gyedz nu lo de mbecy nu yuꞌ ngush.

¹⁵Na ornu bruꞌña de mbecy zeꞌ lo Jesuuz nunu ornu bzaac dey mbecy nu bicy ni de nuras zeꞌ, zub yu, zuy shab yu, nunu byanap shcab niy, orzeꞌ tonaꞌ la gudzib dey.

¹⁶Orzeꞌ dela de mbecy nu bzaac coz nu guc zeꞌ mniiy lo de mbecy zigy zeꞌ lac mod guc nu de cuch zeꞌ nunu lac mod guc nu mbecy nu bicy ni nuras zeꞌ.

¹⁷Orzeꞌ brugyiꞌ rnishbaa dey lo Jesuuz nu ruum ledz dey.

¹⁸Na ornu guꞌ Jesuuz nañ barc zeꞌ, orzeꞌ yu nu bicy ni nuras zeꞌ mnishbaay lom nu cha num yu.

¹⁹Tees Jesuuz wansaan mi. Orzeꞌ nam rab mi yu: ―Yaa lo de famil nir nunu niir de coz ily nu bicy Ñgyoozh num ru. Niir nu Ñgyoozh gushni lagy mi ru ―nam.

²⁰Gazeꞌ nu mbecy zeꞌ gush nez yu zay. Orzeꞌ brugyiꞌ rniiy lo dela mbecy nu yuꞌ lo de yu ni Decápolis de coz ily nu bicy Jesuuz num yu. Orzeꞌ tonaꞌ la za nu ic de mbecy zeꞌ.

²¹Orzeꞌ Jesuuz guꞌm nañ barc gulaꞌm tub laꞌ gaꞌ dzu ruꞌ nisyudoo. Orzeꞌ tonaꞌ la mbecy zigy byatublaazh dey lom. Laab ruꞌ nisyudoo zeꞌ zum.

²²Orzeꞌ bruꞌña tub mbecy nu la Jairo, yu nu riib ic nañ tub yuꞌ nu rsyaꞌ mbecy riidz ni Ñgyoozh. Laab bzaac lay Jesuuz, orzeꞌ wes saay lom.

²³Nunu tonaꞌ la mnishbaay lom. Orzeꞌ nay rab yum: ―Iꞌña̱ se nu gat ziꞌl lañ. Cua̱a̱ ya̱ chan gal yaar ñii gun, orzeꞌ gyac ñi, nunu cui mbañ ñi ―nay.

²⁴Orzeꞌ Jesuuz za num yu. Tonaꞌ la mbecy zigy za ca dey ich mi gal rcyiꞌñ su la dey mi.

²⁵Orzeꞌ lat de mbecy zeꞌ ri tub biñ mñaa nu bzaꞌ trocyup ñaꞌn rshu reñ mi.

²⁶Zigy doctoor bicy nuy mi zañ lo guñaa. Mnit lo dela tiñ nim, nunu wangyac mi. Ca nu bicy ye zir ñi.

²⁷Na ornu guꞌ gyidag mi de coz nu bicy Jesuuz na, orzeꞌ bechaꞌm par ich Jesuuz lat de mbecy zigy zeꞌ, nunu gul yaam shab mi.

²⁸Gun mnii toom nu mas ñuu shab Jesuuz gal yaam, orzeꞌ gyac mi.

²⁹Orzeꞌ laab or la zeꞌ guca reñ zeꞌ, nunu gud lagy lam nu byac mi ni güii zeꞌ.

³⁰Lueg la gud lagy Jesuuz nañ lardoom nu bruu fers nim. Orzeꞌ bish cyam bgüiim par ich mi lat de mbecy zigy. Gazeꞌ nu nam: ―¿Cyu gul shaba̱? ―nam.