1Oh inminjoang jamwrou laplappok pwilihki joumajjok apel johnpadahk in Kojonneddok, pel sohn mwoalen koapwung laplappok ohroj, wiahda arai koajoandi. Irai joalihkihdi Jesus jihn, irai ukla ih ipen Pilate
2Pilate ken idoakkoang Jesus, “Koawoa ioar nahmwarkihn Mihn Jew?” Jesus japoang, “Koawoa ma pwa.”
3Nehn en jamwrou laplappok irai karkaraunki Jesus joang dirpwi,
4Pilate pel pwuroahng idoak ipoa, “Koawoa jehpirin japoang? Rong meohroj arai kadkadpoahki koawoa?”
5Jesus johpwa nimen pwahla lal oau a ioar Pilate pwuhnodkihda dauluhl.
6Nehn anjoau in joarwihn Passover ohroj Pilate kin oapwoahnki kajaldekihla emen sohn kalpwuhjjok ma armajjok poaki.
7A doari anjoauwo mine woal men, adanki Barabbas, ma pwili lollap naunahpwi joaldi nehn kalpwuhj pwa ih kojukdi armaj men nehn pingping in armaj pwi.
8Doari, anjoauwo ma pokonno dirla ihr sapda poaki ipen Pilate en wiahng irai joangoan kalahnganno ma ih kin wiahng irai mijkoalkoalwa.
9Ih idoak iparai, “Kamwai nimen ngoahi en lapwaddahng kamwai nahmwarkihn mihn Jew‑ok?”
10Pwa ih inenin kidal pwa jamwrou laplappok pangdohng ih Jesus pwa irai pihrinoang.
11Jamwrou laplappok kangoangehki pokonno pwa irai en poaki Pilate en lapwaddohng irai Barabbas.
12Pilate pel pwuroahng idoakkoang pokonno, “A da kamwai mwehuki ngoahi en wiahng woalmene ma kamwai kin panginki nahmwarkihn mihn Jew‑kan?”
13Irai rahukihlahng, “Kalohpwuhla ih!”
14A Pilate idoakkoang irai, “Pwa dihp dahioau ih wiahda?” Irai kapwa kakloakihla ngilarai rahuki, “Kalohpwuhla ih!”
15Pilate nimen kainjenmwahuwi pokonno, ioar ih jaladoang irai Barabbas; a mwerin o ih mweidoahng Jesus en pokpok, apel kioang irai en kalohpwuhla.
16Johnpei pwi ukla Jesus nehn kelin umwen koapnahu, irai panginpene ohroj johnpeihok ma wia kijehn arai pwihnno.
17Irai ken kalikkoauihkihda Jesus rohp pwijehn mwoal oau, pel pahda rahn suhkoa soaksoak pwi in mwomwen mwarmwar irai kihdahng pohn moange.
18Mwerin o, irai kin dairukdi moahn ih, pwahpwahpwa, “Nahmwarkihn mihn Jew‑kan en mour woaroai!”
19Irai kin pokihki moangehu pehri pas apel andipoa mijoa apel poadpwomwla mijen ih dairukdihoang mwohn ih.
20Mwerin irai kapwroa Jesus, irai kihjang ah rohp pwijehn mwoallo, kajpahlihoang ah likkoauwok. Irai ken ukla ih pwa en kalohpwuhla.
21Nehn irai allaluhla irai suhwoang woal men nehn allo, adanki Simon, mihn Cyrene, jemen Alexander apel Rufus. Ih allaluhdohng nehn kahnihmmwo jang nehn a weiho, a johnpeihok iponngoang en wahda en Jesus lohpwuhwo.
22Irai ken uklahng Jesus wijahu ma adanki Golgotha, ma woahwoahki, “Wijahn Sihn Moang.”
23Irai jongin kioang ih wain doalki joangoan wini oau ma adanki myrrh, a Jesus johpwa nim.
24Doari, irai ken kalohpwuhla, apel nehkpijoang ah likkoauwok nehn pwngarai, wijwijki dama emenemen pirin anki.
25Kiloak duwoau inminjoang anjoauwo irai kalohpwuhla Jesus.
26Insing oau mine pohn lohpwuhwo ma kawoawoahda kahrpoan ah lohpwuhla, ma pwa, “Nahmwarkihn mihn Jew‑kan.”
27Irai pel kalohpwuhla lollap nauna roahmen pwilihki Jesus, emen mine in ah loap moaun a emen loap meing.
28Ioar pirin doahr pwoaidahn lalin Puk Joarwi, ma pwa, “Ih ken pwili wadwaddoang armaj dipannok.”
29Armaj ohroj ma kin alu wijahu kin isik moangoarai apel lahlahwe Jesus, “Aha! Ioar koawoa ma kak koauwehla Umw Joarwiho, apel pwuroahng kouda nehn rehn jiluh!
30Apkas kerdihjang in lohpwuhen apel doaroahla pein koawoa.”
31Jamwrou laplap apel johnpadahk in Kojonneddo pwili kapwroa Jesus pwahpwahpwahpene, “Ih kapisla epwi, a johkak kapisla pein ih!
32Kisai kapang Messiah, nahmwarkihn Israel, kerdihdohjang in lohpwuhen apkas, kamai kapwa kamehlele ih!” Lollap roahmenno ma pwili lohpwuhlahu, ara pel lahlahwe ih.
33Injauwajjo ros oau indihoang pohn jappwo pwon oaroain awa jiluh.
34A kiloak jiluh Jesus kakloakihla ngiloa, ih pwa, “Eloi, Eloi, lema sabachthani?” ma woahwoahki, “Oai Koahs, oai Koahs, amwda koawoa ke moalkoahla ngoahi?”
35Epwi armajjok ma pwili mine wijahu, nehn irai rong ih, irai pwa, “Rong, ih pangpangin Elijah.”
36Emen irai ken kijoukihla limw oau kaduhdi nehn wain siksik dupkoa oau, kioang in imwin suhkoa pas, ih koudalahng in oawoan Jesus a ih pwa, “Jowi, kisai kapang ma Elijah pirin indihdo kihdihjang ih in lohpwuhen!”
37Jesus rahrahula, ih kadarla ngenin.
38Kahdenngo ma kin poaroa mwoal joarwiho nehn Umw Joarwiho soahroakpijoang nehn pwunge jang puwoa lel pah.
39Koaunin johnpei men, ma uhda oh in mwohn lohpwuhwo kapang mwomwen en Jesus mehdi. Ih pwa “Mehlel pwa woal mene uhdahn nihn Koahs!”
40Lihpwi pel pwili mine wijahu, kapkapang, a irai ekij dohjang. Irai ioar: Mary mihn Magdala, Salome, apel Mary inen James siksikko apel Joses.
41Ioar irai pwiai ma kin pwilpwilihjili Jesus pwa irai en kin papah ih anjoauwo ih mine Galilee pel li dir pwili mine wijahu, ma pwili Jesus indoahjang Jerusalem.
42Allaluhlahng injoausik ioar anjoauwa Joseph mihn Arimathea Ih kijehn sohn Mwoalen Koapwung Laplappo ma armajjok kin woaunki; ih kin pel pwili joujouwihdo Wein Koahs. Doari, rehnno, pwa ih wia rehnin koaunopda (rehnwa mwohn Sabbath). Joseph inla ipen Pilate, johpwa perki mehkij, pwa ih en poaki palwoaroan Jesus.
44Pilate pwuriamweikihla ah rongda pwa Jesus no mehdi; ih ken pangindo koaunin pwihnin johnpei men pwa ih en kadehde ipoa ma mehlel pwa Jesus no mehdi.
45A mwerin ah oaloa kadehde jang johnpeiho, ih kapwa mweidoahng Joseph en oaloa palwoaroan Jesus.
46Joseph dupukda likkoau linen oau, ih lapwaddi palwahrro jang in lohpwuhwo, kidimkihpene likkoauwo, apel nekiddi nehn joaujoau ma wiawihda nehn sakai oau. Ih ken kasahpwroahng sakai koalik oau poaroahkihla wijahn dildahn joaujoauwo.
47Nehn anjoauwo ma mehpwiai wihwiawi, Mary mihn Magdala apel Mary inen Joses, ira widiwidahli apel kadehde mwehu wijahu palwoaroan Jesus liklikdi.
