LUKA 7:5-29

⁵Nakuti iye ana lufoi kwene-kwene na wanthu wa m'dziko lathu lino. Ndipo iye watikonzera pomwe nyumba ya kupembera.”

⁶Na tenepo Jezu adayenda nawo. Pomwe adafika pafupi na pamuipo, ntsogoleriyo adatuma axamwali wace kuti akamutambire na kukamuuza kuti: “Mbuya, lekani kubzidedemesa thangwe ine-pano ndiribe kuthemera kuti ndikucemereni mubere pantsaka pangu pano.

⁷Na tenepo ndikhalibe kuthemera kudzakucemerani. Napo mucirewa na kuno bzomwe bzinfunikabzo nyabasa wanguyu an'limbe.

⁸Napo ine ndine munthu omwe nimbatongedwambo na akulu wangu. Na tenepo ine ndina acikunda omwe ndiri kutongambo. Ndikauza m'bodzi kuti: “Ndoko!” Ndipo iye ambayenda. Ndikauza winango kuiti “Bwera!” Ndipo iye ambabwera. Mpaka nyabasa wangu ndikamuuza kuti, “Cita ici!” Ndipo iye ambacita.

⁹Pomwe Jezu adabva mafala yamweyale adadabwa naye. Ndipo iye adaceuka kuna wanthu omwe akhamutewerawo aciti: “Ndiri kukuuzani kuti kucokera pham'pha na pham'pha la Jirayeri ndikanati kuwona munthu ninga omweyu.'

¹⁰Pomwe wanthu akhadatumidwawo adabwerera kumui adakagumana nyabasayo walimba kale.

¹¹Pakupita ntsiku zing'ono-ng'ono, Jezu adayenda na ateweri wace kumzinda wa Naimu. Ndipo nthithi wa wanthu azinji ukhamutewerambo.

¹²Pomwe adafika pafupi na cipata ca mzindayo ndipo adaguma wanthu omwe akhayenda kukapendesa mwana wa mansiwa omwe akhali iye yekha. Ndipo nthithi wa wanthu azinji ukhamuperekeza.

¹³Pomwe Mbuya adawona mansiwayo adamubvera ntsisi kwene-kwene, acimuuza kuti: “Leka kulira!”

¹⁴Ndipo iye adafendera pakhana baulupo, acirikhuya. Na tenepo wanthu omwe akhadanyamula adaima. Ndipo iye adalewa kuti: “Mulumbwana, lamuka! “

¹⁵Pamwepo mulumbwanayo adalamuka aciyamba kulewa-lewa. Na tenepo Jezu adamupereka kuna mai wace.

¹⁶Ndipo wanthu wentse adabva mantha; acimbatumbiza Mulungu, aciti: “ Mpolofeta nkulu wabwera pakati panthu pano! Mulungu wabwera kudzathandiza wanthu wace lero!”

¹⁷Ndipo nkhaniyo idabveka kuJudeya kwentse, na madziko ya pafupi.

¹⁸Ndipo ateweri wace Juwau adamuza bzentsenebzi.

¹⁹Ndipo Juwau adacemera ateweri wace awiri, aciwatuma kuna Mbuya kuti akamubvundze kuti: “Kodi ndiwepo omwe tiri kudikhirayo? Ayai an'dzabwera pomwe winango?”

²⁰Pomwe iwo adafika kuna Jezu adalewa kuti: “Juwau M'batizi watituma kuti tidzakubvundzeni kuti, ' Ndimwepo omwe tiri kudikhirayo? Ayai an'dzabwera pomwe winango?”

²¹Panthawe imweyo Jezu adalimbisa wanthu matenda yakusiyana-siyana. Ndipo adacosa wanthu mizimu yakuipa. Ndipo dapenyesa pomwe maso azimola azinji.

²²Ndipo Jezu adawatawira aciti: “Ndokoni mukamuuze Juwauyo bzentse bzomwe mwabva na kuwaona kuti: Azimola ali kuona, anyakulemala ali kufamba, anyamapere ali kupozedwa, ndipo anyakusauka ali kupalizidwa nkhani ya bwino.

²³Wakusimbidwa ngule omwe anisaya kuipidwa na ine.

²⁴Pomwe ateweri wa Juwau adayenda, Jezu adauwbvundza wanthu bza Juwau kuti: “Mwakaonanyi mudambo? Mtete wakuvungika na condzi?”

²⁵Kodi mudakaona ciani kumweko? Munthu wakubvala bwino? Nakuti wanthu wakubvala bwino ambatumikira m'nyumba za azimambo.

²⁶Tsono mwakawonanyi? Mpolofetapolofeta? Inde, ndiri kukuuzani kuti iye amposa mpolofeta.

²⁷Nakuti omweyu ngule omwe adanembedwa kuti: “Ndin'dzabakatsogoza mtumiki kuti adzakukondzerere njira.

²⁸Tetekerani! Juwau ni mkulu kuposa wanthu wentse wa pantsi pano.Tsono ule omwe ni ng'ono mu Umambo bwa Mulungu ni mkulu kuposa Juwauyo.”

²⁹Na tenepo pomwe wanthu na anyakupimisa m'tsonko adabva mafala ya Jezu adadziwisisa kuti njira ya Mulungu njakulungama. Nndipo tenepo iwo adabatizidwa na Juwau.