San Lucas 7:5-29

⁵us au Israel kwalta pashinamtu akwa, au kammu yal sarɨt akwa, kizara.

⁶Suasne Jesúsne uspakasa ɨra. Jesús yal kashara akane, suldarune izmuruza Jesús tura ɨninnat kit ussa kaizara: —Ap Anpat, an kashara amun. Anne aizapmun. Nune ap yalta napmun.

⁷Na tɨnta chi akwa, nane nua ɨtchish, nua saina. Katmizna ap kiwainmikasha “wat pari” kiztane, wat parɨnazi.

⁸Mamaz an katsa mikwane nawa ɨnintu. Nakas suldaruruza ɨninnamtus. Mamazta “ɨt” kizkane, ɨm. Mamazta “at” kizkane, am. Ap kiwainmikasha, “sun sari” kizkane, sam. Katmizna ap kiwainmikasha “wat pari” kiztane, wat parɨnazi.

⁹Sun suldaru kaizta aizpa mɨrawane, Jesúsne iztasparɨt. Kun kit akkwan kanpamtuza kaiznara: —Nane Israel awaruztas sun suldarukana iznarachish. Usne ap pit wat nɨjkultu. Usne na kaiztu aizpa min kit piankamtu.

¹⁰Ɨnintɨttuz kaiyarawane, uspane kiwainmikasha wat parɨt wanmalara.

¹¹Sun kitpane, Jesúskas paiña kammuruzkasa akkwan mamaz awaruzkasa Naín pɨpulura ɨara.

¹²Pɨpulu napmukin kashara piannakane, uspane ampu irɨtta muamturuza izara. Akkwan pɨpuluras awakas irɨtmikasha kamna ɨara. Sun ampu irɨtpa ashampane sun pɨpulura uzta. Paiña painkulne irɨt. Maza painkulmin mɨjazi.

¹³Painkul irɨtpa akkuhshta iztawane, Jesúsne us akwa tayal kit kiwainshit kit kaizta: —Azmun, kizta.

¹⁴Suasne ɨt kit ataúdta paara. Ataúdta paamtuasmin, irɨtta muamturuzne kunara. Suasne Jesúsne irɨtta kaizta: —Musittu, kuhsakti, kizta.

¹⁵Suasne irɨtmikane kuhsak kit paramɨzta. Jesúsne ussa akkuhshta chɨhkara.

¹⁶Sun izarawane, wanne ishkuat kit kaizara: —Diosne kwisha wari. Usne aumɨza Dios pit kainammmikasha ɨninta. Diosne paiña kwalta kiwaina ara.

¹⁷Wan awane Judea suraskas kasha suraskas Jesús kit aizpa piankamara.

¹⁸Juanpa kammuruzne sunpa ussa kaizara.

¹⁹Juanne ussain paas kammuruza akwara. Usne usparuza Jesús tukin ɨninnara ka mɨmana: —¿Nune Diospa ɨnintamikakish? ¿Mamazta tɨrizanas? mɨmaara.

²⁰Sun Juanpa kammuruzne Jesústa aat kit kaizara: —Juanne, sun munnammikane, aumɨza ɨninara ka mɨmaana: ¿Nune Diospa ɨnintamikakish? ¿Mamazta tɨriznas? mɨmaara.

²¹Sun urain Jesúsne Juanpa izmuruzpa iztakin akkwan ishturuza wat paninnara. Naizturuzakas wat paninnara. Saliztuza puzninnara. Akkwan kasu sɨptɨttuza kasu izkulninnara.

²²Suasne Jesús usparuza sɨnkanara: —Ɨt kit Juanta u izara aizpakas u mɨara aizpakas ka kaiztain: “Mane kasu sɨptɨttuza kasu izkulninamtu. Chasachiruza chaninnamtu. Aya pɨtta ishturuza sɨnam sanamtu. Mɨkaintuza mɨninnamtu. Irɨttuza kuhsninnamtu. Puizaruzne Dios watsal pit mɨamtu.

²³Chiwazha na kit aizpakas na kaizta aizpakas chɨhkamtuchimikane, wat puranazi. Mama nawa nɨjkulmɨzti,” kiznara.

²⁴Juanpa ɨnintuz tas puzarawane, Jesúsne awaruza akwanat kit Juanpa ka kiznamɨzta: “Pul sura ɨarawane, ¿Chima izanas une? Tɨnta inkwane pakane, chiwazha pɨtne ulpiantu. An ampune, Juanne, pɨtkana ulpiantachi, tɨnta akwa.

²⁵Sua ɨarawane, ¿Chima izanas une? Sua ampura watsal pĩn kwarɨt izarachi. Mɨrain. Ampune watsal pĩn kwaarɨtkas akkwan wat kumira kwarɨtkas gobierno awakana uzamtu.

²⁶Sua ɨarawane, ¿Chima izanas une? ¿Diospa kainammmikasha izamanas? Watcha. Une Dios kainammmikasha izara. Usne an katsa kainammmika azi.

²⁷Juanpa Dios pɨnkɨhta ka parɨt: ‘Izti. Nane ap ɨninmikasha nukin an ñancha ɨninnash. Usne up mi watsanazi,’ ka parɨt.

²⁸Watcha kaiznamtus. Juanne wan awaruzkin an tɨnta i. Juan an tɨnta arakas, an we tɨntamikane, Dios ɨnintura uztumikane, Juankin anza tɨnta i,” ka kiztus.

²⁹Jesús kaizta aizpa mɨarawane, akkwan awakas, gobierno pial sapmuruzkas us kaizta aizpa nɨjkulat kit kaizara: “Dios watcha i.” Sun akwa, Juanne usparuza pira munnanarɨt.