LUUKA 7:5-29

⁵haali/ a’di enki kal bana mo dhali a’di nyaŋki ana gu’b gi montul is bana mo be.

⁶Dhala Yesus yaki’d mo nyaḵki uni mo. Ki a’di diki si’d pa is mo naskina/ tani amancil ma askar iss ’kwanimpa imudhe’d hashki imugum piti e a’di mo mmo/o a’di gwo mo ki: Tap̱a, dhalku/ ki mur is pini mo ma haali/ aha/ tana ji gi ha me’d mo yisa jin mina /e yayu/ eya galgin gu’b pem mo.

⁷Wakan aha/ dinaki ṯosh ki aha/ tana ji gi ha me’d mo mmoyayu/ i /e mo. Hili oyi gwo mo ma dhali dhalki c̱iŋkinam pem minu wac̱ mo.

⁸Haali/ aha/ tana wathi/ jin karkunu ’ko’d e moshirr mo dhali i/askar ’koni me’d pem mo dhali aha/ okina jan ’deŋ kamu/ gwo mo ki: Yaku/ mo ma tani, dhali a’di yaki’d mo be, dhali e jaŋ kamu/ ki: Yayu/ mo ma tani, dhali a’di yaki’d mo be. Dhali e c̱iŋkinam pem mo tani ki: Miiyi to yansan mo ma tani, dhali a’di miiki a’di mo be.

⁹Ka Yesus ciḵki gwo yansan mo tani a’di merki’d mo gom a’di mo dhali a’di ki ṯuka bor mo dhali owa waambuhany ’kwani gwo mo kun baṯẖi a’di nsho’k mo ki: Aha/ ṯora um gwo mo ki aha/ dinaki gam jan ’deŋ kamu/ e ’Kwani ma Israyiil jin ta’d gi moŋgam gwo is jin wakansan mo be.

¹⁰Dhali uni gwansan kun hashkunu mo tani uni doḵki bway pa mo ka nyaŋ’ko’d mo tani uni gamki c̱iŋkina/ ’borkina is mo be.

¹¹Yan’ko’d ki ’dishe/ mo tani a’di yaki’d mo e ’peŋkuman bampa/ jin yuḵu ka Naayiin mo dhali nyaḵki imanciḵ a’di gwo mo dhali awaambuhany ’kwani caaca kagahara mo nyaḵki ii ki a’di mo be.

¹²Ki a’di ’dishki ’twaŋkala goŋ ’peŋkuman bampa/ is mo tani hili mo mo ma, wathiŋ kamu/ jin wuki’d mo a’di ḵalkunu ka pije/ mo a’di ta jasi ya/ ṯal ’deŋ gana/ jin di’di kum mo dhala yim a’di wun ma kaṯẖ mo. Dhali adhana buhany ’kwani caaca mo ’peni ’peŋkuman bampa/ nyaḵki ’ko ka yim mo be.

¹³Dhali ki Tap̱a p̱arki’da yim e mo tani a’di hilki’da hil ka ’thime/ ap̱owa yim mo dhali owa yim gwo mo ki: Dhalku/ ki ko mo ma.

¹⁴Dhali a’di p̱u’dki’d mo dhali ta aciny jwa is ki me’d mo dhali uni gun hankina ci mo tani doshkin naskina/ mo. Dhali a’di ki o gwo mo ki: Wathin dhuru’c, aha/ ona /e gwo mo ki: Cuyi mis mo ma.

¹⁵Dhali wathi/ jin wuki’d mo tani c̱a’bki’d ki mis mo be dhali a’di ṯelki gwo ’pen mo mmowal ’twa/ mo. Dhali a’di ki c̱i a’di ki kum mo be.

¹⁶Dhali moŋḵo/ is bu’th uni ’baar mo dhali uni karkina Arumgimis ki ca mo mmo/o gwo mo ki: Adhana manc̱i gwo ma Arumgimis a’di cukunu mo e bwam ana mo! Dhali, Arumgimis a’di buṯki’d e ’kwanim piti mo be!

¹⁷Dhali gwo yansan gom a’di mo tani a’di yaki’d ki lala’th mo e bampa/ gi ’Kwani Yahuudiyya ’baar mo dhali eya ris bampa/ kun ’kon ka kukul is mo be.

¹⁸Dhali imanciḵa Yohaan gwo uni ṯorki a’di gwo mo goma ris to gwansan mo be.

¹⁹Dhala Yohaan yuḵki imanciḵ gwom piti isu/ mo mmohash uni mo e Tap̱a mo mmo/o gwo mo ki: A/e ta a’di jin midi yayu/ mo ’taa? Walla aman mina hil jaŋ kamu/ mo?

²⁰Dhali ki ’kwani p̱u’dkin mo e a’di mo tani uni o a’di gwo mo ki: Yohaan jin ta’da manmiiya mii ki yi’de/ mo tani a’di hashki am i /e mo mmo/o gwo mo ki: A/e ta a’di jin midi p̱u’du/ mo ’taa? walla aman mina hil jaŋ kamu/ mo?

²¹Dhali e mo c̱aan mo tani a’di wac̱ki ’kwani ka ris mo kun ’kosha ’ba’th mo dhali kun doru ki isa nyor mo dhali ka rum thus kun nyo/on mo dhali ’kwaniny ja’da/ ka ris woṯẖkina a’di mo mmomish mo mo be.

²²Dhali a’di ki thoḵ uni gwo mo ki: Iiku/ mo ma dhali ṯora Yohaan gwo mo gom to kun p̱arkina um e mo dhali ciḵ mo be ki ’kwani kun tana ja’da/ mo bu’thki momish mom buni mo dhali ’kwani kun ta ŋwol mo tani iin ki sho’k mo dhali uni gun ’kosha monthus mo tani dhelelkunu is mo be dhali uni kun tana ’diye/ mo tani ciḵki gwo mo dhali uni gun wukin mo tani cukunu mis mo dhali uni kun hatha’ko’d mo tani tanki gwom ’boro’d jin c̱ikunu uni mo be.

²³Dhali mom’bor mii gom a’di jin diki gam to jin kol a’di mo e aha/ mo be.

²⁴Ki ’kwani kun hash ma Yohaan iikin mo tani a’di ṯelki gwo ’pen mo mmo/owa waambuhany ’kwani gwo mo isi gwo goma Yohaan mo ki: Atinta i/iikina um ka pije/ mo e mombwaasho mo mmohil mo? Apil jin yiḵinkina ’tham is mo ’taa?

²⁵Atinta i/iikina um ka pije/ mo mmop̱ar e mo? Wathi/ jin hithi burrinye/ jin na’bula/ na’bul mo ’taa? Hili mo mo ma uni gwansan kun ’kokin mo mmohi’th burrinyeny jaro/ jaro/ mo dhali mmo’ko ’kom ’penkap̱an mo tani uni ’kon mo e gu’b ma maliḵ mo be.

²⁶Atinta i/iikina um ka pije/ mo mmop̱ar e mo? Amanc̱i gwo ma Arumgimis kadhamo/ mo ’taa? Nye, aha/ ṯora um gwo mo dhali amanbola manc̱i gwo ma Arumgimis kadhamo/ e mo.

²⁷A’di yansan ta a’di jin ’kwarkunu gwo mo ki: Hili mo mo ma. Aha/ hashkina agum bway pem nṯwa/a/ e jis/em pini mo, a’di jin midi thoson bway pini nṯwa/a/ gom /e mo be.

²⁸Aha/ ṯora um gwo mo ki: E bwaman uni gwansan kun dhodhu mo e bwam up̱ mo tani jan ṯal ’deŋ kamu/ yisa di’da jin ca’d jin bolki’da Yohaan e mo hili isi ciki/ a’di jin p̱isi’d mo e Bampa/ ma Arumgimis mo tani a’di i/eḵki’d ki a’di mo be.

²⁹(Ki uni ciḵki gwo gwansan mo tani aris ’kwani ’baar mo dhali imantera thulp̱a/ karkina Arumgimis ki a’di jin ta jaŋ ḵar/e mo mmomiikunu uni ki yi’de/ mo ki mii yi’de/ jin miikin ma Yohaan mo be.