Ruka 7:5-29

⁵Juteu tõ pyno. Atamorepatoh tyripose roropa eya yna atamorepatohme. Morara exiryke kyryh kaxiko, aomipona, tykase toto Jezu a.

⁶Naeroro toto maro toytose Jezu. Mame moe hkopyra toehse ahtao tope tõ tonyohse ropa sajẽtu a, Jezu maro toto oturutohme ropa. Morarame tõsẽpatakãmase toto. Ynara tykase toto Jezu a, sajẽtu omihpyry tokarose eya xine, —Oserekohmara exiko ytapyĩ taka ooepyry poko. Tuisa konõto kara ase nykã rehne.

⁷Ime pyra roropa ase. Naeroro ytopyra roropa ase oya ihxipỹke jexiryke, nykã rehne. Õmiry ke rokẽ ypoetory ikurãkako aekurãkatohme ropa, nykã rehne.

⁸Ywy roropa tosẽke ase, typoetoke roropa ase soutatu tõ ke, “Ytoko,” karyhtao ya, ytõko ypoetory mana, jomipona. “Osehko,” karyhtao imepyny a, oehnõko roropa mã ya. “Enara tyriko,” karyhtao ya, tyrĩko mã toh roropa jomipona. Moro saaro mase õmiry ke kurãkõkara kurãkary ropa waro mase, nykã reh sajẽtu, tykase nenyohtyã Jezu a.

⁹Mame morara kary totase ahtao Jezu a, —To! tykase. Tõsenuruhkase. Mame tymarõkomo a toeramase ynororo, ynara tykase eya xine, —Tonetupuhse ywy mokyro a yronymyryme. Juteukara mokyro repe yrome jenetupuhno. Mokyro panõ onenepitopyra reahse Izyraeu to htao. Morara exiryke inamoto kurãkãko ropa ase, tykase eya xine Jezu.

¹⁰Mame mokyro poetory tõ toytose ropa, tosẽkõ tapyĩ taka. Moro tao kuranõpokara kure ropa tonese eya xine, toekurãkase ropa, Jezu omiry ke rokene. Enara.

¹¹Moromeĩpo imepỹ pata pona toytose Jezu Naĩ pona, typoetory tõ maro. Tuhkãkõ roropa toytose Jezu maro.

¹²Mame pata apuru eutary pota tao tooehse tahtao xine ekepyry aronanõ tonese eya xine. Pytỹpo mũkuru kynexine aorikyhpyry, toirõ kynexine imũkuru. Mame tuhke patapõkõ mokyro maro toehse, pytỹpo maro zonemyry enese.

¹³Morarame mokaro eneryke tyya samũ tykase Jezu tukurohtao. Toenupunase roropa ynororo pytỹpo poko. Ynara tykase eya, —Xitara exiko, tykase eya Jezu.

¹⁴Morarame toytose ynororo, ekepyry ẽ apose. Mame aronanõ totypohse ahtao ynara tykase Jezu, aorikyhpyry a, —Aimo owõko ty, tykase eya.

¹⁵Mame sẽpe towõse ynororo. Mame tõmitase ropa ynororo. Mame Jezu a tynẽsemãkahpyry ropa tokarose ropa jeny a.

¹⁶Moro eneryke tyya xine tõsenuruhkase toto. Kure Ritonõpo tyrise eya xine. Ynara tykase toto, —Kure kuhse mase, Ritonõpo. Ritonõpo omiry poko urutõ imehxo exikety kymaro xine mana. Kypynanohse xine Ritonõpo tooehse, tykase toto.

¹⁷Morarame Jezu tokãtose eya xine Juteu tõ patary punero, imehnõ patapõkõ punero, enara.

¹⁸João poetory tomo a Jezu ehtopõpyry tokarose ropa tosẽkomo a. Mame asakoro typoetory tõ tykohmase ropa tyya.

¹⁹Mame toto enyohne ropa toto oturupotohme ropa Jezu a. Ynara tykase João, eya xine, —Ynara kahtoko Jezu a, “Ritonõpo nymenekahpyry eraximãko ynanase. Ynoro hmahno? Ynorome pyra awahtao, imepỹ eraximãko ynanah?” kahtoko ke Jezu a, tykase João tynenyohtyamo a.

²⁰Morarame tooehse toto Jezu a. Ynara tykase eya, —Ahno ẽpurihkahpõ yna enyohno oya yna oturupotohme oya. Omoro toko hma, “Oehnõko mana,” katopõpyry João a. Ynorome pyra awahtao imepỹ eraximãko ynanah? tykase toto Jezu a.

²¹Morarame mokaro morotona toytose ahtao tuhke kurãkõkara kurãkãko Jezu kynexine. Inyrokurukõ roropa tymynyhpãkapose ropa eya. Jorokohpãkõ roropa kure ropa tyripose eya. Tonurãkara roropa tonutanohpose ropa eya.

²²Morarame ynara tykase Jezu João nenyohtyamo a, —João a ytotoko ropa. Zurutatoko ynyrihpyry poko, onetahpyrykõ poko, onenehpyrykõ poko, enara. Ynara enẽko matose, tonurãkara kure osenuhmãko ropa mana. Ytoytopynỹpotõ kure ytoytõko ropa mana. Xikihxikihme ytoytõko mã toto. Ipũ imotatyã kure exĩko ropa mana. Otato pyra aehtyã otato exĩko ropa mana. Aorihtyã ẽsemãnõko ropa mã toto. Te, kure Ritonõpo ehtoh waro pyra exiketõ tuarõtãko mã toto Ritonõpo omiry poko, enara.

²³Mame tãkye kuhse matose exĩko jenetupuhkehpyra awahtao xine, poremãpyra awahtao xine, kahtoko João a, tykase Jezu eya xine.

²⁴Mame João nenyohtyã toytose ropa toto ahtao, ynara tykase Jezu imoihmãkomo a João poko. —João maro mytoatose ahno esaka pyra. Oty enesehxo mytoatose morotona. Pyrouimo panõ tyryrykane naronarory enese mytoatose repe? Orutua jamitu kara enese mytoatose?

²⁵Onoky enese mytoatose? Kurãke autupohtohpyry eneseh mytoatose? Yrome kurãke autupohtotyã tapyi kurã tao rokẽ mã toto, pata esã tapyĩ tao roropa mã toto.

²⁶Kuurutoko. Onoky enese mytoatose? Ritonõpo omiry poko urutõ enese mytoatohse? “Ỹ,” kahtoko, kuezuhtoko. Ynara ãko ase oya xine, Ritonõpo omiry poko urutõ motye exikety kuhse tonese oya xine, João mokyro.

²⁷Etatoko ke, mokyro poko ynara tymerose Ritonõpo omiryme, “Ynenyokyhpyry mosero, ãko Ritonõpo. Osemazuhme mosero aropõko ase oesemary rineme samo. Imehnõ tuarõtanohneme mana,” katopõpyry Ritonõpo a tymerose mokyro poko, tykase Jezu.

²⁸—Ynara ãko ase oya xine, ahnome aenurutyã motye João mana, ahno ẽpurihkahpono. Emero motye mana. Yrome Ritonõpo poenõme aenurutyã mã imepyra ro tahtao xine João motye ro toh mana, tykase Jezu eya xine.

²⁹Tuhkãkomo a totase Jezu omiry, kowenu tinerũ apoinanomo a roropa totase. —Zae Ritonõpo mana, tykase toto. Pake João omiry etahpõkõ kynexine. Ritonõpo omipona toehse toto. Tõsẽpurihkapose roropa toto João a tonetupuhse tyya xine exiryke.