San Lucas 7:5-29

⁵Israelita itotonan, israelítalaca duque laquiramin joe. Yachi calachiri chiquilachi tenchi Diosichi fiqui miinun ya quisa caricae latinue.

⁶Tsantinan, Jesús yalabe pejinue. Junni aman capitanchi ya quelo fenasa, capitanni yachi amicolaca erenue yape Jesúlabe tulaibi jilaisa. Junni capitan ereca jun tsachila jalaito, Jesube itsanlatinue: —Miya, capitanni itsanque fiqui eree latinue. Te, jatusa tie latinue. Nuri capitanca fécari sen joto, yachibi jatusa tie latinue.

⁷Junni nuca tulaibi jitiyoe tie latinue seiton joyoe tito. Junni yachica jituminnan, inte nechi mantaquiniquisa tie. Inte nechiri quiyanpunca manseisa mantanari, manseichunae tie latinue.

⁸Jana soldadola tala mantanun cuwenta jochunae tie latinue. Coroneli ya capitanca mantamin joe. Ya capitan mantimini soldadolaca mantamin joe. Jisa mantanari, jiniiminlae; o jasa mantanari, janiiminlae. O yachi peyunca titiya quisa tinari, tsanquiniquimin joe latinue. Junni nunan jun tsanquenan quiyanpunca manseide! tinari, manseichunae tie latinue.

⁹Junni capitan tsantinunca wepanato meráto, Jesuri yabe pejaca junlabe itsantinue: —Meralaquinade! tinue. Ya capitan israelita itotonan, israelítalaca fécari Diosica tennamin joe tinue.

¹⁰Junni capitan ereca junla manfanasari, ya quiyanpun peyunni numa manseica jominue.

¹¹Junni nanni ina Jesús manca puebloca jinue Naín tinunca. Yabe penenaminlabe, junsi layan uyan tsachilabe pejinaminlanue.

¹²Jun pueblobi wilaichinasa, puyacaca menabi tanjinaminlanue. Ya puyacachi ayan biuda jominue. Ya tsachiri yachi mancari nao jominue. Junni jun pueblobi chuminla layanla yaca menabi pejinaminlanue.

¹³Junni Miya Jesuri yaca quirato, laqui tito, waretude! tinue.

¹⁴Junni aman Jesús quelo féto, puyaca ponun cajonca taquiranue. Tsanquinasa, nanato tanjinaminla wiruilainue. Junni puyaca mosoca Jesús itsantinue: —Mansonhide! tiyoe tinue.

¹⁵Junni Jesús tsantinan, puyaca jomin tsachi manchudito cuenta quinue. Junni yachi ayanchi mancuwanue.

¹⁶Jerale tsachila junca quiraminla jele tito, Diosica duque se tito itsanlatinue: —Diosichi mantate tsarasi pamin tsachi chiquilachica jaca joe latinue. Diosi yachi tsachilaca ayudainae latinue.

¹⁷Junni jerale Judea tobi, uyan quelole totenan tsanque mera jominue Jesús duque wepanato quirantsancari quinanunca.

¹⁸Junni Mumunmin Juanchi tsachila Juanbe jera cuenta polarilaquinue Jesús niyan quinanunca.

¹⁹Junni Juan doramin joto, junca meráto, yachi tsachila palucaca jasa carito, yalaca Jesúchica erenue. Junni yalaca erechinato, yalabe itsantinue: —Jesube itsanlatina! tinue. ¿Nu Diosi ereno jomin tsachi joyun? tilatina! tinue. Nu itotori, paniquede! tilatina! tinue uyanca meralarachun.

²⁰Junni ya paluca tsachila Jesúchica jato itsanlatinue: —Mumunmin Juan ereca jun jalaiyoe latinue. Yari nuca miichi tinae. ¿Nu Diosi ereno jomin tsachi joyun? latinue. Junni nu itotori, paniquisa tie latinue uyanca meralarachun. Mumunmin Juan tsanque fiqui eree latinue.

²¹Junnasari Jesús duque quiyanpunlaca jera manse suwanue. Yucanchi ocola tsachilachibi pominlaca mansularinue. Aman quirano podeitonlaca manquirano podeisa carinue.

²²Junto aman Juanchi tsachilabe itsantinue: —La ticatiya quinanunca nula quiralaquinae tinue. Junto tenca calaquede! Quirano podeitonlaca, jancanlaca, lepra bichi chunlaca, meráno podeitonlaca mansenayoe. Poperelaca Diosichi sen fiquica micarinayoe. Junni nulari junca jera quirato, aman Juánchibi manfeto yabe jera cuenta quilaquina! tinue.

²³Junni Juanbe junca cuenta quito itsanlatina! tinue. Laca tennanoca peleituna! tinae tilatina! tinue. Laca palaque tenca catuminla pansi jolajochunae tinae tilatina! tinue.

²⁴Jesús tsantinunbi Mumunmin Juan ereca junla manjilainue. Junni manjilainunbi, Jesuri uyan duque tsachilabe Mumunmin Juanca itsantinue: —¿Nulari niyanlanantiya chutunun posto minu Juanca quirabi jilaico? tinue. Junni aman yaca quirabi jinato, ¿niyaque tenca canaminlayun? ¿Juanca ti tsachi joeque tenca canaminlayun? tinue. ¿Cumana tenca jonhoe tinato jilaiyun? Te, Juanni cumana tenca tsachi natiya itoe.

²⁵¿Junni ti tsachi jonhoe tinaminlayun? ¿Tsara uraran camisa pomin oco tsachi jonhoe tinaminlayun? Te, tsan itoe. Otoquin camisaca poto senbi oco tala chuminlari miyalachibiri chuminla joe; niyanlanantiya chutunun postobi chutuminlae.

²⁶Junni Juanca quirabi jito, ¿ti tsachi jonhoe tinaminlayun? ¿Diosichi mantate pamin tsachi jonhoe tinato jilaiyun? Janhan. Diosichi mantate pamin joe. Ya Juanni Diosichi mantate tsaracari seque pamin joe.

²⁷Matu mate Diosi yachi pilabi Juanca panue yaca ereno joyoeque. Lari lachi fiquica paminca Crístochi caquele ereno joyoe tinue yape yachi tenchi jera se suwanasa.

²⁸Junni meralaquinade! tinue. Diosichi mantate paminla tala monantiya Juanca fe itominue. Tsan josanan, amana mate Diosi casanle nechi mantananun bolon tsachilari Juanca fe jolajoe. Yala tala fécari epe tsachilanan Juanca fe jolajoe tinue. Jesús Juanca tsanque cuenta quinue.

²⁹Junni aman epe israelítala Juanbe mumunhica jominlanue. Inpuesto cala caminlanan Juanbe mumunhica jominlanue. Junto Jesús Juanca tsanque cuenta quinasa, ya tsachilari Diosica se joe tinaminlanue Juanca erenun tenchi.