Lucangundru 7:5-29

⁵Ngangau nulu ngaianana kana wolara ngantjai, ja jaura punga ngaianani nulu wotinala.”

⁶Jesus tanangunto wapana wonti. Ja Nau wata morla worita pungandru nganana, juljaia kaparali kamaeli nunkangu jinpana wonti tana nunkangu jatananto: “Kaparajai, wata ngara patau, ngangau ngani wata talku nganai jidni ngakangu pungani wirinanto.

⁷Jendrania ngani munta waka ngundraterina warai jinkangu wokarala; windri jaura kulno jatamai, ja mili ngakani tepirila nganai.

⁸Ngangau bakana ngani kana nganai ja kaparani wodatarana ngamai, ja ngato mili wolara ngamalkai; ngani nunkangupini jatanani: Wapan, ja nau wapai; ja kulnuni: Kaparau, ja nau wokarai; ja milini ngakanani: Jenia ngankau, ja nulu jenia ngankai.”

⁹Jesujeli jenia ngarana, Nau nunkangundru pirna ngaruparana wonti; ja Nulu najina karitjina wonti kana wolarani, nunkangu karipaterinani, ja jatana wonti: “Ngani jurangu jatai: Wata Israelani ngato jenipara morlalu ngundrana mankamankanala.”

¹⁰Ja tanali, tanana nulu jinpana, terpina tikana wonti ja mili muntja tepi mankamankana wonti.

¹¹Ja ditji kulnuni Nau ngura kulnuja palkana wonti, Nain tala nunkani; ja mili nunkani marapu, ja kana wolara nunkangunto wapana wonti.

¹²Nau ngura manani karakara wokarana, mai, tanalj nari kulno padakana tarana wonti, nunkani ngandria ngatani kunakulno, ja nani mangawaru nganana wonti; ja kana wolara ngurandru nankangunto nganana wonti.

¹³Kaparali nana najina, Nau nankangu kalumiltjamiltjarina wonti ja nankangu jatana wonti: “Wata jindrau!”

¹⁴Ja Nau karakararina wonti, ja naria pirra patana wonti; ja wilimanietja banbana wonti. Ja Nau jatana wonti: “Teriai, ngani jinkangu jatai, terkakamai!”

¹⁵Ja narila ngamana tarana wonti, ja wonina wonti jatala. Ja Nulu nina ngandrini nunkanani jinkina tikana wonti.

¹⁶Ja tana pratjana japali pantjina wonti ja Goda jurakokana wonti ja jatana wonti: “Propheta pirna ngaianangu terti jiritjina warai, ja Goda nunkani kana wolarani wokarana warai.”

¹⁷Ja nunkani pintipinti karitjinawontiwontikana wonti Judaia mitani paruparu, ja mita pratjanani karakara.

¹⁸Ja Johanningu milieli nunkanali jenia pratjana kaukaubana wonti.

¹⁹Ja Johannili mili nunkani mandru karkana wonti ja pudlana Jesungu jinpana wonti ja jatana wonti: “Naumata jidni, Nau wokarananto kara, kulnuni ngaiani kalkananto?”

²⁰Pudla materi nunkangu wokarana wonti ja jatana wonti: “Johannes multibanietjali ngalina jinkangu jinpana warai ja jatana warai: Naumata jidni, Nau wokarananto kara, kulnunni gaiani kalkananto?”

²¹Nunkangupini ditjini Nulu marapu tepi ngankana wonti muntjandru ja jupanandru ja kutji murumurunelru, ja butju marapuni Nulu jinkina wonti najinanto.

²²Ja Jesujeli kalabana wonti ja pudlangu jatana wonti: “Tilalumai ja Johanningu kaukaubalumai, mina judla najila wapaia ja ngarala wapaia: Butjulah najiai, tjundurula wapai, gambala kulikiri pantjiai, talpakurulali ngarai, narila tepi terkakai, wangiwangieli ngantjani jaura ngari.

²³Ja murlali pirna naupini nganai, nau ngakangu wata buljubuljuriai.”

²⁴Johannini mili matja tikana, Nulu wonina wonti kana wolarani jatala Johanningundru: “Mina najila jura pitaraia palkana paraia? Kalanka kulno watarali wijawijabanani?

²⁵Mina najila jura palkana paraia? Kana kulno kati tjankanto? Mai, tana kati tjankani ja pankipankinani, mitaia Kaparaia pungani ngamai.

²⁶Mina najila jura palkana paraia? Propheta kulno? Morlalu ngani jurangu jatai: Nau morla pirna nganai Prophetani.

²⁷Naupini nau nganai, nunkangundru dakanala parai: Mai, ngato angela ngakani jinkangu mudlani ngopera jinpai, nulu palto jinkani jinkangu ngopera ngankingala nganai.

²⁸Ngangau ngani jurangu jatai: Propheta morla pirna tanangundru, widlandru dankanala, Johanningu multibanietjani wata, kulno nganai; worananau waka nganai Godaia mililani, nau morla pirna nganai nunkangu.”

²⁹Ja kana wolarali, tanali matja ngarana, ja mardatandrakampanietjali Goda talku ngundrana wonti, ja multibanila manina wonti Johannini multibanilali.