SAN LUCAS 7:5-29

⁵te yahino ye nación yuhn vo, ne chihno ye a̱ma ya̱co yahn nuhn.

⁶Tuhme cuahn Dihvo vo nduco ihyan chahn. Cuahn che a nda̱ nino ye ne, dechuh capitá̱n me ndudo nduco a̱ma o amigo yahn ye, ra̱hn ye tuhca̱: ―Dihvé, hua denduh ne ndih ca̱va no u, che chi ne nde chete va̱có.

⁷A devanó te u ne, ndiyu ihyan che co chí na̱n ne. Nde na̱n che cochi ne, cuihquentiyon ne, ne ndoyahn sa̱hn deca̱hya yáhn.

⁸Che ca̱hcantiyon ne ne, a devanó te va che conahn, te namin u ne, va ihyan che te ye vederihquentiyon quenan cumá, ne vate sanda̱do yáhn. Rihquentiyón a̱ma se che ca̱hn se, ne rahn se, ne rihquentiyón ta̱ma se che chi se, ne rechi se, ne nducuahn che rihquentiyón sa̱hn deca̱hya yáhn ne, redinahn se.

⁹Yahn che tihca̱ ra̱hn capitá̱n me ne, cuahn ino Dihvo vo, ne chaconan ye, ndihchero ye ihyan che nduco ye, ne ra̱hn ye: ―Cua̱co rá̱hn rí nchuhn te nde numachahte nación yuhn vo ne, hua renda̱cá ihyan che tihca̱ a̱ma ritahno ye.

¹⁰Cuahn che ndaconan ihyan che chahn ye ntiyon yahn capitá̱n me ne, nta̱ca ye sa̱hn che adeche coh me che a ntoyahn se.

¹¹Chihno min ne, Dihvo vo nduco ihyan apóstol yahn ye ma̱n, a̱ma ya̱hn ca ihyan ma̱n, cuahn ye a̱ma ya̱n che duche Naín.

¹²Cuahn che nda̱ ye viya̱n me ne, ta̱hn nun ye ihyan che cuahn ye cuhche ye a̱ma tena̱hn da̱ya a̱ma nda̱hta va̱h. A̱ma ndiya̱hn ra sa̱hn dihn min yahn nda̱hta va̱h me, ne a̱ma ya̱hn ihyan nduco ye.

¹³Cuahn che ndihche Dihvo vo nda̱hta va̱h me ne, quenan va̱hino ye ta̱hn, ne ra̱hn ye ri ye ta̱hn: ―Hua cueque.

¹⁴Tuhme chahn nda̱ ye, ne ca̱h ta̱h ye yave yahn tena̱hn me, ne sa̱hn che nda se yave me ne, chahtendi rino se. Ra̱hn ye ri ye tena̱hn me: ―¡Cuenecuen!

¹⁵Ndeta̱hno necuan sa̱hn dihn che a ndih me, ne cana̱n rente se. Tuhme neca̱h Dihvo vo sa̱hn chaco se.

¹⁶A̱ma cuahn ino nducoya̱ca ihyan, ne rendeva ye numacuahn vedeyeno yavena̱n Dendiohs, ne ra̱hn ye: ―Nda̱ a̱ma profeta va̱n uvo, ihyan yahn Dendiohs. ¡A̱ma chahte vederihquentiyon quenan cuma ye! Dechuh Dendiohs ihyan.

¹⁷A̱ma chetuhn ndudo yahn vederihno che din Dihvo vo numachahte esta̱do yahn Judea ma̱n, nduh cua̱n na̱n che nino min ma̱n.

¹⁸Ihyan che rinduco ye Jua̱n Bautista ne, ra̱hn ye ri ye ihyan yahn nducua̱hn vederihno che redin Dihvo vo. Tuhme cah Jua̱n o ihyan chahn,

¹⁹ne dechuh ye ihyan ca̱va che tumerune ye Dihvo vo, a ihyan min niyon ihyan che a va ca̱de che dechuh Dendiohs ihyan, ndedevahn ye ihyan iyehnse, o cuahtenan rino ye ta̱ma ihyan.

²⁰Nda̱ ihyan chahn na̱n Dihvo vo, ne ra̱hn ye ri ye ihyan: ―Jua̱n Bautista ne, dechuh ye nuhn, tumerune nuhn ndih: ¿A ndih ihyan che a va ca̱de che dechuh Dendiohs, ndedevahn ye ihyan iyehnse, o cuahtenan rino nuhn ta̱ma ihyan ne?

²¹Ura min din Dihvo vo che ndoyahn a̱ma ya̱hn ihyan cah ma̱n, din ye che chi ro na̱n ihyan che ve na̱n ye ma̱n, ndetenda̱h ye vaco chihnga̱ che chenun ihyan ma̱n.

²²Tuhme ndahconan ye yahn ihyan chahn che dechuh Jua̱n: ―Cona̱hn nchuhn, cueneca̱h cuande ne Jua̱n yahn nducuahn che ndihchero ne ma̱n, che chihnevan ne ma̱n. Ihyan che ve na̱n ye ne, redín che ri ro na̱n ye. Ihyan che ndi cheche ca̱h ye ne, redín che rica ye. Ihyan che ndi ye cah che recha̱ yute ne, redín che rendoyahn ye. Ihyan che a ndih ye ne, rendedetuhché ihyan. Ihyan che necun ye ne, ricuáhn ndudo ndah yahn Dendiohs ihyan.

²³Ndah ro yahn ihyan che ritahno ye che dechuh Dendiohs u.

²⁴Cuahn che cona̱hn ihyan chahn ne, rente Dihvo vo nduco ihyan che chenun ye min yahn Jua̱n, ne ra̱hn ye: ―¿Deh che chahn nchuhn, ndihchero ne min ya̱hn na̱n che metah duhva? ¿A a̱ma nduco che ra yuhne?

²⁵¿Duh che chahn nchuhn, ndihchero ne tuhme? ¿A a̱ma sa̱hn che ninevaca se nduco tino ndah? A devano nchuhn te sa̱hn che renevaca se nduco tino ndah ma̱n, rahte se vihco ma̱n ne, sa̱hn chahn ne, chete va̱co rey chenun se.

²⁶Tuhme ne, ¿duhra che chahn nchuhn, ndihchero ne? ¿A ndiyu a̱ma profeta? Cua̱co niyon, te ihyan min ne, tahque chahte vederihquentiyon che quenan cuma ye che co ihyan profeta chena̱hn.

²⁷A yahn ihyan min che a ndirun na̱n Ndudo yahn Dendiohs tuhca̱: Condihche, dechúh a̱ma sa̱hn tahque mena̱n ca che co di, cuahndudo se ndudo yáhn. Ca̱hcoya̱n se chedave yahn ihyan, ca̱va che nevahnecun ye di.

²⁸Rá̱hn rí nchuhn te va̱n nducoya̱ca ihyan iyehnse ne, Jua̱n Bautista che tahque chahte vederihquentiyon che quenan cuma ye. Ate ihyan che tahque necun ye va̱n ihyan che rihquentiyon Dendiohs ne, tahque ndah ro yahn ye che co ihyan min.

²⁹Cuahn che tihca̱ ra̱hn Dihvo vo ne, a̱ma ya̱hn ihyan ya̱n, nde sa̱hn rica tumeca̱diyo, ndeva ye yavena̱n Dendiohs, te chahn ye, chehdenune Jua̱n ihyan.