Luka 7:5-29

⁵yesoo ya ni lono paidi Yuda nga le imot mai san, inbe ya la ire rumu ke gaongo atu pam i.”

⁶Motong la Yesu iye di tooltool tina tila pang ye tool mai ke patokongo tani. Le nga Yesu ipa le ila potai pang ye rumu ke tool tani, inbe tool mai tani, in iwanga di tooltool ki pattu be la tiwete pang Yesu nen. Tiyei ne, “Tool Mai, tool mai kiam iwangam be man amwete betanga ki pong nen, ‘Dookoot, ke be urata iporong tiap, yesoo au i lok tarau ngan au i tool dook mata ke be kuman a kulo rumu lono kiau tiap.

⁷Inbe au i akamatau ngan au tool dook mata ke be amala pang yong tiap lapau. Bong be nen ngan kupas le kuwete ye koom leu, inbe kapraingi kiau tani ole tinini dook mata mulu.

⁸Awete nen nga, yesoo ayepe gurana ke tool mai kiau yo matan kalau, in parmana. Inbe au tauk i di tooltool kiau ke patokongo nga, ngan tiyepe gurana kiau parmana lapau. Le kumata be awete pang atu nen, “Kula,” ngan ole ila. E be awete pang san nen, “Kuman,” ngan ole iman. E be awete pang kapraingi kiau nen, “Kuyeie urata i,” ngan ole itoo kook a iyeie urata tani.’ ”

⁹Yesu ilongo tina yo tool mai ke patokongo tani iwete nen nga, le tina itakrai, inbe iportak pang ye di tooltool malala mai tina yo titoo nga, inbe iwete pang di nen, “Awete pang nen, au i apuske tool sa ke Isrel itara lono medana mai mata ben tool i tiap.”

¹⁰Motong la di tooltool tina yo tool mai ke patokongo iwanga di pang Yesu nga, ngan timulu a tila pang rumu ngan tikamata kapraingi tani in tinini dook mata mulu oo.

¹¹Le nga mooloo tiap inbe Yesu ipa a ilo pang ye malala mai atu yo ene Nain i. Ngan di galiunu inbe di tooltool malala mai la tiye tilo nga.

¹²Le nga ilo potai pang ye dada ke koongoo ke malala mai tani, ngan itauarai di tooltool yo tisolo tamoto koskos atu yo imata i, in ke malala tani in lono a be tisi pang diki nga. Ngan tool matene tani, in tinana ipasuiu ya taleu, inbe nintooroo imata le iyei garup tap a iyepe. Le nga di tooltool alunu la tiye garup tani in tipa ke malala lono a tisi nga.

¹³Ngan ye kene yo Tool Mai ikamata garup tani ye in nga, ngan lono panga mai san. Le nga iwete panga nen, “Ai, kutang be.”

¹⁴Motong la ila potai la itoko sasaka ke tool matene tani, le nga di tooltool yo tisola nga, ngan sila tikodo. Inbe Yesu iwete pang tool matene tani nen, “Tamoto koskos, awete pong, kumadit!”

¹⁵Ngan le tamoto koskos tani in imadit le lo iwur, inbe iwetewete. Motong la Yesu ipamule mulu pang ye tinana nga.

¹⁶Ngan le di tooltool malala mai tina tikamata gurana mai ke Maro nen nga, le titakrai ye mai san, inbe tiyitmaka Maro ene. Tiyei ne, “Maro koonoo atu yo ene mai in la nookoot nga pombe kataunu kiidi koot i.” Inbe tiyei ne, “Maro isi be si ilon di tooltool ki.”

¹⁷Motong la di tooltool tina, tila tiwete pang di tooltool ye so yo Yesu iyeii a tikamata i, le bingi ki idada le ingaua malala tina ngan le imot yo iken ye tana mai Yudia nga.

¹⁸Yowan di galiunu tiwete panga ye so le imot yo Yesu iyei nga. Motong la Yowan tani in ikiu di galiunu ru a timan,

¹⁹inbe iwete pang di nen, “Kala pang ye Yesu la katoru nen. Kayei ne, ‘I ong tool tani yo Maro ipamede betanga ye be ole iwanga a isi i, in naii, too ole amtar matamam a amnama tool san mulu?’ ”

²⁰Di tooltool ru tina tila pombe pang ye Yesu, motong la tiyei ne, “Ai, Yowan yo irriu di tooltool i, in iwangam pong la amman nga. Be man amtorong nen, ong i tool tani yo Maro ipamede betanga ye be ole iwanga a isi i, in naii, too ole amtar matamam a amnama tool san mulu?”

²¹Ye kene tani, in Yesu ikaua urata ye karatanga di tooltool alunu kaiye yo matamatenge ikap di nga. Inbe inganga so sadi ye di tooltool kapala, inbe ikarata di tooltool yo mata kis nga, ngan matadi a tikamata ni mulu.

²²Le nga Yesu iraua betanga ke Yowan di galiunu ru tina nen, “Angru kamulu a kala ngan kawete pang Yowan ye betanga yo kalongo nga, inbe ye so yo kakamata ye matamim nga. Kayei ne, ‘Di mata kis tikamata ni mulu; inbe di tooltool yo kedi dook tiap nga, ngan kedi dook mata a tipa; inbe di tooltool yo botoboto medana ikan di nga, ngan tinidi dook mata mulu; inbe di tooltool yo talngadi dikidiki nga, ngan tilongo betanga mulu; inbe di tooltool yo timmata koot nga, ngan timadit mulu; inbe di tooltool yo ballingadi tiap nga, ngan tilongo bingi dook mata.’

²³Ngan tool yo ikamatau ngan itara lono medana pau le imede i, in Maro ole iyei urata dook mata panga le lon ponana ye.”

²⁴Yowan di galiunu ru tina yo iwanga di, ngan timulu a tila, motong la Yesu imadit ye betanga pang di tooltool malala mai tina ye Yowan tani nen. Iyei ne, “Ai, kene yo kala pang ye ni sorrakene nga, ngan be la kakamata soo so? Be la kakamata pi kaini yo muru iwalisi a ila be iman i, too? Tiap.

²⁵Ngan kala nga be la kakamata soo so? Be la kakamata tool atu yo itar moro ki dook mata i, too? Tiap. Di tooltool yo titar moro kidi dook mata ilo tinidi le tinidi dook mata ye nga, ngan tipas le tiyepe rumu mai ke tool mai yo matan kala tana mai kidi, in leu.

²⁶Bong soo so kala nga be la kakamata i? Kala be la kakamata Maro koonoo atu, too? E, ya tani nain. Le nga be awete pang nen, Maro koonoo tani in illos di Maro koonoo kapala yo ke muku nga.

²⁷Ya tani in la Rau ke Maro iwetewete ye nen i. Iyei ne, ‘Kapalongo! Ole awanga tool atu ke be imuku a ikaua bingi yong. Inbe ya la be imuku a ikarata dada pong i.’

²⁸Awete pang nen, kataunu ye di tooltool yo tiyepe tana i nga, ngan sa yo be illoso Yowan, in tiap. Bong ye di tooltool yo Maro matan kala di nga, ngan di le imot le si ye kase mitiap kidi atu, ngan ke be tilloso Yowan.”

²⁹Motong la di tooltool le imot tiye di tooltool ke sodaningi pat tilongo betanga tina yo Yesu iwete nen nga, le tiyei ne, “Maro i dada ki tarantatu kaiye.” Tiwete nen, yesoo di ngan Yowan yo irriu di tooltool i, in irriu di oo.