Luk 7:5-29

⁵Man dugo, iŋ idsad Juda dar niŋedi wo imat da, agod maŋsama ubou ab dam isuse panama ya.”

⁶Ago tag Jesus awad yabig dida diau a. Diaug ab fun na sumeik dugo Rom yu gurman an turan idinaig, dupalug, iŋ awan aban Jesus durupei, “O Tubun en, tureŋ ifuno umoi. Ŋaisag ab lo ladu san ŋai ta idaisuda na ya.

⁷Agod oŋsa na ŋupalu san o dam yaŋag tia ya. Ru mi ubol dop lo ŋaisag urat pinein uyan isusa da wa.

⁸Man dugo, nek oŋse oŋ ŋai dam tamol aenta waged lo urat ŋigane da, agod ŋaisag yu tamol adi paeg na dumado da. Saen ŋai yu tamol ta ‘wau’ ŋabol tap, iŋ yau a. Tia, tamol ta ‘palu’ ŋabol dop, iŋ ipalu wa. Tia, ŋaisag biabi ŋilaŋal ŋurupeip ‘en gane’ ŋabol dop, iŋ igane wa.”

⁹Jesus ru an iloŋ man, irut saian geig a. Agog idaŋsag tamolpein a ŋien aban diri se yan irupidai, “Rumok geig ŋurupaiaŋ da, tamol ilo rumok naok igo yak ta Isrel ilon lo ŋile man tia ya.”

¹⁰Agog yu gurman iŋanen turan dumul go ab lo diau man, urat pinein an uyan isusag imado dugo dile ya.

¹¹Murnag Jesus panu ta yaŋan Nein dubol dan te yau a. Iŋsan megeloum, agod tamolpein wei mi mok dam dadi diau a.

¹²Panu an san dalawan sumeik dupani dugo, tubabun ta disinig dupalu se ya. Tamol imat an iŋ pein suos ta nanun, nek ago kisaek o lian a. Panu an san tamolpein wei mi dam pein suos an dida dupalu se ya.

¹³Saen Tubun en pein an ile man, ilon tubun mi imuŋani tag irupei, “Tata umoi.”

¹⁴Ago dugo Jesus yaug, kapal tubabun anda yan yabi man, tamol kapal disini an dupartuanig dutur. Agog Jesus tubabun an irupei, “Pinein en, ŋai ŋurupaio da, oŋ masa!”

¹⁵Agog tamol imat an fon kumaen imasag fun iganeg iŋiŋeŋ se ya. Jesus pinein an iŋaneg tinan ipani a.

¹⁶Agog tamolpein fidian tubun mi durut go, Anut yaŋan diabisag, dubol, “Profet tubun ak ta id luluŋad lo ilasa ya.” Iŋ dubol, “Anut iŋanen tamolpein yil o ipalu ya.”

¹⁷Kulob e Jesus igane yen san ru Judea ilon lo ifurak go, aben an sad panu panu lo yaug fidian duloŋ a.

¹⁸Jon san megeloum kulob fidian Jesus igane se yan dile tag, Jon san na diaug durupeig iloŋ a.

¹⁹Ago man Jon megeloum nuŋod urarum igiaig irupidai, “Aup, Tubun en igo asumiani wa. Tamol a ipalu san niŋen o maŋ malama migane dan, oŋ tamol nek amaiak i? Tia, maŋ tamol sen ta ipalu san niŋen o mala nouk mumado wak i?”

²⁰Ru sinek tamol an Jesus san na dilasag Jon wagen lo ago dubol dusumiani, “Tamol a ipalu san niŋen o maŋ mala nouk mumado dan, oŋ tamol nek amaiak i? Tia, maŋ tamol sen ak ipalu san niŋen o mala nouk mumado wak i?”

²¹Saen nek an lo, Jesus subam adi wei mi ikubuniai dugo, a ur saian ad da yak ur saian ikudai diau dugo, a malad itapul ak idiraig fon abaŋ dile se ya. Ago dugo ru sinek tamol adi kulob an fidian dile se ya.

²²Agog Jesus ru naon irupidai, “Amul aup mel dugo ale dugo, ru aloŋ na yan dam Jon arupeip iloŋ a: malad itau ak afon abaŋ dile dugo, ŋied saian ak afon tureŋ diabi dugo, a tinid lepra amad da yan tinid siŋaokan dilasa ya. Kududod itau ak afon ru duloŋ dugo, a dumat ak kumaen dumasag dumado dugo, agod tamolpein mel amad tia yak bilaluŋ uyanan ak ŋufulale pidinai dugo duloŋ da.

²³Agod talpein a ŋai o ilon ta saian na yan, iŋ Anut san bar iŋane wa.”

²⁴Jon san megeloum dumul diau dugug, Jesus Jon niŋen o tamolpein irupidai o fun iganeg igo ibol, “Saen aŋ aben kawan talpein tia yak ate au an, aŋ ata mel mok ale wo au ak i? Nag aŋ tim ifurep war iwi yau imul dop ale wo au boi ak i?

²⁵Tia tap, ata wo au ak i? Nag aŋ tamol ta tinin kulos naon lak na geig ak idiri amaiak ale wo au ak i? Tia, tamol a biouŋ naok ago yak didiri duman, iŋ kiŋ sad ab lo mi dumado da.

²⁶Ak niŋen o ata mel mok ale wo au ak i? Nag profet ale wo boi i? Awo, ŋai nek amaiak niŋen o ŋurupaiaŋ da, profet en man rumok iŋ profet a, ak gug iŋ urat subaŋan taidam da imado da,

²⁷tamol nek emaiak niŋen o girek e Anut san ru lo digire idug yen den, igo ibol, ‘Ule, ŋaisag ru sinek tamol ŋidinip, oŋ nao na imug pe yau a. An lo oŋsa dal ikubune wa.’

²⁸Ŋai rumok ŋurupaiaŋ da, tamol a pein tiŋaed lo dilasa yan luluŋad lo tamol ta kisaek Jon Suguek san iriŋani man tia ya. Ago bo man, tamol ta Anut san kagin panek aben ilon lo yaŋan tiag, aenta fidian paed na imado dan, iŋ Jon Suguek san iriŋani geig a.”

²⁹(Saen tamolpein kawan ak fidian, agod takis ŋilaŋal tamol dam, ru a Jesus ibol an duloŋ man, Anut san dal an mi dal rumok ak niŋen o awok dupani a. Man dugo, tamolpein nek an Jon san suguek diŋane ya.