Kɑncɑɑlɑɣɑ 9

1

2

3

4

5

6

7

8

9

10

11

12

¹Ḿpʋ́ɣʋ́ Ɩsɔ koolɑ Nowee nɑ ɩ piyɑ kɛ kʋpɑntʋ sɩ: Ɩ́ lʋlɩ nɑ ɩ́ huki nɑ ɩ́ sú tɛtʋ.

²Mɑ tʋ́ mǝ niŋ tɑɑ kɛ́ wontunɑɑ tǝnɑɣɑ, pɑɑ ɑtɛ nyǝntʋ, nɑ sumɑsɩ, nɑ tiinɑ, nɑ ɑtɛ nyɑmɑnyɑmɑnɑɑ. Pǝ tɔɔ kɛ́ wontu ntɩ tɩɩ wɛɛnɑ mǝ sɔɣɔntʋ kɛ sɔsɔm.

³Ɩ́ pǝsǝɣɩ nɑ ɩ́ tɔɣɔ wontunɑɑ mpɛ ɩsɩɩ ɩ́ tɔkʋɣʋ kʋnyɔnyɔm tɔ.

⁴Amɑ kʋlʋmtʋ kɛ́ sɩ ye ɩ cɑɑ kpǝntɛ kɛ tɔɣɔʋ, ɩ́ lɛntɩ nɑ cɑlǝm lɩɩ nɑ pǝ́cɔ́. Mpi tɔ, cɑlǝm tɑɑ kɛ́ weesuɣu wɛɛ.

⁵Ye wei ɩ́ kʋwɑ yʋlʋ, mɑɑ lɛɛtɩ pʋntʋ, pɑɑ yʋlʋ pɑɑ wontuɣu.

⁶Ye nɔɣɔlʋ kʋwɑ ɩ tɔɣɔntǝlɛ, yʋlʋ tɔtɔ kɑ́ kʋnɑ pʋntʋ. Mpi tɔ, Ɩsɔ ŋmɑ́ yʋlʋ kɛ́ ɩsɩɩ ɩ mɑɣɑmɑɣɑ ɩ wɛɛ tɔ.

⁷Mɛ mɩɩ lʋlɩ nɑ ɩ́ huki nɑ ɩ́ yɑ́ tɛtʋ tǝnɑ tɑɑ.

⁸Ḿpʋ́ɣʋ́ Ɩsɔ tɑsɑ Nowee nɑ ɩ pǝyɑlɑɑ kɛ heeluɣu sɩ:

⁹Mɑ́ nɑ-mɛ tɩɩ pɛɛlɩ nɔɣɔ nɑ kɑ́ wɛɛ mpʋ hɑlǝnɑ mǝ lʋlʋɣʋ nyǝ́mɑ kɛ mǝ wɑɑlɩ.

¹⁰Nɑ pǝ́ kpɛnnɑ wontu tǝnɑ nti tǝ lɩ́ɩ́ ɑtɑkɑɑ pɔɣɔlʋɣʋ tɑɑ tɔ.

¹¹Mɑ sɩɩkɩ mɑ nɔɣɔ sɩ mɑ kɑɑ tɑsɑ weesuɣu nyǝm kpiisuɣu kɛ tɛtʋ tɔɔ nɑ lʋm. Pǝ́cɔ́ lʋm kʋ́wɑ́ɑ́sǝm mpɩ pǝ kɑɑ tɑsɑ kɔntɛ nɑ pǝ́ wɑkǝlɩ tɛtʋ.

¹²Ɩlɛnɑ Ɩsɔ tɑsɑ sɩ: Mɑ tʋɣɩ kɑɣɑlʋ nɑ ɩ́ hʋ́lǝ́ɣɩ́ tɑm tɔɔ kɛ́ nɔɣɔ ŋkɑ mɑ́ nɑ-mɛ nɑ weesuɣu nyǝm tǝnɑ nɑ mǝ wɑɑlɩ lʋlʋɣʋ nyǝ́mɑ tǝ pɛɛlɑɑ tɔ.

¹⁴Mɑ́ kɔmɑ nɑ mɑ́ kpeɣelɑ ŋmʋntʋ kɛ ɩsɔtɑɑ, kɑɣɑlʋ kɑ kɑɣɑ kɛ́,

¹⁵ɩlɛnɑ pǝ́ tɔɔsɩ-m nɔɣɔ ŋkɑ mɑ sɩɩ mǝ nɑ weesuɣu nyǝm tǝnɑ sɩ lʋm kʋ́wɑ́ɑ́sǝm mpɩ pǝ kɑɑ tɑsɑ kɔntɛ nɑ pǝ́ kpiisi weesuɣu nyǝm.

¹⁶Ɩsɔtɔnʋɣʋ tɑɑ kɛ́ kɑɣɑlʋ kɑ́ kɑɣɑ, nɑ mɑ́ nyǝnɑ-ɩ ɩlɛ pǝ tɔɔsɩ-m nɔɣɔ ŋkɑ mɑ sɩɩ weesuɣu nyǝm tǝnɑ tɔ.

¹⁷Mpi pǝ hʋlǝɣɩ nɔɣɔ ŋkɑ mɑ sɩɩ-wɩ tɔɣɔlɛ.

¹⁸Nowee nɑ ɩ pǝyɑlɑɑ mpɑ pɑ lɩɩ ɑtɑkɑɑ pɔɣɔlʋɣʋ tɑɑ tɔɣɔlɛ Sem nɑ Kɑm nɑ Yɛfɛtɛ. Kɑm ɩ́lɛ́ ɩ́ lʋlǝnɑ Kɑnɑɑŋ.

¹⁹Nowee piyɑ mpɛ pɑ piitim hukinɑ ɑntulinyɑ tǝnɑ.

²⁰Ḿpʋ́ɣʋ́ Nowee nikɑ tɛtʋ hɑlǝm nɑ ɩ́ cɑɑlɩ lɛsɛŋnɑɑ sɔʋ.

²¹Ɩlɛnɑ ɩ́ nyɔɔ pǝ sʋlʋm nɑ pǝ́ kʋ́-ɩ nɑ ɩ́ wɔɣɔsɩ ɩ wontu nɑ pǝ́ yele-ɩ tɑpɑkpɛtɛ kɛ cokǝle tɑɑ.

²²Mpʋɣʋlɛ Kɑnɑɑŋ cɑɑ Kɑm nɑwɑ ɩ cɑɑ tɑpɑkpɛtɛ, nɑ ɩ́ nyǝnɩ, ɩlɛnɑ ɩ́ polo nɑ ɩ́ tɑɣɑsɩ ɩ tɑɑlʋnɑɑ kɛ ɑwɑlɩ.

²³Ntɛnɑ Sem nɑ Yɛfɛtɛ pɑ́ kpɑɣɑ kpɑɩ nɑ pɑ́ hɔɣɔlɩ-ɩ nɑ pɑ́ tɔnɑ wɑɑlɩ wɑɑlɩ nɑ pɑ́ tɑkɩ pɑ cɑɑ. Ɩlɛ pɑ tɑ nɑ ɩ tɑpɑkpɛtɛ. Mpi tɔ, wɑɑlɩ wɑɑlɩ kɛ́ pɑ tɔmnɑɑ.

²⁴Nowee sʋlʋm kɔmɑ nɑ pǝ́ cɛ́ ɩ ɩsɛntɔɔ nɑ ɩ́ nɩɩ nti ɩ pǝyɑlʋ sǝkpelu nyǝŋ Kɑm lɑpɑ tɔ.

²⁵Ɩlɛnɑ ɩ́ tɔ́ sɩ: Mpusi ɩ́ tǝŋ Kɑm pǝyɑlʋ Kɑnɑɑŋ nɑ pǝ́ lɑpɩ-ɩ ɩ tɑɑlʋnɑɑ yom tǝkpɑpɑ.

²⁶Mɑ sɑmɑ Sem Ɩsɔ Tɑcɑɑ. Pǝ́ lɑ Kɑnɑɑŋ kɛ Sem-wɛ pɑ yom.

²⁷Ɩsɔ ɩ́ wɑlǝsɩ Yɛfɛtɛ tǝhikile, nɑ ɩ́ cɑɣɑ Sem tɛ́, nɑ pǝ́ lɑ́ Kɑnɑɑŋ kɛ pɑ yom.

²⁸Pɩɩsɩ ŋmʋnʋɣʋ nɑ nɩɩnʋwɑ nɑ nɩɩlɛ nɑ nɑɑnʋwɑ (350) kɛ́ Nowee tɑsɑ tɔɣɔʋ kɛ lʋm wɑɑsʋɣʋ wɑɑlɩ.

²⁹Ɩ pɩɩsɩ tǝnɑ yoosɑ nɑsǝnɑɑsɑ nɑ nɩɩnʋwɑ nɑ nɩɩlɛ nɑ nɑɑnʋwɑ (950) ɩlɛnɑ ɩ́ sɩ́.