1Ɩsǝnɑ Ɩsɔ lɑpɑ ɩsɔtɑɑ nɑ ɑtɛ nɑ pǝ tɑɑ weesuɣu nyǝmnɑɑ tǝnɑ tɔɣɔlɛ.
2Kʋyɑkʋ nɑɑtoso nyǝŋkʋ wule kɛ Ɩsɔ tɛɛsɑ ɩ tǝmɑ, ɩlɛnɑ ɩ́ hɛɛsɩ nɑɑtosompɔɣɔlɑɣɑ nyǝŋkʋ wule.
3Pǝ tɔɔ kɛ́ Ɩsɔ koolɑ-kʋɣʋ kʋpɑntʋ nɑ ɩ́ fɑɣɑsɩ-kʋ nɑ kʋ mpɑɑ sɩ kʋ kɛ́ ɩ nyǝŋkʋ.
4Ɩsǝnɑ Ɩsɔ lɑpɑ ɩsɔtɔnʋɣʋ nɑ ɑtɛ tɔɣɔlɛ. Wɑɑtʋ wei Tɑcɑɑ Ɩsɔ lɑpɑ ɑtɛ nɑ ɩsɔtɔnʋɣʋ tɔ,
5nyɩɩtʋ tɑɑ tiikɑ nɑkǝlɩ kɑ tɑɑ fɛɩ tɛtʋ tɔɔ, pǝ́cɔ́ nyiilɑɣɑ nɑkǝlɩ kɑ tɑɑ nyɔɔkɩ. Mpi tɔ, Tɑcɑɑ Ɩsɔ tɑ́ɑ́ yelǝtɑ sɩ tɛʋ ɩ́ nɩɩ. Pǝyele yʋlʋ nɔɣɔlʋ ɩ tɑɑ fɛɩ sɩ ɩ́ hɑlɑ tɛtʋ.
6Amɑ nikɑɣɑ kpɑɑkɑɣɑnɑ nɑ pǝ́ niɣitiɣi tɛtʋ tǝnɑ.
7Ḿpʋ́ɣʋ́ Tɑcɑɑ Ɩsɔ kpɑɣɑ tɛtʋ nɑ ɩ́ lɑ́ yʋlʋ, ɩlɛnɑ ɩ́ woso yʋlʋ mɩɩnɑ tɛɛ kɛ́ weesuɣu heelim. Tǝnɑɣɑlɛ yʋlʋ sʋʋ feesuɣu.
8Ɩlɛnɑ ɩ́ lɑ́ tɩɩŋ tɑɑlɛ kɛ Ɩteni tɑɑ kɛ́ ilim tǝlɩɩlɛ tɔɔ, nɑ ɩ́ sɩɩ yʋlʋ ɩnǝɣɩ tǝ tɑɑ.
9Ntɛnɑ Tɑcɑɑ Ɩsɔ yele nɑ tɩɩŋ kʋpɑŋ nyɔ Ɩteni tɑɑ tǝnɑɣɑ wɑɑnɩ wɑɑnɩ nɑ ɩ pee tɔɣɔʋ nɑ leleŋ. Nɑ tʋɣʋ ŋku kʋ pee hɑɑkɩ weesuɣu tɔ, nɑ kʋpɑntʋ nɑ ɩsɑɣɑtʋ pǝ cɛkǝnɑʋ nyǝŋkʋ kɑ sǝŋɑ hɛkʋ tɑɑ.
10Nɑ pɔɣɔ nɑkǝlɩ kɛlɛ kɑ́ fɑɣɑ Ɩteni tɑɑ nɑ kɑ́ niɣitiɣi tɩɩŋ tɑɑlɛ nɑ kɑ́ hɛlɑ pusi liɣiti kɛ Ɩteni wɑɑlɩ.
11Kɑncɑɑlɑɣɑ nyǝŋkɑ hǝtɛ ntɛ́ Pisɔŋ, kɛlɛ kɑ cɔɔnɑ Hɑfilɑ tɛtʋ nti tǝ tɑɑ wʋlɑ kʋpɑŋ nɑ tulɑɑlʋ kʋpɑŋ nɑ liɣitee pǝlɛ kʋkpɛɛtǝlɛ pǝ wɛɛ tɔ.
13Pɔɣɔ nɑɑlɛ nyǝŋkɑ hǝtɛ ntɛ́ Kihɔŋ nɑ kɛlɛ kɑ cɔɔnɑ Kusi tɛtʋ tǝnɑ.
14Nɑ tooso nyǝŋkɑ hǝtɛ ntɛ́ Tikili, kɛlɛ kɑ kpeŋnɑ nɑ ilim tǝlɩɩlɛ tɔɔ kɛ́ Asilii tɛtʋ tɑɑ. Pɔɣɔ liɣiti nyǝŋkɑ hǝtɛ ntɛ́ Ɩfǝlɑtɩ.
15Ḿpʋ́ɣʋ́ Tɑcɑɑ Ɩsɔ sɩɩ yʋlʋ kɛ Ɩteni tɑɑlɛ ńtɛ́ tǝ tɑɑ sɩ ɩ́ hɑlɑ nɑ ɩ́ pɑɑsǝɣǝnɑ-tɛ́.
16Kɛlɛnɑ ɩ́ tɔ́ yʋlʋ sɩ: N pǝsǝɣɩ nɑ ń tɔɣɔ tɑɑlɛ tɩɩŋ tǝnɑ pee.
17Amɑ kʋpɑntʋ nɑ ɩsɑɣɑtʋ pǝ cɛkǝnɑʋ tʋɣʋ pee pɑɑsi kɛ́ n kɑɑ tǝŋ. Pɔpɔtʋ fɛɩ leleŋ, kʋyɑŋku ń tɔɣɔ-yɛ ɩsɩɩ n sǝpɑ.
18Tɛtʋ kɛ Tɑcɑɑ Ɩsɔ kɑ lɑpɑ tɑɑlɛ wontu tǝnɑ, nɑ sumɑsɩ tǝnɑ, nɑ ɩ́ lɑ́ nɑ tǝ́ polo yʋlʋ kiŋ sɩ ɩ́ nyɩ hǝlɑ nnɑ ɩ kɑ́ hɑ-tɩ tɔ, nɑ ɑnǝɣɩ pɑ yɑɑkɩ-tɩ. Ḿpʋ́ɣʋ́ yʋlʋ hɑwɑ tɔlɑ tǝnɑɣɑ hǝlɑ, nɑ tɑɑlɛ wontu nɑ sumɑsɩ tǝnɑ. Amɑ ɩ tɑ hiki sǝnlʋ wei ɩ mʋnɑ-ɩ tɔ. Ḿpʋ́ɣʋ́ ɩ tɔmɑ sɩ: Pǝ fɛɩ sɩ yʋlʋ ɩ́ cɑɣɑ ɩ tike kɛ mpʋ.
21Ɩlɛnɑ Tɑcɑɑ Ɩsɔ lɑ́ nɑ tom kpɑ yʋlʋ nɑ ɩ́ too ɩsɩɩ ɩ́ sǝpɑ, nɑ ɩ́ lǝsɩ ɩ sǝntɑɑɣɑ lɛŋkɑ nɑ ɩ́ wɑɑsɩ nɑntʋ kɛ kɑ lonte.
22Ntɛnɑ ɩ́ mǝŋnɑ sǝntɑɑɣɑ ŋkɑ ɩ kɑ lǝsɑ ɑpɑlʋ tɑɑ tɔ nɑ ɩ́ ŋmɑnɑ ɑlʋ nɑ ɩ́ cɛlɑ-ɩ.
23Tǝnɑɣɑlɛ yʋlʋ tɔmɑ sɩ: Aŋhɑɑ, mɑ́ nɑ ɩnɛ tǝ kɑɑnɑ nɑntʋ nɑ mʋwɑ. Mpi tɔ, mɑ tɑɑ kɛ́ pɑ lǝsɑ-ɩ, ɩ́lɛ́ ɩ hǝtɛ ntɛ́ ɑlʋ.
24Pǝ tɔɔ kɛ́ ɑpɑlʋ kɑ yele ɩ cɑɑ nɑ ɩ too nɑ ɩ́ nɑ ɩ ɑlʋ pɑ́ cɑɣɑ nɑ pɑ́ pǝsɩ yʋlʋ kʋlʋm.
25Yʋlʋ nɑ ɩ ɑlʋ pɑ tɔŋɑɣɑ kpɛlɑ kɛ pɑ nɑɑlɛɣɛ, pǝ́cɔ́ fɛɛlɛ nɑtǝlɩ tǝ fɛɩ-wɛ.
