1Tɑɑlɛ wontu nti tǝ tǝnɑ Tɑcɑɑ Ɩsɔ lɑpɑ mpʋ tɔ, tʋm kǝlǝnɑ tǝ tǝnɑɣɑ ɑcilɑɣɑtʋ. Mpʋɣʋlɛ kʋyɑkʋ nɑkǝlɩ tʋm pɔɔsɑ ɑlʋ sɩ: Ɩlɛ tɑmpɑnɑ Ɩsɔ yɔɣɔtɑɑ sɩ ɩ́ tɑɑ tɔɣɔ tɑɑlɛ tɩɩŋ tǝnɑ pee yɑɑ?
2Kɛlɛnɑ ɑlʋ nɑ́ɑ́ cɔ sɩ: Aɑɩ, tǝ tɔ́kɩ hɑlǝm tɩɩŋ tǝnɑ pee kɛ́.
3Amɑ pǝ kɑɑsʋɣʋ tʋɣʋ ŋku kʋ wɛ hɑlǝm hɛkʋ tɑɑ tɔ kʋ pee tɔ, Ɩsɔ tɔmɑ sɩ: Ɩ́ tɑɑ tǝŋ-yɛ, pǝ́cɔ́ ɩ́ tɑɑ tokinɑ-yɛ́ɣɛ́ tokinɑʋ mɑɣɑmɑɣɑ, pǝ́ tɑɑ kɔɔ nɑ ɩ́ sɩ́.
4Mpʋɣʋlɛ tʋm nɔɣɔ tǝkpɑʋ sɩ: Ɩɩ sǝkɩ se.
5Amɑ Ɩsɔ nyǝ́mɑ́ sɩ kʋyɑkʋ ŋku ɩ́ tǝŋɑ-yɛ, mǝ ɩsɛ kuliɣi kɛ́ ɩsɩɩ ɩnɩ ɩ wɛʋ tɔ, nɑ ɩ́ nyǝ́mɑ́ kʋpɑntʋ nɑ ɩsɑɣɑtʋ.
6Alʋ nɑwɑ sɩ tʋɣʋ ŋkʋ kʋ nyǝnʋɣʋ wɛ teu, pǝ́cɔ́ kʋ pee wɛ ɩsɛsɛɛmlɛ nɑ ɑ kuliɣi yǝlɑɑ ɩsɛ. Ntɛnɑ ɩ́ kooli-kʋ́ nɑ ɩ́ tɔɣɔ, nɑ ɩ́ kɑɑsɩ nɑ ɩ́ cɛlɑ ɩ pɑɑlʋ nɑ ɩ́lɛ́ ɩ́ tɔɣɔ tɔtɔ.
7Tǝnɑɣɑlɛ pǝ kulɑ pɑ nɑɑlɛɣɛ mpʋ pɑ ɩsɛ nɑ pɑ́ cɛkǝnɑ sɩ pɑ wɛ tɑpɑkpɛlɑ. Ɩlɛnɑ pɑ́ cɑɑ hɑtʋ kʋwɑlǝtʋ nɑtǝlɩ nɑ pɑ́ tɔɣɔlɩ.
8Pǝ kɛɛsɑ tɑɑnɑɣɑ ɩlɛ Ɩsɔ Tɑcɑɑ polɑ ɩ tɑɑlɛ tɔɔ kɛ́ cɔɔʋ ntɛ́ nɑ pɑ́ nɩɩ ɩ nɔɣɔ. Ɩlɛnɑ yʋlʋ nɑ ɩ ɑlʋ pɑ́ sé nɑ pɑ́ ŋmɛlɩ tɑɑlɛ tɩɩŋ hɛkʋ tɑɑ.
9Amɑ Ɩsɔ Tɑcɑɑ yɑ́ɑ́ yʋlʋ sɩ: Leɣe n wɛnɑ ye?
10Ḿpʋ́ɣʋ́ ɩ cɔwɑ sɩ: Mɑ nɩɩ nyɑ́ nɔɣɔ kɛ tɑɑlɛ tɑɑ ɩlɛnɑ sɔɣɔntʋ kpɑ-m nɑ mɑ́ sé nɑ mɑ́ ŋmɛlɩ. Mpi tɔ, mɑ wɛ tɑpɑkpɛtɛ.
11Tǝnɑɣɑlɛ Ɩsɔ Tɑcɑɑ nɔɣɔ tǝkpɑʋ sɩ: Awe heelinɑ-ŋ sɩ n wɛ kpɛtɛ? N tɔɣɔ tʋɣʋ ŋku ɩnɩ mɑɑ kisinɑ-ŋ tɔɣɔ?
12Kɛlɛnɑ yʋlʋ sɩ: Mɑ tɔɣɑɑ yɑ́ɑ́, ɩlɛ ɑlʋ wei ɩnɩ n hɑ-m tɔ ɩnɩ ɩ cɛlǝnɑ-m nɑ mɑ́ tɔɣɔ.
13Ntɛnɑ Ɩsɔ Tɑcɑɑ pɔɔsɩ ɑlʋ sɩ: Pepe tɔɔ kɛ́ nyɑ́ lɑpɑ mpʋ? Alʋ nɔɣɔ tǝkpɑʋ sɩ: Tʋm tʋsǝnɑ-m nɑ mɑ́ tɔɣɔ.
14Ḿpʋ́ɣʋ́ Tɑcɑɑ tɔmɑ tʋm sɩ: Timpi n lɑpɑ mpʋ tɔ, pɩɩ kpɑtɩ nyɑ́ yule tɔɔ kɛ́ kpɑɑkpɑɑlɛ nɑ pǝ́ kǝlɩ wontu tǝnɑ, nyɑ́ lotu tɔɔ kɛ́ n kɑ́ tuuki nɔɔnɔɔ nɑ ń tɔ́kɩ tɛtʋ, hɑlǝnɑ nyɑ́ sǝm.
15Mɑɑ tʋ́ pɑtɩɩlɛ kɛ nyɑ́ nɑ ɑlʋ mǝ hɛkʋ, nɑ nyɑ́ lʋlʋɣʋ nyǝ́mɑ nɑ ɩ lʋlʋɣʋ nyǝ́mɑ pɑ hɛkʋ, pɑɑ nɑŋtɩ nyɑ́ nyʋɣʋ nɑ nyɑ́ɑ́ ló pɛlɛ pɑ nɔɔkikite.
16Ɩlɛnɑ Ɩsɔ tɔ́ ɑlʋ sɩ: Mɑɑ sɔɔsɩ-ŋ wʋsɑsɩ kɛ nyɑ́ ɑhontotʋ wɑɑtʋ, nɑ nsǝɣɩ n kɑ́ lʋlǝnɑ, nɑ n kɑ́ nyɩɩlǝɣɩ nyɑ́ pɑɑlʋ kɛ́ teu. Amɑ ɩ́lɛ́ ɩ kɑ́ lɑ nyɑ́ sɔsɔ.
17Ɩlɛnɑ ɩ́ pǝsǝnɑ ɑpɑlʋ tɔɔ sɩ: Timpi n nɩɩnɑ nyɑ́ ɑlʋ nɑ ń tɔɣɔ tʋɣʋ ŋku mɑɑ kisinɑ-ŋ tɔ. Mɑ tǝŋsǝɣɩ tɛtʋ kɛ mpusi kɛ́ nyɑ́ mɑɣɑmɑɣɑ nyɑ́ tɔɔ. Wɑhɑlɑ nɑ wɑhɑlɑ kɛ́ nɑ pǝ́cɔ́ ń hiki nyɑ́ tɔɣɔnɑɣɑ hɑlǝnɑ nyɑ́ sǝm.
18Nyɩɩtʋ ɩsɑɣɑtʋ kɛ n kɑ́ hɑlɑ nɑ pǝ́cɔ́ ń hiki nyɑ́ hɑtǝmʋtʋ.
19Ye hɑŋɑɣɑ tɑ sɔ-ŋ, n kɑɑ hiki ɩcɑʋtɛ nɑ ń mʋlɩ. Hɑlǝnɑ kʋyɑkʋ ŋku pɑɑ pi-ŋ tɛtʋ nti pɑɑ ŋmɑnɑ-ŋ tɔ tǝ tɑɑ tɔ. Mpi tɔ, n kɛ́ tɛtʋ kɛ́, pǝ́cɔ́ n kɑ́ tɑɣɑnɩ kʋlʋmtʋ ntǝɣɩ pǝsʋɣʋ tɔtɔ.
20Mpʋɣʋlɛ Atɑm hɑ ɩ ɑlʋ sɩ Ɩfɑ. Mpi tɔ, ɩnǝɣǝlɛ yǝlɑɑ tǝnɑ too.
21Ɩlɛnɑ Ɩsɔ Tɑcɑɑ kʋ wontu nɑtǝlɩ nɑ ɩ́ liti-tɩ nɑ ɩ́ tɔɣɔlɩ Atɑm nɑ ɩ ɑlʋ.
22Tǝnɑɣɑ Ɩsɔ Tɑcɑɑ yɔɣɔtɑɑ sɩ: Nɔɔnɔɔ yʋlʋ pǝsɑ ɩsɩɩ tɑ́ tɑɑ nɔɣɔlʋɣʋlɛ kʋpɑntʋ nɑ ɩsɑɣɑtʋ pǝ nyǝm tɔm tɑɑ. Pǝ tɔɔ tɔ, tǝ́ tɑɑ yele nɑ ɩ́ tɔɣɔ weesuɣu tʋɣʋ pǝle nɑ ɩ́ wɛɛnɑ weesuɣu kɛ tɑm tɔɔ.
23Ɩlɛnɑ Ɩsɔ tɔɣɔnɩ-ɩ Ɩteni tɑɑlɛ tɑɑ sɩ ɩ́ sʋʋ hɑlǝm kɛ tɛtʋ nti pɑ ŋmɑnɑ-ɩ tɔ.
24Mpʋ pǝ lɑpǝnɑ nɑ ɩ́ tɔɣɔnɩ Atɑm nɑ ɩ́ sɩɩ ɩsɔtɑɑ tɑŋlɑɑ nɑ pɑ́ tɑŋ tɑɑlɛ mpɑɑʋ nɑ pɑ́ ŋmɛlǝsǝɣɩ pɑ lɑɣɑlɛɛ nɑ ɑ́ mʋɣʋ kɔkɔsɩ kɛ ŋmɛlɛʋ ŋmɛlɛʋ sɩ nɔɣɔlʋ ɩ́ tɑɑ kpǝtǝnɑ weesuɣu tʋɣʋ.
