Kɑncɑɑlɑɣɑ 11

1

2

3

4

5

6

7

8

9

10

11

12

¹Wɑɑtʋ ɩnɩ ɩ tɑɑ yǝlɑɑ tǝnɑ yɔɣɔtɑɣɑ nsǝmlɛ kʋlʋmtǝlɛ.

²Ɩlɛnɑ pɑ́ lɩɩ ilim tǝlɩɩlɛ tɔɔ nɑ pɑ́ tɑlɑ Pɑpiloni tɛtɛkǝlɛ sɔsɔɔlɛ tɑɑ nɑ pɑ́ siki tǝnɑ.

³Mpʋɣʋlɛ pɑ heelɑ tǝmɑ sɩ: Ɩ́ kɔɔ nɑ tǝ́ loo pilikinɑɑ nɑ tǝ́ wɔ-wɛɣɛ kɔkɔ. Ɩlɛnɑ pɑ́ lɑnɑ pilikinɑɑ kɛ pɛɛ lonte nɑ pɑ́ lɑnɑ kɑɑloo kɛ́ somtu lonte.

⁴Nɑ pɑ́ tɑsɑ yɔɣɔtʋɣʋ sɩ: Ɩ́ kɔɔ nɑ tǝ́ ŋmɑ́ ɑtɛ nɑ ɩsɔ kutuluɣu ɑnɑɑm nɑ kʋ́ yoosinɑ ɩsɔtɔnʋɣʋ nɑ tɑ́ hǝtɛ yɑɑ. Ɩlɛ tǝ kɑɑ tɑsɑ yɑʋ kɛ yem kɛ́ tɛtʋ tǝnɑ tɑɑ.

⁵Mpʋɣʋlɛ Tɑcɑɑ tiiwɑ sɩ ɩ nɑɑkɩ ɩcɑtɛ nɑ ɑtɛ nɑ ɩsɔ kutuluɣu ŋku yǝlɑɑ piyɑ ŋmɑwɑ tɔ.

⁶Ɩlɛnɑ Tɑcɑɑ tɔ́ sɩ: Ɩ́ nɑwɑ, pɑ tǝnɑ ɩsǝntɔ pɑ kɛ́ yǝlɑɑ kʋlʋmɑɑ kɛ́, nɑ pɑ kɑɑ nsǝmlɛ kʋlʋmtǝlɛ. Pɑ cɑɑlʋɣʋ ɩsǝntɔ tɔ pʋlʋpʋ kɑɑ kɑɣɑtɩ-wɛɣɛ mpi pɑɑ hɔkɔ sɩ pɑ lɑkɩ tɔ pǝ tɑɑ.

⁷Ɩlɛ mɑɑ tii nɑ mɑ liɣiti pɑ nsǝmlɛ nɑ pɑ́ tɑɑ nɩɩkɩ tǝmɑ kʋyɔɣɔtʋtʋ.

⁸Ntɛnɑ Tɑcɑɑ yɑsɩ-wɛɣɛ ɑntulinyɑ tǝnɑ tɑɑ nɑ pɑ́ yele pɑ ɩcɑtɛ ŋmɑʋ.

⁹Mpʋ pǝ yelinɑ nɑ pɑ́ hɑ ɩcɑtɛ ntɛɣɛ hǝtɛ sɩ Pɑpɛɛlɩ. Mpi tɔ, tǝnɑɣɑ Tɑcɑɑ liɣitɑ yǝlɑɑ nsǝmlɛ, nɑ ɩ́ yɑsɩ-wɛɣɛ ɑntulinyɑ tǝnɑ tɑɑ.

¹⁰Sem lʋlʋɣʋ nyǝ́mɑ hǝlɑ ntɔ cǝnɛ. Ɩ lʋlʋɣʋ pɩɩsɩ nɩɩnʋwɑ (100) nyǝŋkɑ tɑɑ, lʋm wɑɑsʋɣʋ wɑɑlɩ pǝnɑɣɑ nɑɑlɛ nyǝŋkɑ tɑɑ kɛ́ ɩ lʋlɑ Alǝpɑsɑtɩ.

¹¹Alǝpɑsɑtɩ lʋlʋɣʋ wɑɑlɩ ɩ tɔɣɔ pɩɩsɩ nɑsǝlɛ nɑ nɩɩnʋwɑ (500) nɑ sɩ tɑɑ kɛ́ ɩ tɑsɑ ɑpɑlʋpiyɑ nɑ ɑlʋpiyɑ kɛ lʋlʋɣʋ.

¹²Alǝpɑsɑtɩ pɩɩsɩ lɑpɑ hiu nɑ nɑɑnʋwɑ nɑ kɑkpɑsɩ ɩlɛnɑ ɩ́ lʋlɩ Selɑ.

¹³Selɑ lʋlʋɣʋ wɑɑlɩ ɩ tɔɣɔ pɩɩsɩ nɑsǝlɛ nɑ tooso (403) nɑ sɩ tɑɑ kɛ́ ɩ tɑsɑ ɑpɑlʋpiyɑ nɑ ɑlʋpiyɑ kɛ lʋlʋɣʋ.

¹⁴Selɑ pɩɩsɩ lɑpɑ hiu nɑ nɑɑnʋwɑ ɩlɛnɑ ɩ́ lʋlɩ Ɩpɛɛ.

¹⁵Ɩpɛɛ lʋlʋɣʋ wɑɑlɩ ɩ tɔɣɔ pɩɩsɩ nɑsǝlɛ nɑ tooso (403) nɑ sɩ tɑɑ kɛ́ ɩ tɑsɑ ɑpɑlʋpiyɑ nɑ ɑlʋpiyɑ kɛ lʋlʋɣʋ.

¹⁶Ɩpɛɛ pɩɩsɩ lɑpɑ hiu nɑ nɑɑnʋwɑ nɑ liɣiti ɩlɛnɑ ɩ́ lʋlɩ Pelɛkɩ.

¹⁷Pelɛkɩ lʋlʋɣʋ wɑɑlɩ Ɩpɛɛ tɔɣɔ pɩɩsɩ nɑsǝlɛ nɑ hiu nɑ nɑɑnʋwɑ (430) nɑ sɩ tɑɑ kɛ́ ɩ tɑsɑ ɑpɑlʋpiyɑ nɑ ɑlʋpiyɑ kɛ lʋlʋɣʋ.

¹⁸Pelɛkɩ pɩɩsɩ lɑpɑ hiu nɑ nɑɑnʋwɑ kɛ́ ɩlɛnɑ ɩ́ lʋlɩ Leu.

¹⁹Leu lʋlʋɣʋ wɑɑlɩ ɩ tɔɣɔ pɩɩsɩ pɔɣɔlɑɣɑfɛɩ ŋmʋnʋɣʋ nɑ nɑɑnʋwɑ (209) nɑ sɩ tɑɑ kɛ́ ɩ tɑsɑ ɑpɑlʋpiyɑ nɑ ɑlʋpiyɑ kɛ lʋlʋɣʋ.

²⁰Leu pɩɩsɩ lɑpɑ hiu nɑ nɑɑnʋwɑ nɑ nɑɑlɛ kɛ́ ɩlɛnɑ ɩ́ lʋlɩ Selu.

²¹Selu lʋlʋɣʋ wɑɑlɩ Leu tɔɣɔ pɩɩsɩ ŋmʋnʋɣʋ nɑ nɑɑtosompɔɣɔlɑɣɑ (207) nɑ sɩ tɑɑ kɛ́ ɩ tɑsɑ ɑpɑlʋpiyɑ nɑ ɑlʋpiyɑ kɛ lʋlʋɣʋ.

²²Selu pɩɩsɩ lɑpɑ hiu nɑ nɑɑnʋwɑ ɩlɛnɑ ɩ́ lʋlɩ Nɑhoo.

²³Nɑhoo lʋlʋɣʋ wɑɑlɩ ɩ tɔɣɔ pɩɩsɩ ŋmʋnʋɣʋ (200) nɑ sɩ tɑɑ kɛ́ ɩ tɑsɑ ɑpɑlʋpiyɑ nɑ ɑlʋpiyɑ kɛ lʋlʋɣʋ.

²⁴Nɑhoo pɩɩsɩ lɑpɑ pɔɣɔlɑɣɑfɛɩ hiu nɑ nɑɑnʋwɑ kɛ́ ɩlɛnɑ ɩ́ lʋlɩ Telɑ.

²⁵Telɑ lʋlʋɣʋ wɑɑlɩ Nɑhoo tɔɣɔ pɩɩsɩ pɔɣɔlɑɣɑfɛɩ nɩɩnʋwɑ nɑ hiu (119) nɑ sɩ tɑɑ kɛ́ ɩ tɑsɑ ɑpɑlʋpiyɑ nɑ ɑlʋpiyɑ kɛ lʋlʋɣʋ.

²⁶Telɑ pɩɩsɩ lɑpɑ nɩɩtoso nɑ nɑɑnʋwɑ kɛ́ ɩlɛnɑ ɩ́ lʋlɩ Apǝlɑm nɑ Nɑhoo nɑ Hɑlɑŋ.

²⁷Telɑ lʋlʋɣʋ nyǝ́mɑ hǝlɑ ntɔ cǝnɛ. Ɩ lʋlɑ Apǝlɑm, nɑ Nɑhoo, nɑ Hɑlɑŋ. Ɩlɛnɑ Hɑlɑŋ nɑ́ɑ́ lʋlɩ Lɔɔtɩ.

²⁸Amɑ Hɑlɑŋ nɑ́ sǝpɑ Uu ɩcɑtɛ tɑɑ timpi pɑ lʋlɑ-ɩ tɔɣɔ Pɑpiloni tɛtʋ tɑɑ nɑ ɩ cɑɑ Telɑ tɑ sǝtɑ.

²⁹Ɩlɛnɑ Apǝlɑm nɑ́ɑ́ kpɑɣɑ Sɑlɑɩ, nɑ Nɑhoo nɑ́ɑ́ kpɑɣɑ Ɩsikɑ cɑɑ Hɑlɑŋ pɛɛlɔ Milikɑ.

³⁰Sɑlɑɩ ɩ́lɛ́ ɩ́ kɑ kɛ́ kɑɑlʋlɑɣɑ kɛ́ ɩ fɛɩ pǝyɑɣɑ.

³¹Ḿpʋ́ɣʋ́ Telɑ kpɑɣɑ ɩ pǝyɑlʋ Apǝlɑm nɑ ɩ sɑɑlɩ Lɔɔtɩ nɑ ɩ poolu Sɑlɑɩ nɑ pɑ́ lɩɩ Uu kɛ Pɑpiloni sɩ pɑ puki Kɑnɑɑŋ tɛtʋ tɑɑ. Pɑ tɑlɑ Hɑlɑŋ ɩcɑtɛ tɑɑ ɩlɛnɑ pɑ́ cɑɣɑ tǝnɑ.

³²Telɑ pɩɩsɩ tǝnɑ yoosɑ ŋmʋnʋɣʋ nɑ kɑkpɑsɩ (205) ɩlɛnɑ ɩ́ sɩ́ tǝnɑ.