Text copied!
CopyCompare
Godigo dwagi yai po buku - Bugagia Bidibo Kolesagade Po Asęai Buku

Bugagia Bidibo Kolesagade Po Asęai Buku 20

Help us?
Click on verse(s) to share them!
1Te bomai wę hauwa tubo bidigo te posobo po weyu, te dwai po me weyu, te hwįyu yaibao. Te bomai węgo aga tonalumainu ebo bidi da, teda aga wiegi yai homu me elalubeo.
2Te kingo wado eyu, te haliga sębę ebogo te bidi wi ilaibao, te laiongo genuai gaa wabo tiwai yaibao. Nago te king haliga sębę yabo sę ebaso da, teda nago bidibo ula te hagawaibao.
3Bidigo te hwįbo kolesaga tudiba mubaso da, teda agai genuai nogi elalueibao. Tiali goli, te wiegi yai homu me elalusiąbo bidi da, agai te konila po sesemane sogo polo subigila wabo dao.
4Te hagela bidigo te aga giba te nai wai bulainu te tǫ eligi pabo sę me egi pogobeo. Tama tialima, te nai inilama, te tau yai sabo sogo, teda aga te giba odolali mu pelama gegegi paibao.
5Te bidigo homu kolesaga te wę ulu aiyaba mu odoga sigulai tiwai ebo dao. Tiali goli, te wiegi yai kolesaga koneani bidigo, agai te homu kolesaga ugwaba ma kekasa holobaso usu yaibao.
6Te bidi hauwago te po weyu, te augwa abagi dabe wei mu ebo wabo dao. Tiali goli, te bidi deli deligo naga te aga abagiba te homu mu mubo haliga ebo dao.
7Te doloba pai bidigo te dwai sę me deli isiąyu, bididu dao. Tama tibaso, aga wai dabe nosali bugagia bidaibao.
8Te king po tų odainu dugulalubo sogo, agai te po tųba asobo bidi dabego kolesaga te bugagia dagala subo dao.
9Dego te tama po weyu, “Eno te ena digi te magi dwai sę me isiąwai mu, te ena wiegi yai mu te God geduba pedalu, tama megi eno te dwai sę me deli ebeo,” po obaso, te usu egowe? Bidi meni.
10Te augwaligo abelainu ebo doado bage dagalobo sogo te bidigo te we bidi dabe tibo po ola maiabo homu ebaso da, teda Genuai Bidigo te kolesaga hagela homu eyu, sębę mu ebo dao.
11Dago te bidigo kolesaga sulama konebo dao, aga te wiegi yai doloba pai bidi, ma aga te dwai bidi, te kolesagade konebo dao. Tama te tobage kolesaga delide naga, dago me te wai dabego kolesaga me sulama konebo dao.
12Genuai Bidigo dago te tonabo gedu dabolo mawai, tama dago ologo te po dabe odomainu yai.
13Te nage sesemane sogo godege pibo gedu magane idubaso da, te nage mone menia selama, tama nage magi doado bage meni yai bidi pedelaibao. Tiali goli, nage hogodama, sę ebaso da, te nago nai hauwa elaluaibao.
14Te bidigo nai me deli abelainu ebo sogo, agai te abelainu ebo naigo mone ugwadu elalubaso, te nai page bidi dali homu bega sabo po hauwa waibao. Tiali goli, agai te nai abela selama da, agai te aga abagi dabeba wagi peyu, te mone aiyaba mu dulali po wagi paibao.
15Te bidigo pogo te wiegi yai homu kolesaga te we bidi dabeba mobaso da, te nai mu da, tama te gol aiyaba elaluama, tama te gasagi yai tedali sawi yai masigi dabe te aiyaba mu elaluaibao.
16Te bidi me deligo te gasa bidigo negeli sali te wei ponaiba po dąų wai, te gasa bidi me aga usu isąbaso da, teda agai te wiegi yai kolesaga me ebeo. Tama tiyu, te bidi me deligo nage dali negeli sabo homu elama, tama nago koneani, agai te tobage po dąų obaso da, teda nago te agai nai me deli sabo po bomo eyu, te agai negeli sabo te wei ponabo dąį ilibo tiwai te sao.
17Te nago tibo sę ebo kolesagade sabo nai, te nago homugo te wiegi yai pusai nai tiwai mu yaibao. Tiali goli, nosali te dwai mu pedelaibao, te masigi kemi nago pedauwalide pągąnalubo tiwai yaibao.
18Te wiegi yai homu kolesaga bolo selama, te nago sę te bugagia dolasa paibao. Tama nago te boi bidi dabe dali hwįainu da, nago te homu kone bugagia paliyu bolo yao, te nago mena tama hwįabo te kone palao.

19Nage te po subigila ola bilibo bidi dali kisasa me bilamuo. Te tobage bidi te posobo po wabo bidi da, tama nago po geme dualama agaba obaso da, agai te po te gasa bidiba pusaibao.
20Te bidigo i ola mabo po te aga aya idabolo wali da, teda aga isaibao, te lam sole isiyu, te be hulia sabo tiwai gilama yaibao.
21Te bidigo te aga aya de ida si bidibadi digi te augwaligo doado bage asesa sainu ebaso da, teda te doado bage bugagia me elalugobeo.
22Nago homugo te gasa bidigo nageba ebo dwai sę wei ponabo homu me igio. Menio. Nago te Genuai Bidi tonaluyu da, te agai nage tau saibao, tama agai nago te sęgę silaibao.
23Te bidigo te we bidi dabego te doado bage abelainu ebaso, te agai dagalubo sogo te we bidi tibo po ola mayu, te nai te dwai skelgo usu sobaso da, teda Genuai Bidigo te kolesaga wei mu me isąyu, sębę me yaibao.
24Genuai Bidigo te da tǫde bidibo sogo te dago sunumi tigidali te dąį ilali. Magi elama tama dago te sunumi dabe te menaba pabo sunumi elaluba wagowe?
25Nago bugagia homu kone bolo palama, tama nago te Genuai Bidiba ofa maiabo po dąų walao. Tiyu, nago asesa subigila po dąų walai madi tama nosali nago te dąų walali pode homu hauwa dogia pabuo. Te nago te tiwai ebaso da, teda naga digi naga dolaibao.
26Te wiegi yai homu elalubo kingo, agai po tų ebo side tama te dwai kolesaga ebo bidi dabego ebo kolesaga te bugagia dagalaibao. Tama tilama, te agai augwaliba te dwai dene dolo mabo dao.
27Te da deli delide elalubo mobo bidi te lam sole tiwai te Genuai Bidigo dabolo menama, te dago homude ebo kolesaga tigidali te sumainu elama, tama dena te bugagia dagala sumainu tebo dao.
28Te kingo aga we bidiba te homu mu munama, tama augwaliba te olo tau sabo kolesaga eyu, te augwali tau sobaso da, teda aga te bugagia bidiyu, tama te king sesabi elama bidaibao.
29Te gesi bidi dabego te bomo elalubaso, tama tego te we bidigo augwaliba pemene emainu ebao. Tiali goli, te monu dabe te ayadeba nisi yai elalubaso, tama te we bidigo tede te homu koneama, tama augwaliba te genuai nogi mabo dao.
30Te nago te dwai sę ebo bidi aga te homu begelimainu te keloago aga elibaso da, teda te tebogo agai te dwai kolesaga ebo tudiba munama, tama aga wiegi yai bidi pedelaibao.