Text copied!
CopyCompare
Luda yã takada kũ Bisã yão - 2 SAMUƐLI

2 SAMUƐLI 8

Help us?
Click on verse(s) to share them!
1Abire gbɛra Dauda zĩ̀i blè Filisitininↄa à ń búsa à ń wɛ́ra Gata sìḿma.
2À zĩ̀i blè Mↄabunↄa, akũ à tò ò wùtɛ kↄ̃ sarɛ zĩtɛ. À bàa yↄ̃̀ḿma. Tó à bà pla daguraa dɛ̀dɛ, àdi bà do dagura tó bɛ̃nɛ. Akũ Mↄabunↄ gↄ̃̀ Dauda zↄ̀blerinↄ ũ, akũ òdigↄ̃ táfe bonɛ.
3Dauda zĩ̀i blè Reobo nɛ́ Adadɛza, Zoba kínaa, gↄrↄ kũ kína pìi ɛ̀ra àtɛn gɛ́ ↄ tↄ̃ Yuflati swasarɛdenↄa.
4Akũ à a sↄ̃gonↄ kũ̀kũ mɛ̀n wàa sↄↄro kũ sↄ̃godenↄ gbɛ̃nↄn dúbu suppla kũ gbɛ̃ kũ ò tɛ́ gɛ̀sɛnↄ gbɛ̃nↄn dúbu baro. Akũ à ń sↄ̃nↄ gbátĩnↄ zↄ̃̀zↄ̃ pínki, mɛ̀n basↄↄro mɛ́ ò bò.
5Siria kũ ò kú Damasukunↄ sù Adadɛza leo, akũ Dauda ń gbɛ̃nↄ dɛ̀dɛ dúbu baro awɛɛpla.
6À gudãkpãrinↄ dìtɛditɛ Siria bùsun, akũ ò gↄ̃̀ a zↄ̀blerinↄ ũ, òdigↄ̃ táfe bonɛ. Dikiri tò Dauda zĩ̀i blè gu kũ à gɛ̀ɛn pínki.
7Dauda Adadɛza ìbanↄ wura sɛ̃gbakonↄ sɛ̀tɛ à tào Yurusalɛmu.
8À mↄ̀gotɛ̃ sɛ̀tɛ dasidasi Adadɛza wɛ̃tɛ kũ òdi pi Teba kũ Berotaioo gũn.
9Kũ Amata kína Tohu mà Dauda zĩ̀i blè Adadɛza zĩ̀karinↄa ń pínki,
10akũ à a nɛ́ Adoramu zĩ̀ fↄ kpáa. À a sáabu kpà zĩ̀ kũ à blè Adadɛzaa yãi, zaakũ Tohu zĩ̀i kà kãao yã. Adoramu sù kũ wura pↄ́nↄ kũ andurufu pↄ́nↄ kũ mↄ̀gotɛ̃ pↄ́nↄ,
11akũ kína Dauda kàtɛ Dikiri pↄ́ ũ lákũ à kɛ̀ kũ buri kũ à gbãna blèḿmanↄ andurufu pↄ́nↄ kũ wura pↄ́nↄ nà pínki,
12Ɛdↄmunↄ kũ Mↄabunↄ kũ Amↄninↄ kũ Filisitininↄ kũ Amalɛkinↄ. Lɛn à kɛ̀ lɛ kũ pↄ́ kũ à sì Zoba kína Adadɛza, Reobo nɛ́aao.
13Lɛn Dauda tↄ́ bò lɛ. Kũ à zĩ̀i blè Sirianↄa à sù, à Ɛdↄmunↄ dɛ̀dɛ Guvutɛ Wisiden gbɛ̃nↄn dúbu baro plansari.
14Akũ à gudãkpãrinↄ dìtɛditɛ Ɛdↄmu bùsun dↄ, akũ Ɛdↄmu pìnↄ gↄ̃̀ a zↄ̀blerinↄ ũ. Gu kũ Dauda gɛ̀ɛn pínki Dikiri dì tó à zĩ̀ blemɛ.
15Daudamɛ Isaraila buri sĩnda pínki kína ũ, à yã mana kɛ̀ a gbɛ̃nↄnɛ a zɛ́a.
16Zeruya nɛ́ Yoabumɛ zĩ̀karinↄ gbɛ̃ zↄ̃kↄ̃ ũ. Ailudi nɛ́ Yosafatamɛ baarukpari ũ.
17Aitubu nɛ́ Zadↄki kũ Abiata nɛ́ Aimɛlɛkioomɛ sa'orikinↄ ũ. Serayamɛ takadakɛ̃ri ũ.
18Yoyada nɛ́ Bɛnayamɛ dogarinↄ gbɛ̃ zↄ̃kↄ̃ ũ. Dauda zĩda nɛ́gↄ̃gbɛ̃nↄmɛ a kpàasinↄ ũ.