1Naa ʋoluma Davide vɔnini Filiseti nuiti ma, é ti ɠaazu unfe seɠe, é ta-ɠaaɓaai ɠula ti ya.
2É vɔnini ɓalaa Moaɓe nuiti ma. Niiti é ti zoni, é ti laani zooi ma, é ti ɠaaɠwɛ su ga seizu saʋagɔ ga galui. Nu zeizu saʋagɔi zaama, é seizu felegɔiti paani, é seizu ɠilagi yɛ vulua. Moaɓe nuiti ti ɠoloni Davide ʋɛ, ti ɗa mului zala ma.
3Naa ʋoluma Davide vɔnini Sɔɓa masagi Ɠadadeezɛɛl ma, Leɠɔɓe ná-doun zunui, siɛgi zu é ɠɛni liizu la ga ná-masadai zeiɗa ʋolu ziɛ wolai Ufelate maaʋɛ.
4Davide soo ɓizɛ zalaʋusu waagila undɔfela (1 700) zoni, ta siɛ kɔɠɔa zalaʋusu waaʋuufelegɔ (20 000). É wotolo ɓizɛ zoo ungila (100) makɛni. É mɔtaiti kɔɠɔʋolu ɲataiti teʋeni.
5Siili yooi zu nuiti ti ɠɛni Damase, naati ti ʋaani ɓɔsu Sɔɓa masagi Ɠadadeezɛɛl ʋa. Davide nu waaʋuufelegɔ maazu felegɔ (22 000) ʋaani ti ʋa.
6Naa ʋoluma, Davide kundiɠiiti seini Damase yooi zu Siili nuiti saama. Siili nuiti ti ɠoloni Davide ʋɛ, ti ɗa mului zala ma. Ɠɔoɠɔ GALAGI ɠɛni fɔnifaamai veezu Davide ʋɛ, ʋɛ kpein é ɠɛni liizu ná ga kɔɔi.
7Davide zanu kɔɔɠɔ zɛpɛgiti seɠeni, niiti ti ɠɛni Ɠadadeezɛɛl ná-salaʋusuiti zea, é li ga tiye Zeeluzalɛme.
8Davide kɔlu ɓɔi mɔinmɔin seɠeni masagi Ɠadadeezɛɛl ná-taa wolaiti su, Ɓeeta ta Ɓeelɔtayi.
9Siɛgi zu Ɠamate masagi Tɔyi mɛnini da ga Davide vɔnigɛ Ɠadadeezɛɛl ná-kɔɔʋɛbɛiti pɛ ma,
10é ná-doun zunui Yɔlame leʋeni Davide ma ga é tuʋɔ, ta é mama fala vai zu Ɠadadeezɛɛl ʋa, é vɔni ma, tɔɔzei Tɔyi ta Ɠadadeezɛɛl ti ɠɛni kɔɔi ɠa nɔ ɠɔ. Yɔlame liizuʋɛ, é liini ga sɔɔlai ma zii pɛ, niiti ti ɠɛni ga walii, zanugi, ta kɔlu ɓɔigi.
11Masagi Davide ti veeni Ɠɔoɠɔ GALAGI ʋɛ, eɠɛʋelei é kɛɛni la niina ga walii ta zanugi, nii é kulani zɔɔma zii ɠiligiti zea, niiti é vɔnini ti ma:
12Edɔme nuiti, Moaɓe nuiti, Amɔn nuiti, Filiseti nuiti, ta Amalɛke nuiti, ta nii kpein é soni kɔɔi zu, é kula Sɔɓa masagi Ɠadadeezɛɛl ya, Leɠɔɓe ná-doun zunui.
13Davide lɔɠɔi mɔta ɠulani, siɛgi zu é ɠaleni la ma, fɔnigai ma Edɔme nu waapuugɔ maazu lɔsaʋai (18 000) ma, Kpolo Ʋɛtugi zu.
14Naa ʋoluma, é kundiɠiiti seini Edɔme yooi ná pɛ su. Edɔme nuiti pɛ ti ɠoloni Davide ʋɛ. Ɠɔoɠɔ GALAGI ɠɛni fɔnifaamai veezu Davide ʋɛ, ʋɛ kpein é ɠɛni liizu ná ga kɔɔi.
15Davide masadai ɠɛɛni Izelayɛle pɛ unda, é ɠɛni tukpɔi ɠaaleʋezu ga sɔledai ná-nuɓusɛiti pɛ bɛ.
16Seluya ná-doun zunui Zoaɓe ɠa é ɠɛni ná-kɔɔʋɛbɛi unda, Ayilude ná-doun zunui Zɔzafate ɠɛ ga sɛʋɛ makɛ nui,
17Ayituɓe ná-doun zunui Sadɔke, ta Aɓiataal ná-doun zunui Ayimeelɛke ti ɠɛ ga zalaɠa ɠula nuiti, Selaya ɠɛ ga sɛʋɛ ɠɛ nui.
18Yeɠɔyada ná-doun zunui Ɓenayaɠu ɠa é ɠɛni Kelɛte nuiti ta Peelɛte nuiti unda, niiti ti ɠɛni ga masa makɛ nuiti. Davide ná-doun zunuiti ti ɠɛni ga zalaɠa ɠula nuiti.
