23ሄሳ ጊሽ ሲዪዛ ሃይꬂ ዲዛዴይ ሲዮ!” ጊዴስ።
24ጉጂዲካ “ኢንቴ ሲዪዛይሳ ዎዝናን ዎꬂቴ፤ ኢንቴ ማኪዛ ሚሻራ ኢንቴስ ማኬታና፤ ሄሳፌካ ዳሮይ ጉጄታና።
25ዲዛዴስ ጉጄታና ሺን ባይንዳዴፌ ኢዛስ ዲዛራካ ኤኬቲቻና” ጊዴስ።
26ቃሴካ ዬሱሲ “ፆሳ ካዎቴꬂ ዜሬꬅ ዜሪዛ ኢሲ ኣስ ሚሳታዉስ።
27ዜሪዳዴይ ኦማርስ ꬊሲኬስ። ዎንቲሺን ዴንዴስ፤ ጊዶ ኣቲን ኢዚ ኤሮንታ ዲሺን ዜሬቲዳ ካꬃይ ሞኪዲ ዲጬስ።
28ጋዴያካ ኮይሮ ጫሬች፥ ካሌꬃዳ ፑꬌ፥ ቅሴካ ፑꬌዛ ቦላ ሎዖ ኣይፌ ኢማዉስ።
29ካꬃይ ካፂዳፔ ጉዬ ቦኔይ ጋኪን ኬꬃ ኣዋይ ሄራካ ማፃ ኦይኬስ” ጊዴስ።
30ዬሱሲ “ፆሳ ካዎቴꬅ ኑ ኣዛራ ጊኒሳኔ? ኣዛራ ሌሚሳኔ?
31ቢታ ቦላ ኡባፌ ላፋ ጊዲዳ ሳናፊጬ ኣይፌ ሚሳታዉስ።
32ዜሬታዳ ዲጪዳፔ ጉዬ ቃስ ኣታኪልቴታ ኡባፌ ኣꬊዛ ጊሽ ካፎቲ ዪዲ ሄ ኣታኪልቴይ ሃጋታ ኩዋ ጊዶን ሼምፔቴስ” ጊዴስ።
33ዬሱሲካ ኣሳይ ኤካናስ ዳንዳዪዛይሳ ኬና ሃይታ ሚሳቲዛ ሃራ ዳሮ ሌሚሶራ ኢስታስ ዮቲዴስ።
ማርቆሳ 4
ማርቆሳ 4:23-33