ማርቆሳ 1

1

2

3

4

5

6

7

8

9

10

11

12

13

14

15

16

¹ፆሳ ና ዬሱስ ኪርስቶሳ ኮይሮ ሚሺራቾይ ሃይሳ፤

²ናቤ ኢሳያሳ ባጋራ “ሄኮ ኔስ ኦጌ ሎዔꬃናዴ ታ ኪታናዴ ኔፔ ሲንꬃራ ዬዳና።

³‘ጎዳስ ኦጌ ጊጊሲቴ፤ ኢዚ ባና ኦጌ ሱሪሲዲ ኦꬂቴ’ ጊሼ ባዞ ቢታን ዋሲዛ ጊሪስ” ጌቴቲ ፃፌቲዴስ።

⁴ሄሳꬆካ ፃማቂዛ ዮሃኒሲ ኣሳ ፃማቂሼኔ “ኢንቴ ናጋራፔ ሲሚዲ ፃማቄቲቴ፥ ፆሲ ኢንቴ ናጋራ ኣቶ ጋና” ጊ ኣዋጂሼ ባዞራ ኬዚ ዎꬊዴስ።

⁵ዩሁዳ ዴሬይ ኩሜꬅ ዬሩሳላሜ ኣሳይ ዉሪ ዮሃኒሳኮ ቢ ቢዲ ባ ናጋራ ናጋራ ፓፂ ፓፂ ዮርዳኖሴ ሻፋን ዮሃኒሳ ኩሼን ፃማቄቲዴስ።

⁶ሄ ዎዴ ዮሃኒሲ ማይዒዛይ ጋሜላ ኢሲኬፔ ኦሴቲዳ ማይዖ፤ ቃሴ ባ ፄሳን ዳፎ ጊፄስ። ኢዚ ሚዛ ቁማይ ቦሌኔ ዴጌራ ኤሳ።

⁷ኢዚ “ታኒ ሆካዳ ኢዛ ጫማ ቃሾ ቢርሻናስ ቤሶንታዴይ፥ ታፔ ኣꬊዛዴይ ታፔ ጉዬራ ያና።

⁸ታኒ ኢንቴና ሃꬃን ፃማቃይስ ኢዚ ጊዲኮ ኢንቴና ፂሎ ኣያናን ፃማቃና” ጊዲ ሳባኪዴስ።

⁹ሄ ዎዴ ዬሱሲ ጋሊላ ጊዶን ዲዛ ናዚሬቴ ጌቴቲዛ ካታማይፔ ዮርዳኖሴ ሻፋ ዪዲ ዮሃኒሳ ኩሼን ፃማቄቲዴስ።

¹⁰ዬሱሲ ፃማቄቲዲ ሃꬃፌ ኬዚዳ ማላ ሳሎይ ዶዬቲን ፂሎ ኣያናይ ኢዛ ቦላ ሃራጴ ካፎ ሚሳቲዲ ዎꬊሺን ቤዪዴስ።

¹¹ቃሴካ “ታ ዶሲዛ ናይ ኔና፥ ኔናን ታ ኡፋዬታይስ” ጊዛ ቃላ ጊሪሲ ፑዴ ሳሎፔ ሴቴቲዴስ።

¹²ሄራካ ፂሎ ኣያናይ ኢዛ ዱጌ ባዞ ካሌꬂ ኤፊዴስ።

¹³ሄን ባዞንካ ኦይዱ ታሙ ጋላስ ጋካናስ ፃላዔራ ፓጬቲሼ ጋምዒዴስ። ዶዓታራ ኢሲፌ ዴዒዴስ። ኪታንቻቲካ ኢዛ ማዲዳ።

¹⁴ዮሃኒሲ ቃሾ ኬꬅ ጌሊዳይሳፌ ጉዬ ዬሱሲ ፆሳ ሚሺራቾ ቃላ ሳባኪሼ ጌዴ ጋሊላ ቢዲ “ዎዴይ ጋኪዴስ፤ ፆሳ ካዎቴꬂ ማቲዴስ፤ ናጋራፔ ሲሚቴ፥ ሚሺራቾ ቃላን ኣማንቴ” ጊዲ ሳባኪዴስ።

¹⁶ዬሱሲ ጋሊላ ኣባ ኣቻራ ኣꬊን ሲሞናይኔ ኢዛ ኢሻ ኢንዲራሲ ሞሌ ኦይኪዛይታ ጊዲዳ ጊሽ ኢስቲ ሞሌ ኦይኪዛ ጊቴ ኣባን ዬጊሺን ቤዪዴስ።

¹⁷ዬሱሲ ኢስታ “ሃ ዪቴ! ታና ካሊቴ፤ ኢንቴ ሞሌ ኦይኪ ሺሺዛ ማላ ታ ኢንቴና ኣስ ኦይኪዛይታ ኦꬃና” ጊዴስ።

¹⁸ኢስቲ ሄራካ ሞሌ ጊቴዛ ዬጊ ኣጊዲ ዬሱሳ ካሊዳ።

¹⁹ጉꬅ ጌዴ ሲንꬄ ኣꬊዲ ዛቢዶሳ ና ያቆቤይኔ ኢዛ ኢሻ ዮሃኒሲ ዎጎሎን ኡቲዲ ሞሌ ጊቴ ጊጊሲሺን ቤዪዲኔ ሄራካ ኢስታ ፄይጊዴስ።

²⁰ኢስቲካ ባ ኣዋ ዛቢዶሳስ ቃፃሬቲዲ ኦꬂዛ ኣሳታራ ኢሲፌ ዎጎሎዛ ጊዶን ኣጊዲ ዬሱሳ ካሊ ቢዳ።

²¹ሄፔካ ቂፊርናሆሜ ቢዳ። ሄራካ ዬሱሲ ኣይሁዳታ ሳምባታ ጋላስ ኣይሁዳታ ዎሳ ኬꬄ ጌሊዲ ታማርሶ ኦይኪዴስ።

²²ፃፌታ ማላ ጊዶንታ ጎዳቴꬃራ ዲዛ ኣሳ ማላ ኢዚ ታማርሲን ኣሳይ ዉሪ ኢዛ ቲሚርቴዛን ማላሌቲዴስ።

²³ሄ ዎዴ ኣይሁዳታ ዎሳ ኬꬃን ዲዛ ቱና ኣያናይ ኢዛ ቦላ ዲዛ ኢሲ ኣዴይ

²⁴“ናዚሬቴ ዬሱሳ ኔ ኑፔ ኣዚ ኮያይ? ኑና ꬋይሳና ያዲ? ኔ ኦናኮኔ ታ ኔና ኤራይስ፤ ኔኒ ፆሳ ጌሻዛ” ጊዲ ዋሲዴስ።

²⁵ዬሱኣሲካ ቱና ኣያናዛ “ጮዑ ጋዳ ኢዛፔ ኬዛ!” ጊዲ ሃንቂዴስ።

²⁶ቱና ኣያናይ ኣዴዛ ጌንዴርሲዲ ኢዚ ቃኬቲሺን ኢዛፔ ዋሲሼ ኬዚዴስ።

²⁷ዴሬይ ዉሪ “ኣሶ ሃይሲ ኣዛ ፓላ? ሃይሲ ጎዳቴꬃራ ዲዛ ኦራꬃ ቲሚርቴ፤ ቱና ኣያናታካ ኣዛዜስ፤ ኢስቲካ ኢዛስ ኣዛዜቴቴስ” ጊ ማላሌቲሼ ኣሳይ ባ ጊዶን ኢሶይ ኢሳ ኦይሼቾ ኦይኪዴስ።

²⁸ሄራካ ኢዛ ኦሶ ዎሬይ ኩሜꬅ ጋሊላ ዩሾን ዲዛ ዴሬ ኡባን ሲዬቲዴስ።

²⁹ኣይሁዳታ ዎሳ ኬꬃፌ ኬዚዳ ማላ ያቆቤራኔ ዮሃኒሳራ ኢሲፌ ጌዴ ሲሞናሶኔ ኢንዲራሳሶ ጌሊዳ።

³⁰ሄ ጌሊዳ ማላ ሲሞና ቦሎቴያ ሚሻ ሃርጌ ሳኬታዳ ኢቺዳይሳ ኢዛስ ዮቲዳ።

³¹ሄሳ ጊሽ ዬሱሲ ኢዚኮ ሺቂዲ ኢዚ ኩሼ ኦይኪዲ ዴንꬂዴስ። ሚሻይ ኣጊን ኢዛ ዴንዳዳ ኢስታ ሞካዱስ።

³²ኣዋ ኣርሼይ ዉሊዳፔ ጉዬ ጋዴይ ꬉሚሺን ኣሳይ ሃርጋንቻታኔ ዳይዳንꬂ ኦይኪዳ ኣሳ ዉርሲ ዬሱሳኮ ኤኪ ዪዴስ።

³³ሄ ካታማዪን ዲዛ ኣሳይ ዉሪ ኬꬃ ካሬን ሺቂዴስ።

³⁴ኢዚካ ዱማ ዱማ ሃርጌን ሳኬቲዳይታ ዳሮታ ፓꬂዴስ። ዳሮ ዳይዳንꬃታካ ኬሲዴስ። ጊዶ ኣቲን ዳይዳንꬃቲ ዬሱሲ ኦናኮኔ ኤሪዛ ጊሽ ዳይዳንꬃቲ ሃሳያና ማላ ዬሱሲ ኮይቤና።

³⁵ባዞይ ዞዖንታ ማላዶ ዎንታራ ዬሱሲ ዴንዲዲ ኢሲ ኣሲ ባይንዳሶ ቢዲ ሄን ዎሳ ኦይኪዴስ።

³⁶ሲሞኒኔ ኢዛራ ዲዛይቲ ዬሱሳ ኮያና ኬዚ ቢዳ።

³⁷ኢስቲ ኢዛ ዴሚዲ ኣሲ ዉሪ ኔና ኮሻን ዴስ ጊዳ።

³⁸ዬሱሲካ “ታ ዪዳይ ታማርሳናስ ጊዲዳ ጊሽ ኣኔ ሚሺራቾ ቃላ ዮታናስ ማታን ዲዛ ጉታታ ቦስ” ጊዴስ።

³⁹ሄሳ ጊሽ ኣይሁዳታ ዎሳ ኬꬃን ጌሊ ጌሊ ሳባኪሼኔ ዳይዳንꬂ ኬሲሼ ጋሊላ ኩሜꬃን ዩዪዴስ።

⁴⁰ኢሲ ኢንቺራቻ ሃርጊዛዴይ ዬሱሳኮ ሺቂዲኔ ኢዛ ሲንꬃን ጉልባቲዲ “ኔ ሼኔ ጊዲኮ ኔ ታና ፓꬃና ዳንዳያሳ” ጊ ዎሲዴስ።

⁴¹ዬሱሲካ ኣዴዛስ ሚሼቲዲ ባ ኩሼ ዬዲ ኢዛ ቦቺዲኔ “ታ ኔ ፓፃና ማላ ኮያይስ፤ ፓፃ!” ጊዴስ።

⁴²ሄራካ ኣዴዛ ኢንቺራቻ ሃርጌይ ኣጊን፥ ኣዴዚ ፓፂዴስ።

⁴³ዬሱሲካ ኣዴዛስ “ኦናስካ ሃይሳ ኔ ሃሳዮንታ ማላ ናጌታ፤ ጊዶ ኣቲን ባዳ ቄሴስ ኔና ቤሳ። ዴሬዛስ ማርካ ጊዳና ማላ ኔ ፓፂዳይሳስ ሙሴይ ኣዛዚዳ ያርሾዛ ሺሻ” ጊዲ ኬሂ ሚንꬅ ዮቲዴስ።

⁴⁵ጊዶ ኣቲን ኣዴዚ ኬዚ ቢዲ ባ ቢዳ ኡባሶን ዎሬ ዳርሲ ꬋርጪዴስ። ሄሳ ጌዶን ዬሱሲ ኣይ ካታማንካ ቆንጬራ ጌላናስ ዳንዳይቤና። ሄሳፌ ዴንዲዳይሳን ካታማፔ ካሬራ ኣሲ ባይንዳሶን ዱስ ኦይኪዴስ። ኣሳይ ጊዲኮ ዱማ ዱማሶፔካ ኢዛኮ ዪዴስ።