ማርቆሳ 14

1

2

3

4

5

6

7

8

9

10

11

12

13

14

15

16

¹ፓዚጋኔ ኡኬꬃ ሙሳ ባዓሌ ጋላሳይ ቦንቼታናስ ናምዑ ጋላሲ ኣቲሺን ቄሴታ ሃላቃቲኔ ሙሴ ዎጋ ታማርሲዛይቲ ዬሱሳ ባሌꬂ ኦይኪዲ ዎꬋና ኦጌ ኮይዳ።

²ጊዶ ኣቲን “ኣሳይ ሜቶ ሜꬎንታ ማላ ባዓሌ ጋላሳታን ጊዶፖ” ጊዳ።

³ኢዚ ቢታኒያ ጌቴቲዛ ሶን ኢሲ ኢንቺራቻ ሃርጋንቻ ጊዲዳ ሲሞና ሶን ቁማ ቦላ ዲሺን ዋጋይ ዳሮ ኣልዖ ጊዲዳ ናርዶሴ ጌቴቲዛ ሺቶይ ኩሚ ኡቲዳ ኣልባስፂሮሴ ቢልቃፄ ኦይኪዳ ኢሲ ማጫሳያ ቢልቃፄዛ ሜንꬃዳ ሺቶዛ ዬሱሳ ሁዔ ቦላ ጉሳዱስ።

⁴ሄን ጋዳን ዲዛ ኣሳታፔ ኢሲ ኢሲ ኣሳቲ “ሃይሲ ሺቶዚ ኣዛስ ዎጋይ ባይንዳ ጉኪዜ?” ጊዲ ባ ጊዶን ሃንቄቲዳ።

⁵“ሺቶዚ ባይዞ ባይዚዳኮ ሄꬑ ፄቱ ዲናሬፔ ቦላራ ባይዜቲዲ ማንቆታስ ኢሜቴኔሺን” ጊዲ ማጫሳዮካ ካꬊዳ።

⁶ጊዶ ኣቲን ዬሱሲ ኢስታስ “ኣጊቴ! ሃኖ ማጫሳዮ ኣዛስ ዋይሴቲ? ኢዛ ታስ ሎዖ ሚሽ ኦꬃዱስ።

⁷ማንቆቲ ኣይ ዎዴካ ኢንቴናራ ዴቴስ። ኢንቴ ኮይዳ ዎዴ ኣይዴካ ኢስታ ማዳናስ ዳንዳዬታ ሺን ታ ጊዲኮ ኡባ ዎዴ ኢንቴናራ ዲኬ።

⁸ሃና ባ ኦꬃናስ ዳንዳዪዛሪ ኬና ኦꬃዱስ። ታስ ሞጎስ ጊዳና ማላ ታ ኣሾ ካሴታ ቲያዱስ።

⁹ታ ኢንቴስ ቱሙ ጋይስ፤ ሃይሲ ሚሺራቾ ቃላይ ኣላሜ ኩሜꬃን ሳባኬቲዛሶን ኣዋንካ ኢዛ ኦꬂዳይሲ ኢዞ ሃሳዒሲዛዝ ጊዲዲ ሃሳዬታና” ጊዴስ።

¹⁰ሄሳፌ ጉዬ ታማኔ ናምዓታፔ ኢሶይ ኣስቆሮንቶ ዩሁዳይ ዬሱሳ ኣꬂ ኢማናስ ቄሴታ ሃላቃታኮ ቢዴስ።

¹¹ኢስቲካ ሄሳ ሲይዲ ኡፋዬቲዳ፤ ኢዛስ ሚሼ ኢማናስ ኢዛራ ጊጊዳ። ሄሳ ጊሽ ዬሱሳ ኣꬂ ኢማናስ ኢንጄ ዎዴ ናጊሼ ጋምዒዴስ።

¹²ፓዚጋ ዶርሲ ሹኬቲዛ ኡኬꬃ ሙሳ ቦንቺዛ ኮይሮ ጋላስ ዬሱሳ ካሊዛይቲ ዬሱሳኮ ሺቂዲ “ፓዚጋ ካዎ ማናሶ ኣዋን ጊጊሳና ማላ ኮያይ?” ጊ ኦይቺዳ።

¹³ኢዚካ ባና ካሊዛይታፔ ናምዓታ “ጌዴ ካታማ ቢቴ፤ ኢንቴ ቢሺን ሃꬄ ኦቶራ ቶኪዳ ኢሳዴይ ኢንቴናራ ጋጋና።

¹⁴ኢዚ ቢዲ ጌሊዛሶ ጋካናስ ኢዛ ካሊቴ። ኬꬃዴዛስ ‘ኣስታማሬይ ኔና ታና ካሊዛይታራ ፓዚጋ ካዎ ማናስ ታስ ጊዲዛ ኢማꬃ ሼምፖሶይ ኣዋይሴ? ጊዴስ’ ጊቴ።

¹⁵ኢዚካ ቦላ ፖቄ ቦላ ዲዛ ጊጊ ኡቲዳ ኣሆ ሶ ኢንቴና ቤሳና፤ ሄን ኢዛን ጊጊሲቴ” ጊ ኪቲዴስ።

¹⁶ኢዛ ካሊዛይቲካ ኬዚዲ ጌዴ ካታማ ቢዳ። ዉሪካ ዬሱሲ ጊዳ ማላ ሃኒ ቤቲዴስ፤ ፓዚጋካ ሄን ጊጊሲዳ።

¹⁷ጋዴይ ቃሚሺን ዬሱሲ ባና ካሊዛ ታማኔ ናምዓታራ ጋኪዴስ።

¹⁸ኢስቲ ማዳን ዲሺን “ታ ኢንቴስ ቱሙ ጋይስ፤ ኢንቴ ጊዶፌ ኢሶይ ኢዚካ ታናራ ኢሲፌ ሚዛይሲ ታና ኣꬂ ኢማና” ጊዴስ።

¹⁹ኢስቲካ ሙዞቲዲ “ታኔሻ? ታኔሻ?” ጊዲ ኢሶይ ኢሶይ ዬሱሳ ኦይቺዳ።

²⁰ኢዚካ ኢስታስ “ታማኔ ናምዓታፔ ኢሶይ ታናራ ባ ኩሼ ኬሬን ዬዲዛዴ።

²¹ካሴ ፃፌቲዳ ማላ ኣሳ ናይ ኢዛ ጊሽ ሃይቃና ሺን ኣሳ ና ኣꬂ ኢሚዛዴስ ኣዬ-ኣና! ሄሳዴይ ካሴ ዬሌቶንታ ኣጊዳኮ ኢዛስ ሎዖኮሺን!” ጊዴስ።

²²ኢስቲ ሚሺን ኡኬꬃ ኤኪ ኣንጂዲኔ ሜንꬂዲ ባና ካሊዛይታስ “ሃይሳ ታ ኣሾ ሄይቴ” ጊ ኢሚዴስ።

²³ኡሻካ ዴንꬂ ጋላቲዲ ኢስታስ ኢሚን ኢስቲ ዉሪካ ኡዪዳ።

²⁴ቃሴ ዬሱሲ “ሃይሲ ዳሮታ ጊሽ ጉካና ታ ኦራꬃ ጫቆ ሱꬃ።

²⁵ታ ኢንቴስ ቱሙ ጋይስ፤ ኦራꬃ ዎይኔፔ ጊጊዳ ኡሻ ፆሳ ካዎቴꬃን ታ ኡያና ዎዴ ጋካናስ ናምዓንꬆ ሃይሳ ኡዪኬ” ጊዴስ።

²⁶ሄሳፌ ጉዬ ማዛሙሬ ኢሲፌ ዬፂዲ ፑዴ ዳብራዛይቴ ዙማ ቦላ ኬዚዳ።

²⁷ዬሱሲ “ ‘ታ ሄሚዛይሳ ሾጫና ሄ ዎዴ ኢዛ ዶርሳቲ ላሌታና’ ጌቴቲ ፃፌቲዳይሳ ማላ ኢንቴ ዉሪካ ታናን ዱጴታና።

²⁸ታ ዴንዲዳይሳፌ ጉዬ ጊዲኮ ታ ኢንቴፌ ካሴታዳ ጋሊላ ባና” ጊዴስ።

²⁹ጴፅሮሲካ “ኣሳይ ዉሪ ꬉጴቲኮካ ታኒ ꬉጴቲኬ!” ጊዴስ።

³⁰ዬሱሲካ “ታ ኔስ ቱሙ ጋይስ፤ ሃቺ ቃማ ኩቶይ ናምዑቶ ዋሳና ጋካናስ ኔኒ ታና ሄꬑቶ ካዳና” ጊዴስ።

³¹ጴፅሮሲ ቃስ “ታ ኔናራ ሃይቂዛኮካ ሙሌካ ኔና ካዲኬ” ጊዲ ኬሂ ሚንꬂ ዮቲዴስ። ሃንኮይቲካ ዉሪ ኢዛይሳꬆ ጊዳ።

³²ሄሳፌ ጉዬ ጌቴሴማኔ ጌቴቲዛሶ ቢዳ ዬሱሲካ ባና ካሊዛይታ “ታኒ ዎሲሺን ኢንቴ ሃይሳን ጋምዒሺቴ” ጊዴስ።

³³ጴፅሮሳ፥ ያቆቤኔ ዮሃኒሳ ባናራ ኤኪ ቢዴስ። ኬሂ ቆፒዴሲኔ ሜቶቲዴስ።

³⁴ቃሴካ ኢስታስ “ታ ሼምፖያ ዳሮ ሜቶታዱስ ኢንቴ ሃን ዲሺቴ። ꬊስኮንታ ናጊቴ” ጊዴስ።

³⁵ኢስታ ኣቻፌ ጉꬅ ጌዴ ፖቂዲ ቢታ ቦላ ጉፋኒዲ ሃንኮ ሄ ሳቴያ ኢዛፔ ኣꬋና ማላ ዎሲዴስ።

³⁶“ታ ኣዋዉ! ኔስ ዉሪ ዳንዳዬቴስ፤ ሃይሳ ዋዬ ፁዓ ታፔ ሃሳ። ጊዲኮካ ኔ ሼኔፔ ኣቲን ታ ሼኔይ ሃኖፖ” ጊዴስ።

³⁷ኢዚ ሄፔ ሲሚ ዪሺን ኢዛ ካሊዛይቲ ꬊሲኪዳይታ ቤዪዴስ። ጴፅሮሳካ “ሲሞና ꬊስካዲ? ሃራይ ኣቶ ሺን ኢሲ ሳቴካ ሚናዳ ናጎይ ኔና ፆኒዴ?

³⁸ኢንቴ ፓጬን ጌሎንታ ማላ ቤጊዲ ዎሲቴኔ ሚኒቴ። ኣያናይ ጊጌቲ ኡቲዴስ ሺን ኣሾይ ጊዲኮ ዳቡራንቻ” ጊዴስ።

³⁹ቃሴካ ቢዲ ኮይሮይሳꬆ ዎሲዴስ።

⁴⁰ኢዚ ናምዓንꬆ ሲሚ ዪሺን ኢስታ ኣይፌን ꬊስኮይ ዴፂን ꬊስኪዳይታ ዴሚዴስ ሺን ኢስቲ ኢዛስ ኣይ ዛራናኮኔ ኤሪቤቴና።

⁴¹ሄꬓንꬆ ዪዲ “ሃዒካ ኢንቴ ኢቺዲ ሼምፔቲ? ሃዒ ጊዳና፥ ሳቴያካ ጋካዱስ፤ ሄኮ ኣሳ ናይ ናጋራንቻታ ኩሼን ኣꬊ ኢሜታና።

⁴²ኣኔ ኤቂቴ ቦስ፤ ታና ኣꬂ ኢማናዴይ ዪዴስ” ጊዴስ።

⁴³ዬሱሲ ቡሮ ሃሳያን ዲሺን ታማኔ ናምዓታፔ ኢሶይ ዩሁዳይ ዪዴስ። ኢዛራ ኢሲፌ ቄሴ ሃላቃታፔኔ ሙሴ ዎጋ ታማርሲዛይታፔ ኪቴቲዳ ዳሮ ኣሳይ ጊꬃ ማሻኔ ዱርቃ ኦይኪዲ ዪዴስ።

⁴⁴ኢዛ ኣꬂ ኢማና ዩሁዳይ ኢስታስ “ኣሳ ጊዶፌ ታ ዬሪዛዴይ ኢዛ ጊዲዳ ጊሻስ ኦይኪዲ ሎዔꬂ ናጊ ኤፊቴ” ጊዲ ካሴቲ ማላታ ኢሚ ዎꬂዴስ።

⁴⁵ጋኪዳ ማላ ዩሁዳይ ዬሱሳኮ ሺቂዲ “ኣስታማሬ!” ጊዲ ዬሪዴስ።

⁴⁶ኣሳቲካ ዬሱሳ ኦይኪዳ።

⁴⁷ኢዛ ኣቻን ኤቂዳ ኢሶይ ማሻ ኮሆፔ ሾዲ ቄሴታ ሃላቃ ኣሽካራ ሃይꬅ ቃንፂዴስ።

⁴⁸ዬሱሲካ ኢስታስ “ፓንጋ ማላ ታና ኦይካና ማሻኔ ዱርቃ ኦይኪዲ ዬቲ?

⁴⁹ዎንቲን ዎንቲን ፆሳ ኬꬃን ታማርሳሼ ታ ኢንቴናራ ዲሺን ኦይኪቤኬታ ሺን ካሴ ፃፌቲዳይሲ ፖሌታና ማላ ሃይሲ ሃኒዴስ” ጊዴስ።

⁵⁰ሄሳ ዎዴ ኢዛ ካሊዛይቲ ዉሪ ኢዛ ዬጊ ኣጊ ቢዳ።

⁵¹ባ ካሎቴꬅ ቄሪ ናፃላን ካሚዳ ኢሲ ናይ ዬሱሳ ካሊሺን ኣሳይ ኢዛ ኦይኪን፥

⁵²ናዚ ናፃላ ዬጊዲ ካሎ ኪቺዴስ።

⁵³ዬሱሳካ ጌዴ ቄሴታ ሃላቃኮ ኤፊዳ። ቄሴታ ሃላቃቲ፥ ዴሬ ጪማቲኔ ሙሴ ዎጋ ታማርሲዛይቲ ሄን ኢሲፌ ዉሪ ሺቂዳ።

⁵⁴ጴፅሮሲካ ዬሱሳ ሃሆራ ካሊሼ ቄሴታ ሃላቃ ጊቤ ጋካናስ ቢዴስ። ኢዚ ሄን ኡቲዲ ሃራ ኣሳታራ ታማ ሆዒሺን፥

⁵⁵ቄሴታ ሃላቃቲኔ ዴሬ ጪማቲ ዉሪ ዬሱሳ ዎꬋናስ ማርካታና ኣስ ኮይዳ ሺን ዴማናስ ዳንዳዪቤቴና።

⁵⁶ዳሮቲ ኢዛ ቦላ ዎርዶራ ማርካቲኮካ ማርካታ ቃላይ ኦይኬቲቤና።

⁵⁷ኢሲ ኢሲ ማርካቲ ዴንዲዲ ዎርዶራ፥

⁵⁸“ሃይሲ ኣዴዚ ‘ታ ኣሳ ኩሼን ኬፄቲዳ ፆሳ ኬꬃ ላላዳ ኣሳ ኩሼይ ቦቾንታዝ ሃራ ፆሳ ኬꬃ ሄꬑ ጋላሳራ ታ ኬፃና’ ጊሺን ኑ ሲዪዶስ” ጊ ማርካቲዳ።

⁵⁹ጊዶ ኣቲን ኢስታ ማርካቴꬂ ኢሲ ቦላ ዎꬊቤና።

⁶⁰ቄሴታ ሃላቃይካ ኢስታ ሲንꬃን ኤቂዲ “ሃይቲ ኔ ቦላ ማርካቲዛይሲ ኣዜ? ኔ ኣዛስ ዱና ዛሪኪ?” ጊዲ ዬሱሳ ኦይቺዴስ።

⁶¹ጊዶ ኣቲን ዬሱሲ ኢስታስ ኣይኮካ ዛሮንታ ጮዑ ጊዴስ። ቄሴታ ሃላቃይ ቃሴካ “ኣንጄቲዳ ፆሳ ናይ ኪርስቶሲ ኔኔ?” ጊ ኦይቺዴስ።

⁶²ዬሱሲካ ዛሪዲ “ኤ፤ ታናኮ! ኣሳ ናይ ዎልቃማ ፆሳ ኡሻቻን ኡቲሺኒኔ ሳሎ ሻራራ ዪሺን ኢንቴ ኢዛ ቤያና” ጊዴስ።

⁶³ቄሴታ ሃላቃይ ባ ማይዖ ዳኪዲ “ኑስ ሃራ ኣዛ ማርካ ኮሺዜ?

⁶⁴ኢዚ ጫሻ ቃላ ፆሳ ቦላ ሃሳይሺን ኢንቴ ሲዪዴታ፤ ሃዒች ኢንቴስ ኣይ ሚሳቲዜ?” ጊዴስ። ኢስቲካ “ኢዛስ ሃይቆይ ቤሴስ” ጊዲ ዉሪካ ኢሲ ቃላን ፒርዲዳ።

⁶⁵ሄሳ ዎዴ ኢሲ ኢሲ ኣሳቲ ኢዛ ቦላ ጩች ጩቲዳ፤ ኢዛ ኣይፌ ጎዚ ኦይኪዲ ኢጪሼ “ኣኔ ቲንቢቴ ዮታ” ጊዳ። ባጋይቲ ቃሴ ሻጋላን ባቂሼ ኤፊዳ።

⁶⁶ጴፅሮሲ ዱጌ ባጋራ ሄን ጊቤ ጊዶን ዲሺን ቄሴታ ሃላቃ ጋራዴታፔ ኢሲኒያ ያዱስ።

⁶⁷ጴፅሮሲ ታማ ሆዒሺን ቲሺ ሂስታ ፄላዳ “ኔኒ ናዚሬቴ ዬሱሳራ ዳሳ ጊዲኪ?” ጋዱስ።

⁶⁸ኢዚ ቃስ “ኔ ጊዛይሳዴ ታ ኤሪኬ፤ ኔ ጊዝይሲ ታስ ጌሌና” ጊዲ ካዲዴስ። ሄሳፌ ጌዴ ፔንጌ ፖቂ ኤቂ ዲሺን ሄራካ ኩቶይ ዋሲዴስ።

⁶⁹ሄ ጋራዴያ ኢዛ ቤዪዳ ማላ ሄን ኤቂዳ ኣሳታስ “ሃይሲ ኣዴዚ ኢዛራ ዲዛ ኣሳታፔ ኢሳዴኮ!” ጋዳ ቃሴካ ሃሳያዱስ።

⁷⁰ኢዚ ቃሴካ ካዲዴስ። ጉꬃ ዎዴ ጋምዒሺን ሄን ኤቂዳ ኣሳቲ ጴፅሮሳ “ኔኒ ጋሊላ ኣሳ፥ ሄሳ ጊሽ ቱማፔ ኔ ኢስታፌ ኢሳዴ” ጊዳ።

⁷¹ጊዶ ኣቲን ኢዚ ቃስ “ኢንቴ ጊዛዴ ታ ኤሪኬ!” ጊሼ ጫቆኔ ባና ቃንጌꬅ ኦይኪዴስ።

⁷²ሄራካ ኩቶይ ናምዓንꬆ ዋሲዴስ። ጴፅሮሲካ “ኩቶይ ናምዓ ዋሳናስ ኔ ታና ሄꬓ ካዳና” ጊዳ ዬሱሳ ቃላይ ኢዛስ ቆፌቲን ሂቂሚዲ ዬኪዴስ።