ማርቆሳ 15

1

2

3

4

5

6

7

8

9

10

11

12

13

14

15

16

¹ማላዶ ዎንታራ ቄሴታ ሃላቃቲ፥ ዴሬ ጪማቲኔ ሙሴ ዎጋ ታማርሲዛይቲ ኩሜꬃ ሻንጎ ኣላፌታራ ኢሲፌ ዞሬቲዲ ዬሱሳ ቃቺ ኤኪ ኤፊዲ ጲላፆሳስ ኣꬂ ኢሚዳ።

²ጲላፆሲካ ዬሱሳ “ኔ ኣይሁዳታ ካዎ?” ጊ ኦይቺዴስ። ዬሱሲካ “ኤ፥ ኔ ጊዳ ማላ” ጊዲ ኢዛስ ዛሪዴስ።

³ቄሴታ ሃላቃቲካ ዳሮ ዮዖ ኢዛ ቦላ ሺሺ ሞቲዳ።

⁴ጲላፆሲ ቃስ “ኔ ኣዛስ ኦይሻ ዛሪኪ? ሄኮ ኔና ዳሮ ዮዖን ሞቴቴስ” ጊዲ ቃሴካ ኦይቺዴስ።

⁵ጊዶ ኣቲን ዬሱሲ ሃዒካ ኢዛስ ኣይኮካ ዛሮ ኢሞንታ ጊሽ ጲላፆሲካ ማላሌቲዴስ።

⁶ፓዚጋ ባዓሌ ጋላስ ጲላፆሲ ዴሬይ ቢርሻና ማላ ኦይቺዳዴ ቢርሺ ዬዲዛ ዎጋይ ካሴ ዴስ።

⁷ኢታ ኦሶን ዴሬ ቦላ ዴንዲዲ ሼምፖ ዎꬊዳ ኣሳታራ ኢሲፌ ቃሼቲዳ ባርባኔ ጌቴቲዛ ኢሳዴይ ዴስ።

⁸ዴሬይካ ዪዲ ካሴ ሎሴ ጊዲዳይሳ ኢዚ ኦꬃና ማላ ጲላፆሳ ዎሲዴስ።

⁹ጲላፆሲካ ኢስታስ “ታ ኢንቴስ ኣይሁዳ ካዎ ቢርሻና ማላ ኮዬቲ?” ጊ ኦይቺዴስ።

¹⁰ጲላፆሲ ሄሳꬆ ኦይቺዳይ ካሴ ቄሴታ ሃላቃቲ ዬሱሳ ቃናቴን ኣꬂ ኢሚዳይሳ ኤሪዛ ጊሻሳ።

¹¹ቄሴታ ሃላቃቲ ቃስ “ኢዛ ኤፃ ባርባኔይ ቢርሼቶ!” ጊ ኦይቻና ማላ ዴሬዛ ዴንꬄꬂዳ።

¹²ጲላፆሲ “ሂስቲኮ ኢንቴ ኣይሁዳ ካዎ ጊዛ ኣዴዛ ዎስታና ማላ ኮዬቲ” ጊዴስ።

¹³ኢስቲ ቃሴካ “ካቃ! ካቃ!” ጊ ዋሲዳ።

¹⁴ጲላፆሲካ “ኣይ ኢታ ኦꬂዴ?” ጊ ኢስታ ኦይቺዴስ። ኢስቲ ቃስ “ካቃ! ካቃ!” ጊዲ ካሴፔ ኣꬂ ዋሲዳ።

¹⁵ጲላፆሲካ ዴሬዛ ኡፋይሳና ጊዲ ባርባኔ ኢስታስ ቢርሺዴስ። ዬሱሳ ጋራፊዲ ካቃናስ ኣꬂ ኢሚዴስ።

¹⁶ዎታዳራቲ ዬሱሳ ዴሬ ሃሪዛይሳ ጊቤ ኤኪ ቢዲ ኣቲዳ ዎታዳራታ ዉርሲ ሺሺዳ።

¹⁷ዬሱሳ ዞዖ ማይዖ ማይዚዳ፤ ኣጉንꬃ ኣክሊሌ ፃፂዲ ኢዛ ሁዔን ዎꬂዳ።

¹⁸ሄሳፌካ “ኣይሁዳ ካዎ ሳሮይ ኔስ ጊዶ!” ጊሼ ኢዛ ሳሮꬂዳ።

¹⁹ኢዛ ሁዔ ጉፌራ ሾጪዳ፤ ኢዛ ቦላካ ጩቲዳ ጉልባቲዲ ኢዛስ ጎይኒዳ።

²⁰ኢዛ ቦላ ቂꬊ ካዒዳፔ ጉዬ ካሴ ማይዚዳ ዞዖ ማይዖዛ ቃሪ ኤኪዲ ካሴ ኢዛ ማይዖዛ ዛሪ ማይዚዲ ካቃናሶ ኤኪ ቢዳ።

²¹ኣላኪሳንድሮሳኔ ሩፎሳ ኣዋ ሲሞና ጌቴቲዛ ኢሲ ቃሬና ዴሬ ኣሲ ዴሬፔ ካታማ ዪዛይሳ ዬሱሳ ማስቃሌ ዎልቃራ ኦይኪ ቶሲዳ።

²²ሄሳፌ ጉዬ ዬሱሳ ጎልጎታ ጌቴቲዛሶ ኤፊዳ፤ ኢዛስ ቢርሼꬃይ “ኣሳ ሁዔ ጉጌ” ጉሳ።

²³ካርቤ ጌቴቲዛ ጫሞራ ዋላኬቲዳ ዎይኔ ጫጄ ኡያና ማላ ኢዛስ ኢሚን ኢዚ ኤኮንታ ኢፂዴስ።

²⁴ሄሳፌ ጉዬ ኢዛ ካቂዳ፥ ኢዛ ማይዖ ኢሳዴ ኢሳዴ ኣዋይሲ ጋካናኮኔ ጊዲ ሳማ ዬጊዲ ጊሼቲዳ።

²⁵ኢስቲ ኢዛ ካቂሺን ዎንታፌ ሄꬑ ሳቴ ጊዲዴስ።

²⁶ኢስቲ ማስቃሌ ቦላ ፃፊ ሺሺዳ ሞቶ ቃላይ “ኣይሁዳ ካዎ” ጊዛ ቃላ።

²⁷ኢዛራ ኢሲፌ ናምዑ ፓንጋታ ኢሳ ኢዛፔ ኡሻቻራ ኢሳ ሃዲርሳራ ካቂዳ።

²⁸ሄሳንካ ካሴ ማፃፋይ “ኢታታራ ኢሲፌ ታይቤቲዴስ” ጊዳ ቲንቢቴ ቃላይ ፖሌቲዴስ።

²⁹ኦጌራ ኣꬊ ቢዛይቲካ ባ ሁዔ ቃꬂሼ “ኦይ! ኦይ! ፆሳ ኬꬃ ላላዳ ሄꬑ ጋላሳን ኬፃናይ ኔኔ?” ጊዲ ኢታ ጫሼ ጫዪሼ፤

³⁰“ኣኔ ሃዒ ማስቃሌ ቦላፌ ዎꬋዳ ኔና ኣሻ” ጊዳ።

³¹ሄሳꬆካ ቄሴታ ሃላቃቲኔ ሙሴ ዎጋ ታማርሲዛይቲ ባ ጊዶን ኢሶይ ኢሳስ “ሃራታ ኣሺዴስ ሺን ባና ኣሻና ዳንዳይቤና” ጊዲ ኢዛ ቂꬊዳ።

³²“ኑ ኢዛ ቤዪዲ ኣማናና ማላ ኣኔ ሃይሲ ኪርስቶሲ ኢስራዔሌታ ካዎይ ሃዒ ማስቃሌፔ ዎꬎ” ጊዳ። ኢዛራ ካቄቲዳይቲካ ኢዛ ቦላ ጫሼ ኮሪዳ።

³³ኡሱፑን ሳቴፔ ኦይኪዲ ኡዱፉን ሳቴ ጋካናስ ቢታይ ዉሪ ꬉሚዴስ።

³⁴ኡዱፉን ሳቴ ቦላ ዬሱሲ “ኤሎሄ! ኤሎሄ! ላማ ሳባቂታኔ” ጊዲ ቃላ ꬎቁ ሂስቲዲ ዋሲዴስ። ሄሳስ ቢርሼꬃይ “ታ ፆሶ! ታ ፆሶ! ኔ ታና ኣዛስ ኣጋዲ?” ጉሳ።

³⁵ሄን ጋዳን ኤቂዳ ኣሳፔ ኢሲ ኢሲ ኣሳቲ ሄሳ ሲይዲ “ኤላሳ ፄይጌስኮ” ጊዳ።

³⁶ሄሳፌ ኢሲ ኣሲ ኤሌሊ ቢዲ ጫሊዳ ዎይኔ ጫጄ ኢስፖንጄ ማላ ሚሻን ጌልꬂ ኬሲዲ ሚꬃ ፄራን ኦይꬂዲ ኡያና ማላ ዬሱሳስ ሺሺዴስ። ሄሳፌ ቃሴ “ኣኔ ኣጋጊቴ፤ ኤላሲ ዪዲ ኢዛ ካቆፔ ዎꬂሺን ኑ ቤያና” ጊዴስ።

³⁷ሄሳፌ ዬሱሲ ቃላ ꬎቁ ሂስቲ ዋሲዲ ሼምፖ ኬዚዴስ።

³⁸ፆሳ ኬꬄ ማጋላሻይ ሁዔራ ዱጌ ናምዑ ኬዚ ዳኬቲዴስ።

³⁹ዬሱሳ ጊናራ ኤቂዳ ኢሲ ማቶ ሃላቃይ ዬሱሲ ሄሳꬆ ጊታ ቃላራ ዋሲዲ ሼምፖ ኬዚሺን ቤዪዲ “ሃይሳዴይ ቱሙ ፆሳ ናኮሺን” ጊዴስ።

⁴⁰ሄሳ ዎዴ ማጫሳቲ ሃኒዛይሳ ሃሆን ዲዲ ፄሊዳ። ኢስታ ጊዶፌ ማግዳሌፔ ዪዳ ማራማኔ ካሎቲዛ ያቆቤኔ ዮሳ ኣዮ ማራሚራ ቃሴካ ሳሎሚራ ኢሲፌ ዴቴስ።

⁴¹ሄይቲ ማጫሳቲ ጋሊላን ዬሱሳ ካሊሼኔ ኢዛስ ኦꬂሼ ጋምዒዳይታ። ኢስታራካ ኢሲፌ ሃራ ዳሮ ማጫሳቲ ዬሩሳላሜ ቢዳ።

⁴²ጋዴይ ቃሚ ቃሚ ቢሺን ሳምባታስ ጊጌቲዛ ጋላሲ ጋኪዴስ።

⁴³ዴሬ ጪማታ ጊዶን ቦንቼቲዳ ኢሲ ኣርማቲያሳ ዴሬ ኣስ ዮሴፌ ጌቴቲዛይሲ ፆሳ ካዎቴꬅ ናጊሼ ዲዛዴይ ባቦንታ ጲላፆሳኮ ቢዲ ዬሱሳ ኣሃ ዎሲዴስ።

⁴⁴ጲላፆሲካ ኢዚ ሂኒ ዎዴ ኤሌራ ሃይቂዳይሳ ሲይዲ ማላሌቲዴስ። ማቶ ሃላቃ ፄይጊስዲ “ኢዚ ሃይቂ ጋምዒዴ?” ጊዲ ኦይቺዴስ።

⁴⁵ኢዚ ሃይቂዳይሳ ማቶ ሃላቃይ ጌሺ ኤሪዳፔ ጉዬ ዬሱሳ ኣሃ ዮሴፌስ ኢሚዴስ።

⁴⁶ዮሴፌካ ሞጎ ማይዖ ሻሚዲ ኣሃ ማስቃሌፔ ዎꬂዲ ሞጎ ማይዖን ፃፂዲ ሹቻፌ ዎጬቲዳ ዱፎን ሞጊዴስ። ዱፋ ዱና ሹቻራ ጎርዲዴስ።

⁴⁷ማግዳሌፔ ዪዳ ማራሚራኔ ዮሴፌ ኣዮ ማራሚራ ዬሱሳ ኣሃ ኣዋን ሞጊዳኮኔ ቤዪዳ።