Yontu Tɑɑ Yontu 2:1-12

¹Mɑ wɛ kɛ́ ɩsɩɩ Sɑlɔŋ tɛtɛkǝlɛ yɑɑye. Mɑɣɑlɛ tɛtʋ ɩhǝntɑʋ tɑɑ hɛtʋ.

²Ɩsɩɩ yɑɑye wɛʋ sɔwɑ hɛkʋ tɔ, ḿpʋ́ɣʋ́ mɑ kʋsɔɔlɑɣɑ nyɑ́ n wɛ pɛɛlɑɑ lɛlɑɑ tɑɑ.

³Ɩsɩɩ tʋɣʋ kʋtɔtɔɣɔʋ wɛʋ hɔtʋɣʋ tɩɩŋ tɑɑ tɔ, ḿpʋ́ɣʋ́ mɑ kʋsɔɔlʋ nyɑ́ n wɛ ɩfepiyɑ lɛlɑɑ tɑɑ. Nyɑ́ ɩsotom tɑɑ kɛ́ mɑ nyɩɩlɑ cɑɣɑʋ. Nyɑ́ pee wɛ leleŋ kɛ mɑ nɔɣɔ tɑɑ kɛ́.

⁴Acimɑ tɑɑ kɛ́ n ponɑ-m nyɑ́ tɛ. Nyɑ́ tuutɑ wei n kpɑɑsɑ mɑ nyʋɣʋ tɑɑ tɔɣɔlɛ sɔɔlʋɣʋ.

⁵N cɛlɑ-m tʋɣʋ ŋku pɑ yɑɑ sɩ lɛsɛŋ tɔ kʋ pee kɑkɑlɑsɩ nɑ mɑ́ tɔɣɔ nɑ pǝ́ sǝnɑ-m. N hɑ-m tʋɣʋ pee nɑ mɑ́ mʋʋ nɑ pǝ́ hɑ-m tomɑ. Mpi tɔ, sɔɔlʋɣʋ kʋtɔŋ kpɑ-m kɛ́.

⁶Te mɑ nyʋɣʋ nɑ nyɑ́ niŋ mpǝtǝŋ. Kpɛkǝnɑ-m nɑ nyɑ́ ntɔɣɔŋ.

⁷Hɑɩ, Yosɑlɛm pɛɛlɑɑ mɛ, mɑ tuukinɑ nɑmǝŋ nɑ nɑsɛŋ sɩ: Ɩ́ tɑɑ pɑɑtɩ tɑ́ sɔɔlʋɣʋ nɑ pǝ wɑɑtʋ tɑ tɑtɑ.

⁸Ɩ́ nɩɩ mɑ kʋsɔɔlʋ nɔɣɔ. Ɩ ŋmɑɑkǝnɑ ntɛɣɛ pɔɔŋ nɑ pulɑsɩ tɔɔ nɑ ɩ́ kɔŋ.

⁹Mɑ kʋsɔɔlʋ nǝɣǝsǝnɑ kɛ́ ɩsɩɩ nɑsɛm yɑɑ kɑpǝlǝŋɑ kʋfɑlɑɣɑ. Hɑlɩ ɩnǝɣǝlɛ tɑ́ koluŋɑ wɑɑlɩ nɑ ɩ́ nyǝnǝɣǝnɑ pǝtote.

¹⁰Ɩ yɑɑkɩ-m sɩ: Mɑ kʋsɔɔlɑɣɑ nyɑ́. Kʋlɩ nɑ ń kɔɔ.

¹¹Mpi tɔ, yolumɑ tɛmɑ. Tɛʋ tɛmɑ, kʋ sɩɩ tǝnɑɣɑ.

¹²Tɑwɑ tɑɑ kʋtɔɣɔŋ tʋ hɛtʋ kɛ tɛtʋ tɑɑ. Yoŋkpɑɑmɑ wɑɑtʋ tɑpɑɣɑlɛ. Ɩhokɑɣɑ wiiwɑ tɑ́ tɛtʋ tɑɑ.